Barukə 3 - Yálá laawoo hɛɓɛ (dc)

¹ Hééɓo Kəlee Nąmu, Israɛlə nwɔ Yálá, nui nii yaliɛ gwəi, ɉupuɔ mą a mɔ̨nɔ̨, ya ka ŋɛ̨i tómai ə́ pɔ pələ.

² 'Ə́ wəli tɔɔ Nąmu, ku mąąwɛli kaa, kwaa nɛ̨ŋɛ̨n ɉəɠə yɛ́;

³ ə́ wɛi, ə́ kaa laa a yələ kəlee mɛ̨nį, ɛlɛɛ kuɔn, ku nwun na aa pili a yələ kəlee mɛ̨nį.

⁴ Yili mąą mɛ̨nį ɓa Hééɓo Kəlee Nąmu, ə́ ɓo a Israɛlə nwɔ Yálá, Israɛlə lonnii daa haa, ə́ wəli tɔɔ di wɔ hvɛli woo ɓa, nuąi nɛ̨ŋɛ̨n ɉəɠə yɛ́, di lonnii li, di hvo di wəli tɔɔ li di Nąmu Yálá woo ɓa, yili ɓə gɛ mɛ̨nį ɲąąnwąnąąɠaa diɛ yili kuɔ.

⁵ Ku nąnni di wɔ wɛa túwɔi kili hvo lɛɛ ə́ ɲą, kɛlaa mɛ̨nįi ɲɛ̨i hu, ə́ kili hvilɛn ə́ hvaŋą da ə́ laa ɓa,

⁶ mąąhɔlɔɓo, yɛ́ ɓə a ku Nąmu da ku wɔ Yálá, ɛlɛɛ, kwa ə́ laa tɛ, ku Nąmu.

⁷ Yili mąą mɛ̨nį ɓə ə́ ə́ wɔ ɲɔw mąą laa lɔ la ku hu kuɔ pɛli ə́ laa hvɛlii. Ku kaa pai kɛi ə́ laa mąąwiɛi, ku mąąkilɛ lɔi hu, mąąhɔlɔɓo kwaa ku kili həɠə ku nannii tii nɛ̨ŋɛ̨n ɉəɠə yɛ́ di wɔ huwu mɛ̨nįɠaa pulu.

⁸ Kuɔ ka, ku kaa háákələi mąąkilɛ lɔi ŋɛ̨i hu, ɓɛi ə́ ku taɠaa taɠaa laa, ku ɓo a mɔ̨nɔ̨ da nɛ̨ŋɛ̨n di laa lowo, kuɔ pɛli ku hɔn mąą pənəi, mąąhɔlɔɓo ku nąnni di wɔ tuwɔ pələ ɲɔnɠaa kəlee ɓə gɛ kuɔ həɠə ku Nąmu Yálá pulu.

Mɛ̨nį kɔlɔn gili hu kpɛ mɛ̨nį Israɛlə aa kili kɛnɛ̨i yá nwuguloi lɛɛ laa

⁹ Israɛlə, ə́ wəli tɔɔ yɛnɛ̨ɛ̨ laahɔnmo tɔnŋąą ɓa, ə́ ə́ wəli haŋąn gbɔ yɛ́ pɛli mɛ̨nį hukpɛ kili hɔlɔɓoi.

¹⁰ Lə ɓə kɛ Israɛlə? Yai ə́ kaa ə́ yówóɠaa di wɔ lɔi hu? Gɛ pələ kaa ləi yai ə́ kaa pɔlɔi nwɛ̨ą lɔi hu?

¹¹ Lə ɓə kɛ yai ə́ ə́ kpɔwɔ mąąliɓi a nu pɔwaɠaa? Gɛ pələ kaa ləi yai ə́ kaa nuąi daa yɛɛ ɲɔmąątaa di lɔwai?

¹² Yáá həɠə kilikɛɲəi yá nwungulɔi.

¹³ Ə li kɛ ə́ lɛɛ Yálá nwɔ pələi mɛ̨i, ə́ li kɛ heeni yiihu liilaa yɛnɛ̨ɛ̨ hu, a yələkəlee mɛ̨nį.

¹⁴ Ɓɛi mɛ̨nį hukpɛ kili kaa laa da huwalawalalaa da mɛ̨nį kɔlɔn gili, nąą kwɛli, yɛ́ pɛli yíipoo da yíi yɛnɛ̨ɛ̨ kɔlɔnɉi, da ɓɛi ə́ ɲɛ̨ikɔw nwɔ kɛɛpono kaa la, da liilaa.

Nu ta hva pɛli kilikɛɲəi kɛli gaai

¹⁵ Gbɛɛ ɓə kili kɛ ɲəi hee taa kɔlɔn, gbɛɛ ɓə aa ɲəi hɛngɔwɠaa hɔlɔɓo?

