Ɛstɛrə 2 - Yálá laawoo hɛɓɛ

Ɛstɛrə kɛ mɛ̨nį a tɔɔmu nɛ̨ą

¹ Mɛ̨nįɠaa tii tɛɛ pulu, ɓɛlɔwai tɔɔmun Asuerusə lii ə laa la, mɛ̨nįi tii Vasti ə gɛ la, ɛlɛɛ da ɉɛɓɛ́i ŋɛ̨i ə bɛ̨ɛ̨, yɛ hvilɛn na Vasti ɓa, ə hee, yɛ giliŋąhiɛ mą.

² Nuą ŋɛ̨i kɛ ɲee mu, di mo mą, diɛ mą: «Mąą nɛ̨ɛ̨, nɛ̨ɛ̨lɛa yiiɠaa di hvo hulɔnu mɛ̨nį hu kɔ́lɔn, di ɲɛ̨ilaa lɛlɛɛ, di yiliɠaa kwɛli.

³ 'Nuą həɠə, ə́ di hee goɓitaaɠaa kəlee hu, ə gɛ, di pa a nɛ̨ɛ̨lɛaɠaai di hvo hulɔnu mɛ̨nį hu kɔ́lɔn ɛlɛɛ, di ɲɛ̨ilaa lɛlɛɛ, di pa a diɛ gbɛtɛgbuwului ŋɛ̨i da kɛ naa ɓaa a: Hege, bɔ, ə ɲɛ̨i kɛ diɛ, ə di mąą tíhɛnŋąą tɛɛ di pɔ.

⁴ Nɛ̨ɛ̨non yii a ə́ liihon yili ɓə a kɛ a ə́ nɛ̨ą, a Vasti mąąhvalin.» Mɛ̨nįi tii ə nɛ̨ɛ̨ tɔɔmun ma, di nɛ̨ɛ̨ mą, di gɛ tii.

⁵ Ɉuifə mun da heeɛ kɛ Susə daai, diɛ kɛ naa ɓaa: Mardose. Nąn mąą kɛ a Yairə, nąn nwɔ nąn mąą a: Simei da Kisə. Di kaa a Bɛnɉamɛn huwuhu nuą.

⁶ Mardose tii, ə wɔlɔ lɛɛ luwɔɠaa lɔwai, diɛi ŋɛ̨i Nabukodonosorə Babilonə tɔɔmun ə pa a diɛ; diɛ həɠə Ɉerusalɛmə daai, ə mą kpɛli kɛ Ɉuda tɔɔmun Yoyakin.

⁷ Mardose tii ɓə Ɛstɛrə kulɔ ɉu, Ɛstɛrə kaa kɛ a Mardose gala lon, Ɛstɛrə laa ta ɓaa kɛ a: Hadasa. Ɛstɛrə gaa nuą daa wɔlɔ kɛ haa, di haa pulu ɓə Mardose ə gulɔ la ɉu. Nɛ̨ɛ̨non tii lɛlɛɛ kpɔ kɛ a neelee.

⁸ Ɓɛlɔwai di tɔɔmun nwɔ mɛ̨nį tii kwəi mɛ̨nį hukulɔ mun la, di nɛ̨ɛ̨lɛa tamąą ŋąąkpɔn Susə daai; Ɛstɛrə ə kɛ nɛ̨ɛ̨lɛai tii lɔwai, yaa kpɛli di ɉəɠə də li la dɔɔ kwəlii, di dɛɛ Hege ŋɛ̨i kɛ a gbɛtɛkpuwulu, bɔ; yai kɛi ɲɛ̨i kɛ nɛ̨ą diɛ.

⁹ Ɛstɛrə wɛli ə too Hege ɓa, ə nɛ̨ɛ̨ mą ə mąą yili hɛnŋąą tɛɛ bɔ, da mąątí hɛnŋąą. Ə pənə ə dɔɔ pɛlɛ́ mu nɛ̨ąą nu mɛ̨ihveelɛ həɠə ɉu, ə Ɛstɛrə tɛɛ di pɔ, diɛ mąą yili. Di bɛlɛ nɛlɛɛ mun dɛɛ Ɛstɛrə da nwɔ nɛ̨ąąi di pɔ.

¹⁰ Ɛstɛrə hvo ɉuwu laa ɓo nu ta ɓa. Mąąhɔlɔɓo, Mardose ə kɛ mą: Hvo ə́ huwu hvaa ɓo.

¹¹ Mardose nwɛi, hvolo kəlee, ɓɛi ŋɛ̨i di kɛi nɛ̨ąą mąą yili laa, ə kɛ lɔ laa gwəlii yɛ tɛ̨ɛ̨tɛ̨ɛ̨ ɓo, akɛ Ɛstɛrə kɔ́lɔi pɔ̨nɔ̨ɔi, gili ə kɛ ɉu; ɛlɛɛ, pələi mɛ̨nįɠaa kaa pai kpɛɛi la, ə gaa.

¹² Kwɛlan dɔ̨nɔ̨ ɓə di gɛ, diɛ di kɛ pələ pɛli, ɲąnin mɛ̨ida yee mu di kɛi mirə wulɔ kun nɛ̨ɛ̨ɠaa lɔ diɛ, ɲąnin mɛ̨ida, diɛ mąątí hɛnŋąą takpɛliɠaa kɛ diɛ. Yili tɛɛ pulu, nɛ̨ɛ̨lɛai tii kəlee tɛitɛi di kɛi li diɛ yii tɔɔmun Asuerusə pɔɔli.

