Biblia Todo Logo
Bib sou entènèt

- Piblisite -

Yeremi 9 - BII BILA


Vanaa hiowba a còòlan dimio-a

1 Màá yáà kɔnnun ko o lɛŋnde veselɛilen nin, mì yáà kɔ va o pangala vanaa kelaa pɛngi nin-ndan bɛngu, haliko mi yáà faŋan vanaa nia ikɛi, mì yáà kɔ calnun ndon polon. Kani mɛɛ nda co kpede, vanaa lakafaa nda co ni, vanaa suundaa kposon.

2 «Maa kpaasiaa diɛɛmui ndɛi co ni, o co o dɛnɛ sandaa tosaa nin te nda sul n'masa le, a kafalan kposon nda co masalen tosaa ni. A sina vɛlɛ ya le, hiyanndo tuŋ nda co a dɛnɛ vɔɔndo tosaa ni.» Sɔɛi fula ya Mɛlɛka o sondo-e co ken ni.

3 Vana-vana bɛnda mò mandan a puapilɛ ndɔɔ, vana-vana co caan ndɔ toɲa dimul te, kani vana-vana co kafalan tosaa a vanndo pilɔɔ, vana-vana dimi sɔɛi kɛndɛ a caan ndɔ le.

4 Vana-vana co caan ndɔ kafalan tosallo, vana-vana dimi toɲa le. Caa pila nda caa còòlan dimio ni, o kon nda co kɛɔ le muungoo ya o ibuŋ ni.

5 Dɛnnda vɔɔnndan tuŋ nda co hiyanndo tosaa ni, còòlan keiyo dimio má hiaw, a kɛɛ le ya Mɛlɛka sinaa pɛ!» Sɔɛi fula Mɛlɛka-Nɔ-Kpaayaa-Kpow-vo o sondo-e co ken ni.

6 Lelan, o Mɛlɛka-Nɔ-Kpaayaa-Kpow-vo dimi-o co hoo ni aa: «I co nda dindi a yinnden mì soli nda kɔlɔ. Kani mɛɛ celen tosaa co a vanaa nia le!

7 Maa lebɛlɛn diɛɛmule ndalen le co le diyɔɔ ni, còòlan kínɛí la co nda o lasondo ni, sondo yeelɛiyo nda nɔ a caanda ni, kɛ o kɔlta ndalan nin, a co nda yaŋɔɔla nɛyɔnndan hendullo.

8 Sɔɛi fula Mɛlɛka o sondo-e co hee ni aa: «Vɛ̀ɛ̀ i bɛnda mì kpaa vannda ha le dɛnnda lan te? Vɛ̀ɛ̀ i mingul vannda ha mɛɛ dɛnnda ndalan la co yɛ le?»


Telen koŋulaa a telen cɛɛŋuanndo tiiya

9 I yeema mi caŋ, mi cɛɛŋun o pembon coo, mi soli condii biisiei o dɛngbɛla vesɛila co o lɛŋnden nin-ndan coo, kani la ŋɔɛ, vana-vana co lɛ kei lon te, vana tui lɛ cɔlua kundaa diom lon te. Yowva coocoo a visia yondoa piow lon few-few.

10 I minginin Yerusalɛm bémbélan kposon, mì siinguu ndu buulula tunaa yondoa. I tosanin mì kobilan Yuda la lo fondo, vana-vana venin lenin te.»

11 Ɔ́ɔ̀ vana nɔ kɔlkaloo le dɛnndan ndan bilaa biyɔɔ-o? Vana sondo Mɛlɛka-o dimul sɔɔn mun-ndo, o yonda mun! Le yɛɛ lɛŋnden le tambu yɛ, mí le ŋɔa maa lɛŋnde veselɛile vana-vana kei nin te len?

12 Mí Mɛlɛka dimi aa: «Le tùú nda kɛɛ tɔŋ ni yáà yɔngu nda-o biyɔɔ-o, le tùú nda kɛɛ ya nilan yaŋɔɔ, má kɛɛ le diom nuu biyɔɔ-o.