¹⁶ Nɔi ɲąąwooɓo nuą kaa minɛ̨, da nuąi da lɔwɔ huwɔɠaa hutɔɔ?

¹⁷ Nuąi kɛli pə́lə́ kɛ a yələi nwɛ̨niɠaa di kaa minɛ̨? Ɛlɛɛ wali da hɛni tiɛ̨nuą gii mɛ̨i, a ɉɛnŋąą ti nuą da di kili tɔɔ diɛ, ɛlɛɛ, kpɛɛ hvo kɛ di yəi hɛn ma?

¹⁸ Nuąi da wali yɔw a yɛlɛ kɛ̨nɛ̨ di yeepɔɔ lɛlɛɛ, di wɔɔ?

¹⁹ Daa di ɲąąyíi, daa yɛɛ ɲomąątaa nu takpɛliɠaa daa tɔɔ di tɔɔi.

²⁰ Muhəɠə ninɛ̨ɠaa di hvoló kaa, di di wɔ yɛnɛ̨ɛ̨ kɛ, kɛlaa di hvo mɛ̨nį kɔlɔn gili nwɔ pələi kɔlɔn ni,

²¹ di hvo di ɲɛ̨i laa li la, lɛapɛlɛɛ di di mąąkwɛa di nąnni kpaaləɠaa diɛ.

²² Di hvo kilikɛɲəi woo mɛ̨n, ə mą kɛ, Kanaan lɔi hu, di hvo gaa li Teman;

²³ ə mą kɛ Agarə lonnii, diɛi ti kɛli kili kwɛli ɓɛ yɛnɛ̨ɛ̨, Meran da Teman yɔw ɓəlaa, hon ɉɔɔ nuą da kili kwɛli nuą, di hvo kilikɛɲəi nwɔ pələi kɔlɔn ni, gbaaləɠaa kili hvo lɛɛ li di ɲa.

²⁴ E kə Israɛlə! Gɛnɛ̨ɛ̨ ɓə e, Yálá nwɔ pɛ́lɛ́, ɉu kɛnɛ̨ɛ̨ ɓə e, Yálá nwɔ lɔi!

²⁵ Gɛnɛ̨i, gbəlai və mą, gweai, ɲɛi və mą!

²⁶ Nąą ɓə di kpakólóɠaa kaa laa, diɛi ti kɛ laa a yɛnɛ̨ɛ̨ kɔwɔ tɔɔ yələ; di yee muhəɠɛɛ, di wəlɛɛ kɔ hu.

²⁷ Diɛ hvəi Yálá ə di həɠə ɉu, diɛ hvə ə mɛ̨nį kɔlɔn gili pələ lɛ diɛ;

²⁸ di haa, mąąhɔlɔɓo di hvo kɛ mɛ̨nį ta kpaɠala kɔlɔn.

²⁹ Gbɛɛ ɓə tɛ yələi, ɲee yɛ pɛli kilikɛɲəi ɓa, yɛ gulɔ tulɔ kpįnįn ɉu, yɛ ɲɛɛ?

³⁰ Gbɛɛ ɓə li gboloya pulu pələ, yɛ gaa laa, yɛ ɉɔnwɔ kulɔ a hɛni hu waa, yɛ paa la?

³¹ Nu ta hvo bələ kɔlɔn, nu hvo man bɔ hvo hvilɛn bələi ti mɛ̨i.

Yálá yaa tanɔn ɓə kili kɔlɔn aa dɛɛ Israɛlə pɔ

³² Kɛlaa nui mɛ̨nį kəlee kɔlɔn, ə gɔlɔn ə gɛi kaa a gbɔ kpɔɔ kili, ə lɔi laa a yələ kəlee mɛ̨nį ə naa hvɛɛ a huwɔɠaa.

³³ Ya ɓə a kɛɛpónó tí, yili yɛ nɛɛ mą yɛ li, ya ɓə a dəli, yili yɛ lɛɛ nwoo mu, a ɲɔw.

³⁴ Pɛmɛ̨lɛ̨n-gɔwɠaa da yíi a di ɲɛi, diɛ lən, di ɓo kwəinɛ̨ɛ̨ hu.

³⁵ A di təli, diɛ mą: «Kuɔ ka!» Di kɛli lən a kwəinɛ̨ɛ̨ di pɛli Yálá ɓa.

³⁶ Ya ɓa a ku wɔ Yálá, ɛlɛɛ, da kpɛli hvo nąą, ə kulɔ bulu.

³⁷ Bələi kpɔ a hvilɛn mɛ̨nį kɔlɔnŋąą ɓa, aa gaa, ɛlɛɛ ya ɓə nɛ nwɔ tímun Ɉakɔbə ɓa, da niiɓamun Israɛlə.

³⁸ Bələ ɓə nuą di gaa la yɛnɛ̨ɛ̨ ɓɛ, yɛ yɛnɛ̨ɛ̨ kɛ nu kanŋaa lɔwai.