Yeremi 6 - BII BILADɛnɛ palaa co Yerusalɛm cum 1 Vanaa fula o polale Bɛnyamɛn-nden nin-nda, la mal Yerusalɛm mì la ɲaanun. La hɔŋ buloo Tekoa ciee, la heelu lɛfɛ cɔwvo Bɛt-Hakerɛm! Kani n co dɛnɛ palaa, a dɛnɛ vɔɔndo cɔu hunɔɔ cɔnɔnndo a ba luaŋ-ndo. 2 Tofa vɔ, i tɛɛmbuunin Yerusalɛm, kobi naŋ kon hɔlla-o, ndu cua salama kon pɛɛn. 3 Vanaa mandaa n'cɔlua co kɔlan o ndu lo a kundala cɔlua ndaa, ma va cɛila-kolala-toandaala ndalan baŋɔɔ ndu coo, mì cɔlua vana-vana va diolan o bungɛi ndɔ nin, o balɔɔ kon sɔ́. 4 A co dimio aa: «La cɔn le cɔwvo! N kɔ delnun nda coo a telen paalen o pol déŋ. Éé, mɔnɛi co hee le naa ni, paalen le yɔngun, vunduma paale yɔnganndan ma co kɔlan a bandei. 5 La cɔn mì n kuelnun nda cɔɛllɛn, mì n tɛɛmbun cɛila lemasala ndalan.» 6 Kani o Mɛlɛka-Nɔ-Kpaayaa-Kpow-vo dimi-o co hoo ni aa: «La kioŋ yɔmnde le keiyo lecoo, mì n kei o kpakio coo, mì n kuel Yerusalɛm.» Kani kobi bɛnda le tambei-yo o co ni, delɔɔ coo daama co lon ni. 7 Maa mɛɛ soon kólaa soli mɛnndan vasu-vasu yɛ, lende o soli dɛnɛ ndɔ vɔɔndo vasu-vasu ni. Vana tui sɔɛi celen ndon te, fɔ vannda saangiaa a dɛnɛ vɔɔndo tosaa, ɲɛ ya co cɔu lɔ́ɔ́-lɔ́ɔ̀-o co ɲɛ nɛyaa a boolɔnndan ni. 8 Yerusalɛm, bii silaa yɔŋii ya faŋan nɔm kɔɔli, mì dɔw lɛŋnde nɔmnden yɛɛvɛ, vana ve lɛnin ndon te.» Vanaa tui isɔɔ le-a (Mɛlɛka) 9 Mɛlɛka-Nɔ-Kpaayaa-Kpow-vo dimi aa: «Israɛlaa tɔ̀a cɔwviannin mɛɛ vana cɔwviaa rɛsɛnndon nuaa yɛ, mà cɔɔlu balan keela mɛɛ vana kiandaa n'rɛsɛnndo keela balan o lɛvon yɛ.» (Yeremi) 10 O nɛ̀ɛ̀ lo ya soo yɛ? Nɛ̀ɛ́-nɛ̀ ya kanalan yɛ mò yaŋnun ya? A buli lani le, lelan a tui isɔɔ le. Sɔɛi Mɛlɛka-e nda muungu mamɔɔ ni, i bii nda bɛɛ iyeema le. 11 I co o piaa cá a kɔltuw Mɛlɛka-o, i nɔla ndu mandanndo o kɔl te. «Cuiŋi ndu cuaambɔa co o nɛilan coo-a coo, a kundala cuaa felengia coo. Kani a kɔanin a nda kpow o biyɔɔ nin: caa piaandua a vanlaandua, vanaa yuuvɛiya a vanaa yuuva nin taw-va. (Mɛlɛka) 12 Tuma ya mululunnin vanaa co o lɛŋnden nin-nda-o, cɛila ndalan la kɔanin vanaa celen o ba, mì ciɛɔn ndan a laandaa ndaa bɛɛ lo le caanda. Sɔɛi fula Mɛlɛka o sondo-e co ken ni. 13 Kani kandɔɔ a cuaambɔ hiow dɔɔnanndo nda tɛɛn-ndo, kɔ bii a kaasonɔ hiow nda faw-vo, nda kpow, vana-vana nɔ hɔlten tɔnɔ ndɔ ndu pila-o kɔɔli. Kandɔɔ a vanaa-tɛɛngaa-diom Hala-a, kɔ bii a vana-solia-lasálàá, nda kpow vanaa lakafaa kposon. 