Ɛstɛrə 6 - Yálá laawoo hɛɓɛ

Haman ə mąąwiɛ tɛɛ Mardose pɔ

¹ Mąą kpinįi tii hu, tɔɔmun hvo pɛli yii. Ə nɛ̨ɛ̨ mą, ə mo di pa a nɔi hɛɓɛ́, ɓɛi ɲɛ̨i mɛ̨nįɠaa pɛ̨ɛ̨i kɛ laa; di ɉɛɓɛ́i tii hu woo ɓo tɔɔmun ma.

² Ɉɛɓɛ́, mɛ̨i ŋɛ̨i kɛ bɛ̨ɛ̨i laa, diɛ kɛ mą: Bigtan da Tɛrɛsə, diɛi kɛ a gbɛtɛkpuwuluɠaa, diɛ dɔɔ kwəlii mąąkpɛ, di wɔlɔ lɔ tɔɔmun Asuerusə mąą kili, diɛ kɛ di baa. Kɛlaa, Mardose ɓə wɔlɔ di nąą lɛ, di yili kaa ɉɛɓɛ́ hu.

³ Nąąlɔwai, tɔɔmun yɛ diɛ: «Di Mardose hvɛla kulɔ pələ kɛ ləi, ɛlɛɛ, di mąąwiɛ?» Tɔɔmun bɔ nuą diɛ mą: «Di hvo wɔlɔ kɛ vɛla kulɔ li.»

⁴ Nąąlɔwai tɔɔmun yɛ diɛ: «Gbɛɛ ɓə gwəli hąąi?» Nąąlɔwai tii hu kpɔlɔ, Haman ə kɛ dɔɔ kwəli gala laaləi; yɛ lɔ. Ə kɛi pa, ə gɛ, ə Mardose hɛlɛn mɛ̨nį hu hvɛli, di ɉɛlɛn nwului ŋɛ̨i ə bɛli mą.

⁵ Tɔɔmun bɔ nuą tii kɛ gwɛlɛ diɛ mą: «Haman ɓə gwəli hąąi!» Tɔɔmun yɛ diɛ: «'Ka mo mą ə lɔ!»

⁶ Haman ə lɔ. Tɔɔmun yɛ mą: «Nui tɔɔmun gaa bɔ ə mąąwiɛ, lə ɓə mąąnɛ̨ɛ̨ ə gɛ mąą nu ɓa kpɔ a neelee?» Haman ə kɛi giliŋąhiɛ yɛ kɛ diɛ: «Gbɛɛ takpɛli ɓə moɔ tɔɔmun a pɛli yili kɛi la? Akɛ ɲą́ą́ gbinį hvəi!»

⁷ Haman ə tɔɔmun nwoo ŋąąpənə, yɛ mą: «Nwɔ́ tɔɔmun, akɛ ə́ kaa bɔ ə́ nu ta mąąwiɛ,

⁸ ə́ wɔ tɔɔ həɠəi dɔ̨nɔ̨ too gwaną, ə́ dɛ ə́ ɉee ə́ wɔ hooi mɛ̨i, ə́ tɔɔ bɔlɔ pɛlɛ nwuɔ̨;

⁹ ə́ mo ə́ wɔ kalanɉon gbɛakpɛai dɔ̨nɔ̨ ɓa, ə ɉəɠəi tii too mąą nu kwaną, ə dɛ ə ɉee ə́ wɔ hooi mɛ̨i, də li la gwəli hąąi kɛnɛ̨ ɓa, mąą nu hvilɛn ŋąą dɔwɔ yɛ kɛ mą: ‹Nui tɔɔmun gaa bɔ ə mąąwiɛ, bələ ɓə a gɛ la!›»

¹⁰ Tɔɔmun yɛ Haman ɓa: «'Li kilɛ, ə́ nwɔ́ tɔɔ həɠəi həɠə ə́ bɛlɛ nwɔ́ hooi ɓa; pələi tii ə́ mo la, ə́ gɛ kpɔlɔ tii a Mardose ŋɛ̨i a Ɉuifə mun, yaa ŋɛ̨i a gwəlii kalanɉon da. Mɛ̨nįɠaa tii ə́ mo, hvo dɔ̨nɔ̨ kpɛli lɛɛ pulu.»

¹¹ Haman ə nɛ̨ɛ̨ mą, ə ɉəɠə həɠə, ə bɛlɛ ɉoo ɓa. Ə ɉəɠə too Mardose kwaną, ə dɛ ə ɉee ɉoo mɛ̨i, ə hvilɛn dɔwɔ, da yaa də li gwəli hąąi, yɛ kɛ mą: «Nui tɔɔmun gaa bɔ ə mąąwiɛ, pələ ɓə a gɛ la!»

¹² Yili pulu, Mardose ə pənə ə li dɔɔ kwəlii, Haman ə pənə kpɔlɔ tii ɉa, ə li ɲəi bɛlɛ́ laaləi, ə həɠə pɛlɛ ɲɛ̨i, a nwunmɛ̨.

¹³ Mɛ̨nįi tii həli Haman ɓa, ə nwoo hukulɔ nɛ̨ą Ɉɛrɛsə ɓa da mɛlaani. Haman nɛ̨ą Ɉɛrɛsə da nwɔ kilimąą nuą di mo mą, diɛ mą: «Mardose ŋɛ̨i ə́ mąą aa yɛɛ gɔwɔ mui, gaa a Ɉuifə, yili ɓa, hvo kɛa pai tɛi hvo tɛɛ mą-o! Ə́ kaa lɔ pai kɛi nwumɛ̨i ɲəi ə́ mąą yɛ yɛɛ.»

¹⁴ Haman mɛlaa di lɛɛ lɔ mɛ̨nį tii ɓoi, tɔɔmun nwɔ nu gbɛtɛkpuɠuluɠaai diɛ pa Haman təli Ɛstɛrə nwɔ ɓɛlɛhee kɔ̨nɔ̨n ma.