Barukə 4 - Yálá laawoo hɛɓɛ (dc)

¹ Kili kɛ ɲei, Yálá nwɔ tiɓóɠaa ɉɛɓɛ́ li; dɔn nwooi laa a yələ kəlee mɛ̨nį, yaa li, nuąi kpɔ da laŋąn mą, di kaa pai yíi yɛnɛ̨ɛ̨ hɔlɔɓoi, kɛlaa nuąi da di pulu tinɛ̨n mą, di kaa pai haai.

Ka gu kilikɛɲəi kwɛli

² 'Yalə ə pulu Ɉakɔbə, ə́ ɉon; 'li kili pɔ pələ, ə́ nwɔ kɛɛ ponoi laakwiɛn.

³ Hvó ə́ mąąɲinɛ̨n dɛɛ nu takpɛli pɔ, hvó dɔlɔ tɛɛ lɔi takpɛli pɔ.

⁴ Kuɔi ŋɛ̨i a Israɛlə nuą, ku nwun na kpɔ-kpɔɔ nɛ̨ɛ̨ ɓə, hvo gaai, kwa pɛli mą ku Yálá liiɓa mɛ̨nįɠaa kɔlɔn!

Ɉerusalɛmə líilaa mɛ̨nį Gɔluwɔɠaa líilaa woo

⁵ 'Ka ka liikpələ, kaai a nwɔ nu huwu, yɛi a Israɛlə laa hɔnmo yɛnɛ̨ɛ̨,

⁶ di ka lɔwɔtɔɔi halə pulu lɔiɠaa diɛ, kɛlaa di hvo gɛ li ka hu kala mɛ̨nį ɓa, Yálá liiholi ɓə ka mo, ya ɓə gɛ diɛ ka too ka yowoɠaa yee ŋą́.

⁷ Ka liiholi hee ká pɛlimun ma, a halaa kulɔi ka kɛli mo ɓilihiɠaa diɛ, ɛlɛɛ ka hvo kɛli gɛ Yálá ɓa.

⁸ Yálái laa, yai ka kulɔ ɉu, kaa kɛ lɛ̨ą mą, kaa nwɔ̨nɔ̨ liikələngwəi hee Ɉerusalɛmə ɓa, yai ka ɲąąkɔn.

⁹ Ə Yálá nwɔ liiholi kaa yɛ ɓɛla ka mɛ̨i, yɛ kɛ diɛ: «'Ka ka wəli tɔɔ, Siɔn nɛ̨ąą; Yálá aa liiɲąnwaną kɛnɛ̨ hee mą́ą́.

¹⁰ Hvo gaai, Yai Gaa Lɔ Laa, nuwɔlaai ə naa nón ɉinąą, da nón nɛ̨ąą nwuɔ̨, ɲɛ̨́i ə tɔɔ ɉu.

¹¹ Ŋą́ kɛli di ɲąąkɔn a kwəinɛ̨ɛ̨, kɛlaa, ɲɛ̨́i ə kɛ diɛ, diɛ li, ɲɛ̨́iyá da mɔ̨nɔ̨ hu.

¹² Nu ta hvo kɛ gaa kwəinɛ̨ɛ̨ kulɔi, mąąhɔlɔɓo gáá a kalanən, nu tamąą daa nɛ́ɛ́ laa. Ŋą́ą́ lɛɛ a gbóloon nónnii di wɔ nɛ̨ŋɛ̨ŋaai mąą mɛ̨nį ɓa, mąąhɔlɔɓo, di di mąąkwea Yálá nwɔ tɔn, nwoo ɓa.

¹³ Di hvo nwɔ tíɓoɠaa kɔlɔn ni, di hvo Yálá nwɔ tíɓoɠaa pɔ yíi ɓo li, di hvo hvilɛn ni mąąkwɛli pələ mɛ̨i, tələnmo laa hu.

¹⁴ Siɔn mɛlaa nɛ̨ąą, di pá! Nuwɔlaai Yai Gaa Lɔ Laa, ə nón ɉinąą da nón nɛ̨ąą lɔ ɉu, ka ka kiliŋąhiɛ mą.

¹⁵ Mąąhɔlɔɓo, nu huwui həɠə kweala, ə ɲąątɔɔ diɛ, a nu huwui ɲɛ̨i tɛɛ, woo takpɛli ə ɓo na, di hva hilɛgolo mąąwiɛ, di hva lokolo mąąwɛli kaa,

¹⁶ də li a kalanən nwɛlikɛmąą lonnii, di nɛɛ dɔnɔ̨ kon ɉu, a non nɛ̨ąą kulɔi di mo ɲəi.

¹⁷ Kɛlaa, ŋą́ pɛli ka mąąkpɔnmąąɓo pələ kɛ ləi?

¹⁸ Nui mɛ̨nį wala-walaɠaai tii laa kaa, ya ɓə pai ka kulɔi ka yowoɠaa yəi.

Ɉerusalɛmə kaa nonnii líilaai

¹⁹ 'Ka li nónnii, 'ka li! Nwɛ́i, gáá lɛɛi gbɔ́wɔ ɓa, ɲą́ą́ dɔnɔ̨.

