Yosue 5 - BII BILA

¹ Lɔ́ɔ́ masaa Amoriaa va icali Yurdɛn leeloo a ba paalen le del-lo-a a masaa Kanaŋaa va icali o mɛmma ihɛllan kɔngɔ-a kpow a tuei maa Mɛlɛka veesiaa peo Yurdɛn Israɛlla laci háá ma taŋ-ndo, má vu diallon, a sɔla lɛ mayoomu le Israɛlla simullo le.

Israɛlla dii toomaa Kilkal

² O telen kon, mí Mɛlɛka dimul Yosue aa: «Cua pow kàlà-kálàá ma cɔw mɔɔn, ma dii lambi diinndɔ Israɛlla ha tooma.»

³ Mí Yosue toosiaa powvo, mó kɔ dii lambi diinndɔ kon tooma o pembii nda ke diolan aa Pembii Toomai-ye coo.

^4-5 Telen Israɛlla va faŋanndo Esipte-o, vanpiaandua ndáà tiiya nin telen kɔaa o cɔwvo-a ndáà cii nin toomaa diyɔɔ, kɛ mí nda kpow a kei vu o lɛŋnde veselɛilen nin. A kei violɔn o lɛŋnde veselɛilen nin-nda ndáà dii-yɔ tooma le, lelan Yosue dii nda tooma ni.

⁶ Vɔsilan belehiɔɔlu, Israɛlla va hiŋnɔnndo o lɛŋnde veselɛilen nin. O vɔsila lan mɛɛlulan, mí vanpiaandua fula Esipte-a, áà nɔla nin cɔwvo tosaa-a cuu vu kpow le kɛɛ nda kɛɛ sɔɛi Mɛlɛka-e biyɔɔ-o. Kani mí Mɛlɛka mɛnalan nda maa nda cinin lɛŋnde o yiilu fuɲaa ndaa mamaa kpemaa le nda len keo len te, lɛŋnde cɔlua a tɔlɔɔlan la naŋ nin taw-taw len pɛɛn.

⁷ Mí Mɛlɛka luei poaa ndaa o fonda ndaa, à Yosue kei tooma diyɔɔ-a pɛɛn, kani ndáà dii-yɔ nda tooma lɔ́ɔ́ nda va hunɔɔ-o le.

⁸ Lɔ́ɔ́ nda cii vanpiaandua kpow tooma diyɔɔ-o, má lo o dɔ́ɔ́ngɔ́ kon nin háá má siangu.

⁹ O kon mí Mɛlɛka dimul Yosue aa: «I cii hau siɛmbulan Esipte faŋa niaa o lebol few.» Lelan nda ke fonda kon diolan ni aa Kilkal. Kandɔɔ ɲinkon háá paalen nden, diola lan fonda kalaa nɔ ni.

Kafo-hiavaa-coo tosan Kilkal

¹⁰ Mí Israɛlla cal Kilkal, má tosa kafo-hiavaa-coo o paale tɔ́ a lehiɔɔlundɔlen icɔllo o paangii ken nin o dɛɛlalan Yeriko nin.

¹¹ Kafo kon cuvɔɔ diimandɔɔ, má dia niko ɲɛm dian va o lɛŋnde len nin-ndon, bulu toosian a lɛvɛn too a kulun toaŋan.

¹² Mɛɛ nda de dɔ́ɔ́ ɲɛm dian va o lɛŋnde len nin-ndon, diimandɔɔ manne ve lɛ le. Manne ve lɛ le nda le, kani vɔsi kon, má dia ɲɛm dian va o lɛŋnde Kanaan-nden nin-ndon.

Simlacinɔ vanaa cɔvaa Mɛlɛka-a

¹³ Lɔ́ɔ́ Yosue sɔɔnguu Yeriko ciee-lekɔɔ-o, mó heelu hɔlla, mó ca vanndo pum isisi ndu laci, mɔɛi cɔwve va vana kon o ba, i ve o boo nin te. Mí Yosue sɔɔnguu ndu ikɛi, mó ɲuna ndu aa: «O kunda naa coo n co ni baa o kunda yaamɔaa naa coo?»

¹⁴ Mí vana kon muli aa: «I co o kunda kɛ́-kɛ̀ coo le. Ya co simlacinɔ vanaa cɔvaa Mɛlɛka-a ni, hunɔɔ koni ya co nuaa ni.» Mí Yosue del o kuumbuan ndu o hɔl, mó dimi aa: «Yɛɛ nɔm vana ni bɛndoo nɔ yɛ le ya vana nɔm baalaa dimullo?»

¹⁵ Mí simlacinɔ vanaa cɔvaa Mɛlɛka-a mulul Yosue aa: «Solin samtalan o n'pelu, kani fonda n sim hoo coo-o, fonda diandaa o co ni.» Mí Yosue tosa lende.