¹³ Ɓɛlɔwai nɛ̨ɛ̨lɛa tii daa kɛi kulɔ la nɛ̨ąą mąąyili pɛlɛ́ mu, diɛ li tɔɔmun nííla, yii kpɔ di mąą kpaan gaa mą da dɛɛ di pɔ.

¹⁴ Di kɛi li tɛitɛi, a yələwulii, yələ a bɔ, nɛ̨ąą mąą yili pɛlɛ takpɛli ə kɛ laa, da li a diɛ laa Saasgazə, yai kɛ a gbɛtɛkpuwulu, yaai kɛi ɲɛ̨i kɛ tɔɔmun nwɔ wɛliɠaai diɛ, di dɛɛ bɔ, ə ɲɛ̨i kɛ mą. Mąąnɛ̨ɛ̨nu hva kɛa pənə hvo li tɔɔmun bɔɔli, akɛ nwɛli hvo tooli tɔɔmun ma, hvo pənə hvo dəli.

Di bɛlɛ́-lee-nɛ̨ą laa tɛɛ Ɛstɛrə pɔ

¹⁵ Ɉɛnŋąą ŋɛ̨i Hege, yai kɛ a gbɛtɛkpuwulu, yɛ ɓo nɛ̨ąą mąą yili pɛlɛ́ nwun na, ə mąą liɛwoo kɛ Ɛstɛrə ɓa, yai a Mardose gala Avihailə lon, yili lɔ ɓə Ɛstɛrə ə ɉu hvɛli. Nuąi kpɔ kɛi Ɛstɛrə kaa, nwɛli ə kɛi too diɛ.

¹⁶ Mɛ̨nįi tii ə kɛ, a tɔɔmun Asuerusə nwɔ tɔɔlaa gwɛlan mɛ̨ihveelɛ lɔwai, ɲąnin bow nąąn, a ɲąnin ŋɛ̨i da kɛ mą Hebreu woo hu Tevɛtə ɉu. Nąąlɔwai ɓə Ɛstɛrə ə li la tɔɔmun bɔɔli.

¹⁷ Ɛstɛrə wɛli ə too tɔɔmun ma, ə tɛɛ la nɛ̨ąą yiiɠaa tii diɛ; Ɛstɛrə ə tɔɔmun niihon ə tɛɛ nɛ̨ɛ̨lɛa yiiɠaa tii kəlee diɛ. Tɔɔmun ə nɛ̨ɛ̨ mą, ə bɛlɛ́-lee-nɛ̨ą ɓɔlɔ lɔ Ɛstɛrə nwuɔ̨, ə ɉee a tɔɔmun nɛ̨ą, a Vasti mąąhvalin.

¹⁸ Tɔɔmun ə pənə nwɔ̨nɔ̨ ə ɓɛlɛhee takpɛli kɛ nwɔ ɲɛ̨itɔwɔ nuą da ɲeemu nuą di mąą mɛ̨nį ɓa, Ɛstɛrə laa hu. Ə nįįhɔ̨nwɔ̨ mɛ̨nį ta kulɔ mą goɓitaaɠaa kəlee hu nuą diɛ; ə nɛ̨ɛ̨ mą ə tɔɔlaa hu mɛ̨inɛ̨ɛ̨ kɛ nuą diɛ.

¹⁹ Ɓɛlɔwai di kɛi nɛ̨ɛ̨lɛa ɲąąkpɔn na a veelɛ naa, Mardose ə kɛ heeni tɔɔmun yəi bɛlɛ́ laaləi.

²⁰ Ɛstɛrə hvo ɉuwu həɠəi lɛ nui lɔpee ta ɓa; mąąhɔlɔɓo, bələ ɓə Mardose ə mąąliɛwoo kɛ la mą, ɛlɛɛ, Ɛstɛrə kɛɛ tɔɔmun ɲəi bɛlɛ́n, ə kɛi Mardose hon yɛ bələi lɔ ə kɛi gɛ la a bɔlɔ.

Mardose ə nɔgilii kɛ nuą hon

²¹ Nąąlɔwai tii Mardose ə kɛ heeni tɔɔmun ɲəi bɛlɛ́ laaləi, gbɛtɛkpuwulu hveelɛ diɛ ɓaa: Bigtan da Tɛrɛsə; di kɛ a tɔɔmun nwɔɔɠaa; diɛ ɓə kɛi bɛlɛ́ laaləi mąąkpɛ. Nu hveelɛi tii di lɔ tɔɔmun mąą kili; diɛ kɛ di baa. Mąąhɔlɔɓo, aa kɛ di liikələn di kwəi.

²² Mardose ə mɛ̨nį tii kpaɠala kaa, ə nwoo hukulɔ tɔɔmun nɛ̨ąą Ɛstɛrə ɓa; yili ə li, ə mo tɔɔmun ma a Mardose laa.

²³ Yii kɛa di mɛ̨nįi tii hu pili, di gaa a tɛ̨ą, di gbɛdɛgbuwulu hveelɛi tii hɛlɛn wulu ɓa. Di nɛ̨ɛ̨ mą, di mɛ̨nį tii pɛ̨ɛ̨ bɔlɔ kiliin ɉɛɓɛ́ hu, tɔɔmun ɲɛ̨i ɓa.