Kilikɛɲəi 1 - Yálá laawoo hɛɓɛ (dc)

Nukan nwɔ yɛnɛ̨ɛ̨ ɲąąkpɛɛi Yɛnɛ̨ɛ̨ nwun dɔɔi ɓaa tələnmolaa

¹ 'Ká tələnmolaa wɛlilakɛ, kaai a lɔi ɲąąwooɓonuą, 'ká ka kiliŋąhiɛ Nąmu mąą mɛ̨nį hu a ɉaŋąą, 'ká gwɛli a ka kwəi kwelɛɛ.

² Mąąhɔlɔɓo nuąi di hva too mu, a gbɔwɔ lɛɛ laa yiliɠaai diɛ gaa, nuąi di hva lənə di kili tɔɔi mą, a gbɔwɔ lɛ diɛ.

³ Kiliŋąhiɛɠaai di hvo haŋąn li, da nu mąąkulɔ Yálá ɓa, ɛlɛɛ, kilikpɛɛgwəi nuąi da toɔ nwɔ Heeɓolaa mu, di ɲɛ̨i a paa.

⁴ Kilikɛɲəi hva lɔ mɛ̨nį ɲɔ̨n gɛmun gili hu, hva daa tɔɔ, kɔlɔi nɛ̨ŋɛ̨n ɲee kɔn ma, ɉu.

⁵ Nuą tənəndɔɔ kili mąąhəɠɛɛ, a lɛɛ mɛ̨nį mąąlaa, a mąą kwea ɓowo kiliŋąhiɛɠaa diɛ, wea mɛ̨nį a pa, a mąąkwɛa nąą ɓa.

⁶ Kilikɛɲəi kaa a kilii gaa mɛ̨nį lɛlɛɛ pɔ, hva laapələɓomun nɛɛ laa lɔ tii, yii hvo ɉu tɔɔli; hvo gaai Yálá kaa a gookpala mɛ̨nį kəlee mąą kɛla, a gwəi kili kəlee hu kpɛɛ tɛ̨ą hu. Ɛlɛɛ, nwəli kanąnŋąą vaa woo ɓa.

⁷ Tɛ̨ą li, Hɛn Gəlee Nąmu nwɔ kili a lɔi laa hvɛɛ, ɛlɛɛ yɛnɛ̨ɛ̨ kəlee kɛɛ mɔ̨ɔ̨ ɲee ŋą́, wooi lɔpee a tɔɔ, ə gɔlɔn.

⁸ Yili mɛ̨nį ɓa, nui lɔpee a woo ɲɔ̨n ɉaa, hva pɛli kulɔi ɉu, nuą hutɔɔ kitii hvo pai hvolói mą.

⁹ Nui hvo Yálá pɔ, kɛɛmąąni kaa pai hvilɛnɉii gwəi kiliɠaa diɛ, nwooɠai a di ɓo, di kaa pai həlii Nąmu ɓa; nwɔ túwɔ pələ ɲɔ̨n mąą kɛlaɠaa li.

¹⁰ Tóló kulɔmun nwəli a mɛ̨nį kəlee mąn, ə mą kɛ, niinwələən va tɛɛ mą.

¹¹ A kɛ ti kani, niiwoo ɓoɔ lɔ tii, nwun və mą, 'ka ɓo yili ɓa, 'ka ka yee kɛ ka laalei ɓa, ka hvo nee pa laamąąhiɛ kɛ, wooi da mo a loo pələi, hva lɛɛ lɔ tii kpɛli kpɛli. Nui a nu laa kala a lɛɛ, a nu nįí paa.

¹² 'Ká hvo haa kwɛli a ka wɔ yɛnɛ̨ɛ̨ kɛli ka mo lan bələ mɛ̨i, kaa kpįnįi lee ka kɛ mɛ̨nįɠaa di hvo ka nwun nɔ ka nwun na pili mɛ̨nį hu.

¹³ Yálá nwɛi, ya hvə haa kulɔ, nukan nwun na pili mɛ̨ni, hva gwəinɛ̨ɛ̨.

¹⁴ Gbala ə tɔɔ, ə hɛn gəlee pɛli, diɛ pɛli kɛli yɛnɛ̨ɛ̨ hu, ɛlɛɛ ɓɛ yɛnɛ̨ɛ̨ lon gaa mɛ̨nį a kɛli hee gee la, yili kaa a yɛnɛ̨ɛ̨ laatɔn mɛ̨nį. Nu paa hɛn hvo yɛnɛ̨ɛ̨ hɛn da hu, (a) ɲąmuątaa nwɔ heeɓolaa hvo lɔi mɛ̨i.

¹⁵ Gbala ə tɔɔ, tələnmolaa hva pɛli haai.

Nu ɲɔ̨nwɔ̨ɠaa di wɔ kiliŋąhiɛ

¹⁶ Kɛlaa nuąi di hvo Yálá pɔ, da kɛ haa təlii a di yee da di hvaa woo, da diɛni diɛ too nɛ̨ɛ̨laa hu, diɛ di lii pɔ kɛlɛ mą, yili pulu da diɛni diɛ mįnɛ̨ həɠə, yili mąą mɛ̨nį ɓa mąąnɛ̨ɛ̨i kpɔ da diɛni di tɔɔi ə kɛ taanɔ̨n.