13 Le tùú nda del yiyannda ndala nda pila lan kɔɔli, má kɔa halaa Baal-la kɔɔli, maa mɛɛ fuɲaa ndaa mamaa pɛɛku nda yɛ-o,

14 diom ya Mɛlɛka-Nɔ-Kpaayaa-Kpow-vo, ya Hala Israɛlla dimi-o co hoo ni aa: «I co vannda ha bil loloo ke mà de, mì koesi nda bɔ̀tàá.

15 I co nda sɛŋi vanaa-mangalaa-isɔɔa nda sina le-a tɛɛn, vanaa nda a fuɲaa ndaa sina le-a pɛɛn, o kon mì tol nda kɔɔli a mɔɛi cɔwve háá mi cii nda kpede.»

16 O Mɛlɛka-Nɔ-Kpaayaa-Kpow-vo dimi-o co hoo ni aa: «La keela kɔllo mì la veelu vanlaandua caa caŋndo-a, mì la dimul nda mà hin. La yɔɔ kiilaa vanaa hiow caŋndo caa-a kɔɔli, mà hin.


(Vannda)

17 A keleŋa hunɔɔ mà hun kisu naa lan coo, mì mɛmɛan ma tol naa pulua-pulua, mì ma tol naa maa mamɛn o lahɔl.»


(Yeremi)

18 Kani yeelan a somisominndan la co diomndo fulaa a ba Siɔn-ndo aa: «Kpòkóó dɛnɛ! Mbɔ̀ naa n tambu fɔ́! Siɛmbulan la tol naa kangalan, fɔ mi n mal lɛŋnden nden. Kani a cii calta naalan puusiaa!»

19 Lelan niaa vanlaandua, la yaŋ nilan o diom Mɛlɛka-o, mì nila niaalan la tuei sɔɔn co ndu fulaa o sondo-on. La pɛɛku cuavaa niaa laandua caŋ biisio, la pɛɛkuan caŋ kalaa vellaa-velle aa:

20 «Kani piɔ́mndo hel o diola naala pɔmbɔlan, mó luɛi o cɛila naala sɔvɛlan nin. O co cuaambɔa biwvo o nɛilan coo, a felengia co o bɛ́ɛ̀lan-nda.»


(Mɛlɛka)

21 Dimul nda maa sɔɛi fula Mɛlɛka o sondo-e co hee ni aa: «Vanvílɛ́iya delinin mɛɛ kɔmbɔɔsio co o tiuvaa lɛŋ yondoo nin nuaa yɛ, mɛɛ yasalan la deli vanaa koavaa kɔɔli yɛ, la vana-vana co cɔwviaa le lan.»


Kɔlkalu kpeekpeiyo co Mɛlɛka sinaa ni

22 O Mɛlɛka dimi-o co hoo ni aa: «Vana kɔlkaloo lisan le kɔlkalu ndɔɔ le, vana mayoomoo lisan le yoomuma ndɔan te, vana bolofaa lisan le bolofaa ndɔɔ le.

23 Kɛ vana yeema pɛ le lisanndo, ndu lisan le kɔlkalu o sɔla mó sina ya-o, le sinaa maa ya co Mɛlɛka ni. O co kɛndɛi, dɛnɛ sandaa a sakpoyɛi tosaa o lɛŋnden coo-o, vanaa vaa lende hɛnan ya ni.» Sɔɛi fula Mɛlɛka o sondo-e co ken ni.

24 Mɛlɛka dimi aa: «Paale co hunɔɔ, mì simul vanaa dii toomaa n'faloo daama-a:

25 Esiptea, Yudaa, Edɔmnda, Amɔnnda, Moabua a vanpiaandua sendin kangbalan-nda kpow, á co icali o lɛŋnde veselɛilen nin-nda pɛɛn. Kani vanaa kan kpow a dii tooma le, Israɛlla bɛɛ kɔ̀ndéa nda co o kɔlta ndalan nin ni.»

© Alliance Biblique en Guinée

Bible Society in Guinea-Conakry
Swiv nou:



Piblisite