Yeremi 45 - BII BILA

Yeremi ɲɔɔlu Baruk

¹ O vɔsi hiɔɔlundɔ Yehoyakim po Yosia-o va masalen tosaa Yuda-o, mí Baruk po Neriya-o va sɔɔn Yeremi va ndu dimullo-on sɛvaa. Mí Yeremi dimul ndu aa:

² «Diom Mɛlɛka, Hala Israɛlla dimi a nɔm Baruk-o co hoo ni aa:

³ A co dimio aa: ‹I kɔndu dɛnɛ fɔ́! I va o sangaa nin mí Mɛlɛka handu ya vɛlɛ mɔnɛi celen coo. I co sangaa koŋullo, kɛ i co pɛngi sɔla le.›

⁴ Lelan diom Mɛlɛka dimul-la le nɔm-ndo co hoo ni aa: ‹I co ɲɛ ya tangul-lo komba, mì sungu ɲɛ yáà tɔl o lɛŋnden kpow nin-ndo.

⁵ O co vɔ bɛɛ dɛnɛ kɛndɛ n co yeemaa le nɔm pila-o le. Kɔl kɔa nɔm lon te. Kani dɛnɛ palaa ya cuunin-ndo vanin le ɲaa yoomaa kpede. Kɛ nɔm, ba-ba n kɔɛ pɛ, i mɛinin nɔm yoomu.›» Mɛlɛka dimi lende ni.