14 A co boolɔnnda vanaa nia cɛw mɛɛ o bɛnda yɛ le, a co dimio aa: «Kɔlɲuloo! Kɔlɲuloo! Kɛ kɔlɲulu co le. 15 Mí siɛmbulan la bii pá nda a kela nda nɔɔlɛi kon? Kɛì-kɛì bɛɛ! Siɛmbulen bɛɛ le bii nda a kon kpow le, a sina bɛɛ maa a tosa dɛnɛ vɔɔn te. Lelan mí Mɛlɛka dimi aa: A delnin latulu nda vanaa co delɔɔ-a, nda pila cannunnin lɛŋ o telen ya mululunnin nda-o. 16 O Mɛlɛka dimi-o co hoo ni aa: «La sim-ndɔ o nɛilan coo mì la mɛɛndian, la ɲuuniaa vɔ le nɛila masindɛlan, ɔ́ɔ̀ o va nɛi kɛndɔɔ-o, la kɔ lecoo, mì la sɔla pɛngio le kɔlta niaalan! Kɛ má muli aa: ‹N kuenin o nɛi kon coo le.› 17 I kɛsi kpalilla niaa ikɛi, la yaŋ diom buloo nilan. Kɛ mí la muli aa: ‹N yɛŋnin lani le.› 18 Lelan, niaa vanaa-mangalaa-isɔɔa, la yaŋ nilan, mì la sina ɲɛ co nda tosalan-ndo! 19 Lɛŋnden, yaŋnun. I co dɛnɛ palaa tuisi vannda ha coo, tɔnɔ yiyannda ndalan co kon ni. Kani a yeŋ nilan o tɔŋ nuu le, má kɛɛ sɔɔn nun. 20 Kpeku yɛɛ ya nɔ yɛ a ansan co fulaa Saba-o, te kon te a ɲɛm cun kɛndɛn fula o lɛŋii celen nin pɔ́-pɔ́-on? Sálàla loamaala niaalan la hɛnan ya le, sálàla niaalan la nɛŋi ya kɔl te.» 21 Lelan Mɛlɛka dimi ni aa: «I handunin powta boŋaalan vannda ha laci, lon fuɲaa nda poaa ndaa boŋinin ni, mì vanaa cal nɛɛ pilɛ-a a canyan n va boŋio lon latulu mà cuu.» Yaamɔɔa co hunɔɔ a ba luaŋ-ndo (Mɛlɛka) 22 O Mɛlɛka dimi-o co hoo ni aa: «Vannda co fulaa o lɛŋnde co a ba luaŋ-ndo len nin. Vannda kunda bɛndoo co hunɔɔ cɔnɔnndo o lɛŋnden mɛɛlulan. 23 Kpaasiaalan a báltan la co nda o laba, a vesa kɔltan, a nɔ iɲíí le. A co kulaa maa mɛmma ihɛl, a hel o soa coo, a sim simnda cɔwlan vana ca ko aa vanndo ndu pilɛ ni, le nɔm cua laandoo Siɔn cɔlɔbaa.» (Vannda) 24 «Naa n tueyɔɔ nda diom, mí diallon vu naa. Mí n buulan taw-taw, mí n sanga mɛɛ vanalanɔɔ sanga o violɔɔ yɛ. 25 La kɔa o yondolan nin te, la fula o nɛilan coo le, kani yaamɔɔ co lon a mɔɛi cɔwve o ba, siòònde bii vannda taw nɛɛ-nɛɛ ka.» (Mɛlɛka) 26 «Cua laandu nuu, yiinun yala yuuloo o caŋ, mà pimbul o loolio nin, mà tosa biisio maa biisi pole pilɛ, mà tuisi mɛmɛan a mɔnɛi bɛnduei! Kani vana tɛɛmbua hunnin o telen n venin ndu kɔl too. 27 I kɛsi nɔm le vanaa nia kɔlɔɔ solio maa kpaki, haliko ma sina kela ndaa, mà soli nda kɔlɔ.» (Yeremi) 28 Nda kpow vanaa nila kalua nda co ni, vanaa muuluannda, a kendu nilan maa n'daɲa, maa n'cilin, nda kpow a laasian. 29 Kùùlan la co fuulaa tuŋ, liie tenga mí i lo pɛ o yin. Fondo fúú nda co volion malɔɔ o yin ni, nɔɔ bii mun-ndo faŋannin te. 30 A veelu nda aa: ‹Volin vɔɔnndon›, kani kɛɔ Mɛlɛka kɛɛ nda ni. |
© Alliance Biblique en Guinée
Bible Society in Guinea-Conakry