Yeremi 36 - BII BILA

Yehoyakim lom sɛbɛ Baruk sɛva-o

¹ O vɔsi hiɔɔlundɔ Yohoyakim, po Yosia-o va masalen tosaa Yuda-o, mí Mɛlɛka dimul Yeremi aa:

² «Cɔnɔnndo o paale Yosia len háá hau, sɔɔn kɛ́-kɛ̀ ya cɔm nɔm a Israɛl, a Yuda a á vanaa-mangalaa-isɔɔa kpede o kɔɔ, cua sɛbɛ simbulaa mà sɛva mun lecoo.

³ Bɔɔle lɔ́ɔ́ vannda Yuda sinanin yiyan ya nɔ le nda dɛnɛ palaa tuisio coo-o, nda kpow a kindikindinnin le kela nda vɔɔndo malɔɔ, o kon i melnunnin nda le kela nda vɔɔndo, mì mal nda haki.

⁴ Mí Yeremi veelu Baruk po Neriya-o, mí ndu Yeremi va sɔɔn Mɛlɛka ndóò dimul ndu-on kpow dimio, mí Baruk ndu va mun kpow sɛvaa o sɛbɛ simbulaa coo.

⁵ O kon kɔɔli, mí Yeremi dimul Baruk aa: «I co o biyaa, i nɔla kɔlan o Cɛi-Hala-o nin te.

⁶ Lelan, a bii pɛ a kɔɛ lon o paale sum-nden coo, a kɔ dimi sɔɔn Mɛlɛka-n ya va nɔm dimullo má sɛva-on coocoo kpélén vanaa vanin o Cɛi-Hala-o nin-nda a vanaa-vanaa fulanin o kobila Yuda lan nin o hɔl.

⁷ Bɔɔle a cannin mà tɛɛlun Mɛlɛka a kpaaya ndaa kpow, o kon mì vana-vana mangala kela ndɔ vɔɔndo, kani taw-taw Mɛlɛka tambu kɔllo a vannda ha ni.»

⁸ Mí Baruk po Neriya-o tosa mɛɛ Yeremi vana-tɛɛngaa-diom Hala-o ndóò dimul ndu yɛ, mó yonda sɔɔn Mɛlɛka-n va o sɛbɛ simbulaa nin-ndon kpow o Cɛi-Mɛlɛka-o nin.

⁹ O vɔsi ŋuɛɛnundɔ Yehoyakim po Yosia-o va o masalen coo Yuda-o, o paangii ŋɔmahiɔɔlundɔɛi, má yonda le sumndo biyɔɔ Mɛlɛka o hɔl, le vannda Yerusalɛm kpow a le vanaa fula o kobila Yuda lan nin má hun Yerusalɛm-nda kpow.

¹⁰ Mí Baruk dimi sɔɔn Yeremi dimi mó sɛva o sɛbɛ simbulaa nin-ndon vannda kpow o hɔl, o cɛi lenin Kemaria, po Safan vana sɛvaa-o nin, o falii bɛndui Cɛi-Hala-o nin o dio sɛnɛi luɛyaa Cɛi-Hala-o.

¹¹ Mika po Kemaria-o, po imama Safan-ndo tueyɔɔ sɔɔn Mɛlɛka-n va o sɛbɛ kon nin-ndon kpow,

¹² mó toal o cɛi lemasaa nin, mó kɔa o cɛi vana sɛvaa nin di. Simlacia kpede a va o bɔŋanndo coo lon, Elisama vana sɛvaa va lon, Delaya po Semaya-o, Ɛlnatan po Akbɔr-o, Kemaria po Safan-ndo, Sedekia po Hanania-o a simlacia tɔ̀a kpow.

¹³ Mí Mika downun nda kona a sɔɔn o tuei, lɔ́ɔ́ Baruk va sɛbɔɔ dimio vannda kpow o hɔl-lon.

¹⁴ Baruk velu Selemia ni, mí Selemia vialu Netania, mí Netania vialu Yehudi. O kon mí simlacia kan kpow a viam Yehudi o Baruk lo, le ndu kɔlan dimullo maa ndu pila cua sɛbɛ o dimi kon vannda o hɔl-lo, mò kɔɛ a ndu o nda lo. O kon mí Baruk po Neriya-o bii sɛbɔɔ o ba, mó kɔa nɛɛ nda va-a.

¹⁵ Má dimul ndu aa: «Cal mà dimi ndu naa o hɔl.» Mí Baruk dimi ndu nda o hɔl.

¹⁶ Lɔ́ɔ́ nda cii sɔɔn mun kpow tueyɔɔ-o, mí siòònde bii nda taw, mí nda pila nuwvian hɔlla vellaa-velle. Má dimul Baruk aa: «Fɔ mì n kɔ downun masaa sɔɔn mun kpow kona.»