²⁰ Ŋą́ą́ liilaa həɠə kulɔ gwáną, ŋą́ą́ nɛ̨ɛ̨mąąhvə ɓiihaɠa too, gáá pai wɔlɔi Yai Gaa Lɔ Laa mą, nwɔ́ yɛnɛ̨ɛ̨ kəlee yeemu.

²¹ 'Ka ka liikpələ, nónnii! 'Ka tómą Yálá pɔ pələ, gaa pai ka kulɔi ka yowoɠaa di wɔ hee mɛ̨i laa yəi.

²² Nwɛ́i, Yai Gaa Lɔ Laa ɓə gílitɔɔ mą ka ɓalo mɛ̨nį hu, ɛlɛɛ yai a Mąąhəɠəmun aa gɔ́ a kwəinɛ̨ɛ̨, ká ɲɛ̨imąąwɛli kaa yələ pa hiɛ ka tii, yɛ həɠə Yai Gaa Lɔ Laa ka ɓalomun bɔ.

²³ Mąąhɔlɔɓo, ŋą́ą́ ka lɛɛ laa, kaa li ɲɛ̨́iyá da mɔ̨nɔ̨ hu, kɛlaa Yálá a pɛli ə ka tɛɛ bɔ́, kwəinɛ̨ɛ̨ hu da yɛ́lɛ́, a yələ kəlee mɛ̨nį.

²⁴ Bələi lɔ Siɔn mɛlaa nɛ̨ąą di kaa ka kaai la luwɔlaa hu, bələ lɔ ɓə ɉu hvo kɛa kwea li, di kaa pai ka ɓalo mɛ̨nį kaai la, yɛ həɠə ka wɔ Yálái pɔ; ka ɓalo mɛ̨nį a həli kaa a mąąɲinɛ̨n gɛnɛ̨ɛ̨, Yai Gaa Lɔ Laa nwɔ kɛɛpónó hu.

²⁵ Nónnii ka ka yee hee a liilaa niiholii həɠə Yálá pɔ, mu; ka yowo ə hvilɛn ka pulu, kɛlaa ɉu hvo kwɛali, kaa nwun napilii kaa, yɛ́ ə́ kɔwɔ tɔɔ gɔn bulu.

²⁶ Nón-dalaɠaa daa hiɛ kwɛni pələɠaa hu, di di həɠə yɛ taatɛlɛɛ, di yowoɠaa ɓə di wean dii a yee tɛɛ mąą laa.

²⁷ 'Ka ka liikpələ nónnii, 'ka tómą Yálá pɔ pələ, mąąhɔlɔɓo, nui li a kaa gɛɛnąą tii ɓa, gaa pai gili lɛɛi ka hu.

²⁸ Bələi tii ka kwəi kili ə kɛ a mąąkweala Yálá ɓa, ka ka hɔn mąąpənə, kaa gwɛli geemɛ̨i pow pow.

²⁹ Mąąhɔlɔɓo, nui mɛ̨nį ɲąąnwąnąɠaa tii laa kaa, a pənə ə pa ka pɔ a yɛ́lɛ́ da kwəinɛ̨ɛ̨, a ɲələi a ka ɓalo la.»

Ɉerusalɛmə líilaa woo

³⁰ 'Ə́ liikpələ Ɉerusalɛmə! Nui laa tɛɛ ə́ pɔ, gaa pai ə́ lii laai.

³¹ Nuąi ə́ mɔ̨nɔ̨ɓoi, diɛ kwəinɛ̨ɛ̨ kulɔ ə́ too mɛ̨nį ɓa, di nɛ̨ŋɛ̨n naa ɓə.

³² Daaɠaai ə́ lonnii kɛ a luwɔɠaa, di nɛ̨ŋɛ̨n naai ɓə! Daai ə́ lonnii di kɛ ɉu, nɛ̨ŋɛ̨n naa!

³³ Mąąhɔlɔɓo, bələi tii ə kwəinɛ̨ɛ̨ kulɔ la ə́ too mɛ̨nį hu, yɛ ə́ pu mɛ̨nį mąąkwəinɛ̨ɛ̨ kulɔ, bələ lɔ ɓə nii kaa pai yali la gwəi a ɉu kala pələ.

³⁴ Nu kpulu kɛnɛ̨i tii gaa nwun dɛi ɉu, ŋą́ gulɔ ɲəi, ŋą́ nwɔ ɲɛ̨i pili yələi mąą pənə a mɔ̨nɔ̨.

³⁵ Mąąhɔlɔɓo, Yai Gaa Lɔ Laa kaa pai nwɔ̨n bui ɉu, a hvoló tamąą mɛ̨nį, ɓilihiɠaa diɛ di taa tɔɔ laa a ɉu kweaa dɛɛ yili ɓa.

³⁶ 'Ə́ ɲɛ̨i hee hvoló ɓəlai bələ, Ɉerusalɛmə, gwəinɛ̨ɛ̨ Yálá kaa dɛɛi yɛ́, ə́ gaa.

³⁷ Diɛ ka tii pai, ə́ lonnii tii ə́ di kaa diɛ lii, di kaa pai Mąąhəɠəmun nwoo ə di ɲąąkpɔn, diɛ həɠə hvoló ɓəlai bələ, yɛ həli la volo tooi bələ, diɛ kwəinɛ̨ɛ̨ kulɔ Yálá mąąɲinɛ̨n mąą mɛ̨nį ɓa.