Yeremi 7 - BII BILA

Laalan lacòòvaa

¹ Mí Mɛlɛka soaa o Yeremi lo, mó dimul ndu aa:

² «Sim o dio cɛi nuu sondoo, mà yonda sɔɛi he, mà dimi aa: «Niaa Yudaa kpow, niaa co keiyo o diolan ndan le luɛyɔɔ, le vulan baŋɔɔ Mɛlɛka o labɛngunin-nda, la yaŋ nilan o diom Mɛlɛka dimi-o.

³ O Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹La bɛɛndiaa kela niaa a dɛnnda niaalan, o kon mì la cal o lɛŋnden nden nin.

⁴ La kɛsi kɔltan o sɔɔn lacòòvan coo mì la dimi le aa: ‹Cɛi-Mɛlɛka-o co nanu ni, Cɛi-Mɛlɛka-o, Cɛi-Mɛlɛka-o›.

⁵ Te la kela pɛ kela kɛndɔɔ, mì la bɛɛndiaa dɛnnda niaalan, te la tosal pɛ vannda a pilɛn-pilɛnnda dɛnɛ sandaa,

⁶ te la saangiaa miallo le, mì la saangiaa vííyo a vanalanɔ pɔnɔ ndɔ vi-o le, te la dii vana tɛɛmbuu isɔɔ loo le, te la mulin halaa celen kɔɔli le niaa pila dɛnɛ palaa tuisinndo coo le,

⁷ mɛɛ i kɛsinin niaa o fonda kon, o lɛŋnde ya yɔngu fuɲaa niaa mamaa le lɔ́ɔ́-lɔ́ɔ̀ a lɔ́ɔ́-lɔ́ɔ̀ len nin.

⁸ Kɛ o sɔɔn lacòòvan n nɛŋi vana ɲɛ-ɲɛ loon coo niaa kɛsi kɔltan ni.

⁹ La co vuilen, vannda diwvo, suundaa, la co mɛɛniannda fondolan, la co Baal sálàlan solullo, la co kɔlan halaa celen kɔɔli, a niaa sina le-a!

¹⁰ La cii pɛ, la mulin hunɔɔ vɛlɛ ya o hɔl, o cɛiyo ho nin, cɛi diola nilan la co veelɔnndo nin-ndo, la dimi aa: ‹N sɔla baŋaa!› A kon kpow, la co hiovɔɔ laci a dɛnnda nɔɔlɛilan tosaa tuŋ!

¹¹ Vɛ̀ɛ̀ buulula vanaa tosaa dɛnnda vɔɔnda cɛi nuu co ni, cɛi diola nilan la co hoo veelɔnndo nin-ndo? Nduyɛ lende ya co ndi cɔu vakpa ni. Diom Mɛlɛka dimi-o co kon ni.

¹² Lelan, la kɔ Silo o fonda ni diandaa, nɛɛ diola nilan la va veelɔnndo o tasendɔ-a, mì la kɔ tofa mɔnɛ ya soli a fonda kon, le dɛnɛ vɔɔn vanaa niaa Israɛlla tosa-o.

¹³ Le tùú niaa tosa dɛnnda lan kpow-vo, sɔɛi fula Mɛlɛka o sondo-e co hee ni. Le sɔɛi ya soo o niaa lo, mí soaa kandɔɔ idiiyo, mí la kɛɛ ya nilan yaŋɔɔ-o, le tùú ya veelu niaa, mí la kɛɛ le cɛlɔɔ-o,

¹⁴ ɲɛ ya tosa a Silo-o, ndu koni ya co tosa a cɛiyo ho ni, cɛi diola nilan la co hoo veelɔnndo nin-ndo, o niaa kɛsi kɔllo coo-o, fonda ya ke kon fuɲaa niaa mamaa a niaa-o pɛɛn.

¹⁵ I toawnin niaa polon, mì la faŋan ya o hɔl mɛɛ ya tow puapilɛa niaa yɛ, polale Efraim-nden pɛɛn.»

Piɛile Hala yeŋnin lani le len

¹⁶ «Nɔm Yeremi yɛ, piɛi le vannda ha le, soli diom le nda le, piɛi le nda le, tɛɛlun ya o lepiɛi nin le nda le, kani i yeŋnin nɔm lani le.

¹⁷ Vɛ̀ɛ̀ a co ɲɛ nda co tosaa o kobilan Yuda nin a o nɛilan Yerusalɛm coo-o cɔ le?

¹⁸ Poaa ndaa tingu pɛ yɔmnde, fuɲaa ndaa mɛndul yinnden, laandaa ndaa linda dɛɔ le toŋɔɔ le masa-laandu co o halataala-o, a le halaa celen sálàla mamɔilan solullo haliko ma tɛɛmbuu ya kɔllo.