¹⁷ Má muungu, má ɲuna Baruk aa: «Dimul naa mɛɛ n looku sɔɔn mun kpow sɛva telen o va mun dimio-o yɛ?»

¹⁸ Mí Baruk mulul nda aa: «Yeremi va ya mun dimullo ni, mí va mun sɛvaa o sɛbɛ simbulaa ho coo o telen o va mun dimio-o.»

¹⁹ O kon mí simlacia dimul Baruk aa: «La kɔ vionnun niaa Yeremi ŋiɔn kpow, vana-vana bɛnda mò sina nɛɛ niaa vanin-nda le.»

²⁰ O kon má mɛi sɛbɛ kalaa o cɛi baala Elisama vana sɛvaa-o nin, má kɔa o masa lo bɛɛ, má kɔ downun ndu sɔɔn mun kpow kona.

²¹ Mí masaa viam Yehudi sɛbɛ kalaa cuaa. Mó kɔ cua ndu nɛɛ o va o cɛi baala Elisama vana sɛvaa-o nin-nda. Mó hun dimi ndu masaa a simlacia va ndu masaa ikɛiy-a kpow o hɔl.

²² Masaa va icali o cɛi ndɔ va le telen ihoeiyo-o nin o paangii ŋɔmahiɔɔlundɔɛi nin, yinnden le va lekiisaalen ndu ikɛi.

²³ Telen oo telen Yehudi ndóò cii pɛ bungan n'yáá te kon te n'hiɔɔlu dimi, masaa ndóò kelu bungan mun a mɔɛi pɔmbɔɛi, o viow o yin. Lende o lo ndu kilikilio a bungan ni háá, mó cii sɛbɛ kalaa lomɔɔ kpede.

²⁴ Mí masaa nda vana ndɔa baalaa kpow a tuɛi sɔɔn mun, kɛ siòòŋii bii vana-vana le, vana-vana mɔnɛi bii mó sɛɛsian doma lekɔɔ le.

²⁵ Nduyɛ mí Ɛlnatan, Delaya a Kemaria ndáà tɛɛlun masaa taw, haliko o loam sɛbɛ kon te, kɛ o tui nda diom te.

²⁶ Kɛ mí masaa dimul Yerameɛl po ndɔ, Seraya po Asriɛl-lo, a Selemia po Abdeɛl-lo maa a bii Baruk vana sɛvaa nda Yeremi vana-tɛɛngaa-diom Hala-o. Kɛ mí Mɛlɛka vian nda kpíŋ.

²⁷ Masaa ciiyo sɛbɛ Baruk sɛva kon sɔɔn Yeremi dimi-on lomɔɔ, mí Mɛlɛka soaa o Yeremi lo aa:

²⁸ «Cua sɛbɛ celen mà mingi sɔɔn kɛ́-kɛ̀ n va n'sɛvaa o sɛbɛ tasoo coo sɛva lecoo, o Yehoyakim masaa Yuda lom-ndo pɛɛn.

²⁹ Diom Mɛlɛka dimi le Yehoyakim masaa Yuda-o co hoo ni, ndu Yeremi sɛva ni aa: Lekɛ́ndɛi, masaa Babilɔn hunnin mò tɛɛmbuu lɛŋnden nden, mò diw vanndacieea a cɔlua. Kɛ má tambu kɔllo a ndu Yeremi, má loam sɛbɛ sɔɔn mun va coo-o.

³⁰ Lelan diom Mɛlɛka dimi le Yehoyakim masaa Yuda-o co hoo ni aa: Vana-vana fulanin o yungu Yehoyakim-ndo nin mò cal o kpɛŋɛ lemasa David-o coo le. Dialun ndɔn vílɛ́iyon n vanin vɛlɛ n malaa, mì paalen le lɔɔ mun ipala, mì hoeiye lɔɔ mun icɔl.

³¹ I simulnin ndu nda cuavaa ndɔa imamaa a simlacia ndɔa, mì sala nda le dɛnnda ndala vɔɔnndan, mì tuisi nda Yerusalɛmnda a Yudaa kpow dɛnnda palaala yáà dimi le nda tuisio coo, kɛ a bii sɔɛi nii le lan coo.

³² Mí Yeremi cua sɛbɛ celen, mó yɔngu Baruk vana sɛvaa, po Neriya-o pɛɛn. Yeremi va sɔɛi, mí Baruk sɛva sɔɔn mun kpow, n va o sɛbɛ Yohoyakim masaa Yuda ndóò lom-ndo nin-ndon, a sɔɔn celen taw n velan a mun-ndon lecoo.»