¹⁹ Sɔɛi fula Mɛlɛka o sondo-e co hee ni aa: «Mò va maa ya nda co pala ni? O co siɛmbula nda pila lan te nda co dovi kon te?»

²⁰ Lelan diom Maalii Hala dimi-o co hoo ni aa: «I co kɔl ni tuwvo a nɛyɔn co ya nin-ndo pɛngɛla o fonda kon coo, mì tuisi ndu vanndacieea a cɔlua coo, mì tuisi ndu yɔmnde, yondoo a o kulun co lɛŋ-ndon coo maa leyin, mì le lo ŋɔu, le ɲumnin te.»

Vanaa yeŋ Hala ndaa lani le-a

²¹ O Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: «La handu visin sálàla loamaala niaalan o sálàla niaalan coo, mì niaa pila del.

²² Kani lɔ́ɔ́ ya soli fuɲaa niaa mamaa Esipte-o, i ɲuna nda ɲɛ-ɲɛ le, i dimul nda isɔɔ-sɔɔ le ya sálàla loamaa te kon te sálàla celen solul te.

²³ Kɛ ɲɛ yáà dimul nda-o co hoo ni aa: «La tueí ya diom, haliko mi va Hala niaa, mì niaa va vanaa nia. La kela o nɛila ya co niaa cɔmndo lan coo kpow, le mɛɛ niaa sɔla dɛnɛ kɛndɔɔ yɛ.

²⁴ Kɛ a tui ya diom te, a yeŋ nilan te, má del yiyanndan a tuula vɔɔnnda va o kɔlta ndalan nin-ndan kɔɔli, má muungu kɔɔli, a hiw laci le pɛ.

²⁵ Kandɔɔ o paale fuɲaa niaa mamaa fula Esipte len, háá hau, i co niaa vanaa nia baalaa, vanaa-tɛɛngaa-diom Mɛlɛka vimndo. Mì va nda vomɔɔ lepalaa-lepala kandɔɔ idii púŋ.

²⁶ Kɛ la tui ya diom te, la yeŋ lani le. Mí la tosa bolle kalalen, mí la tosa dɛnɛ vɔɔndo hiovɔɔ fuɲaa niaa mamaa coo.»

²⁷ Nɔm Yeremi, taa cɔm pɛ nda sɔɔn mun kpow, mà yeŋ nɔm lani le, mà yondal nda ma cɛl nɔm diom te,

²⁸ o kon a dimul nda aa: «Vanaa yeŋnun diom Mɛlɛka Hala ndaa le-a niaa co ni, vanaa yeema mi vana sila nda le-a pɛɛn. Dɛnɛ sandaa ɲum mò fula niaa o lasondo few-few.»

Ból diuvaa n'vanndo

²⁹ Mɛlɛka dimi aa: «Kiolun yiinde, mà viow, hel o pembon coo mà cɛɛŋun! Niaa vannda paalen nden hau, niaa tuulu ya kɔllo ni, i yeema lɛ niaa le, i kɛɛ niaa.

³⁰ Le tùú vannda Yuda tosa ɲɛ bɛnda ya Mɛlɛka o hɔl too, sɔɛi fula Mɛlɛka o sondo-e co hee ni aa: A luei dɛnnda ndala nɔɔlɛilan o cɛi ni diola nilan la co veelɔnndo nin-ndo nin, le ndu nɔɔliaa.

³¹ Má tangul tombon Tofɛt, o Bóllo Bɛn-Hinnɔm nin le poaa ndaa a cuavaa ndaa lomɔɔ o yin. O co dɛnɛ ya dimul nda le tosa le co kon te, kabi bɛɛ yiyan kon del-la o kɔl te.

³² Lelan, sɔɛi fula ya Mɛlɛka o sondo-e co hee ni aa: Paale co tiiya, vana-vana dimi lɛnin aa: ‹Tofɛt› le, te kon te aa: ‹Bóllo Bɛn-Hinnɔm› te, kɛ vannda diminin aa: ‹Ból diuvaa n'vanndo›. Tofɛt yɛ, lon nda vanin vanvílɛ́iya kumbɔɔ ni, kani fonda celen venin te.

³³ Dialun vílɛ́in vannda ha vanin ɲɛdiaa yowva coocoo a visia yondoa ni, vana-vana venin ndon le nda kpeeŋiaa le.

³⁴ I kuunanin kɔlkɛndɔɔ a ɲaaloo o kobila Yuda lan nin a o nɛilan Yerusalɛm coo, mì kuuna condun cuaa laandua soli le vanaa nda yeema-a-on a n poaa piaandua bɛɛ soli le a nda yeema-a-on, kani lɛŋnden le muungunin bémbélan kposon.»