Biblia Todo Logo
Bib sou entènèt

- Piblisite -

Talelan 26 - BII BILA


Le diɔmnda

1 Bɛɛle vana ke diɔmndo len le co ko maa piɔɔ mɛmma n'kpungba toal o vɔɔle kaka-kalalen nin-ndo, mɛɛ piɔɔ vana ve kɔl too hun a telen koavaa nuaa yɛ.

2 Mɛɛ nɛ́ɛ̀nɛ́ɛ̀a, te kon te lɛɛfɛnnda balu coocoo nuaa a cel te yɛ, lende danga dɔwnun o fondo fúúo coo-o co ni, o bii vana-vana le.

3 Le sow sionnden le co ni, le sofɛlɔɔ kalafoo co ni, mì yɔm bingio ndu va le diɔm sondo vesɛiyo kɔɔ lɔɔ.

4 Múlùl diɔm sondo vesɛiyo mɛɛ diɔmii ndɔɛi co yɛ le, yɔŋii nɔm pila bɛɛ viol ndu.

5 Múlúl diɔm sondo vesɛiyo mɛɛ diɔmii ndɔɛi co yɛ, yɔŋii o yiyan maa ndu bɛɛ kendu kɔl.

6 Vana yɔngu pɛ diɔm sondo vesɛiyo yoongoo le kɔlan hivio, mɛɛ vana kon ndu tosa dɛnɔɔ mɛɛ vana pila kilin n'pelu, mò kol dɛnɛ kɔlvesɛiyo.

7 Mɛɛ pelun vilɛin vana bɛvɛiyo co n soli ndu kpeku le yɛ, lende tale diɔmndo dimì-o co ni.

8 Diɔmndo sangalaa co ko maa powvo yiiyo o fáàndaa.

9 Diɔm sondo vesɛiyo taloo dimio, kon co ko kpen a vana mɔiyan ma co o hɔl-lo yɔm n'yɔɔ cuaa mò sim le sɔngɔɔ.

10 Vana cuà diɔmndo te kon te vana kelanndo o baalaa nin-ndo, ndu co ko kpen a vana pala caanda-o.

11 Mɛɛ tunndo kuisi mò muungu mò de ɲɛ o kuisi-o yɛ, lende diɔm sondo vesɛiyo muungu diɔmii ndɔɛi tosaa ni.

12 A ce nin vana cennun ndu pila vana kɔlkaloo-o? O co fisa ma tiindan diɔm sondo vesɛiyo a vana vaa lende kɔllo kɛsio coo.


Vana siɛlɛiyo

13 Vana siɛlɛiyo cɛn pɛ o dimi aa: «Yàlàá co o nɛi, visi biyaa co o nɛi kɔllo déŋ.»

14 Mɛɛ dioo ɲuumbun o boondun ndɔn coo yɛ, lende vana siɛlɛiyo mulumulun o ndu lo kpele ni.

15 Mì vana siɛlɛiyo vow baa o hɛngɛi ɲɛdiaa nin, kɛ hali le kɔndɔɔ mò mɛɛnun, i va ndu o ba ikala.

16 Vana siɛlɛiyo ca ko aa ndu hiow kɔlkaloo a vanaa kɔlkalua caa sɔɔn mulio-a a ŋɔmmɛw.


Talela celen

17 Sondoo vowvo o sɔɛi n sina lei nin co ko kpen a tun co hiownɔnndo-o nilan biyɔɔ.

18 Mɛɛ vana seemɛi vii kilin leyinndon, kɔɔn te kon te bálta dii vana lan ndu pila balɔɔ-o co nuaa yɛ,

19 lende vana hui caanda, mò muungu mó dimi aa: «Mamɔɔlan ya i va ni»-o co ni.

20 Te yɔm ve lɛ o yin te yinnden le ɲum. Te vana sɔɔn pɔmbɔ co lɛ le, sɛɛngianndan la cuu.

21 Suɛɛnde yɔngu dɛngultan ni, mì yɔmnde tosa mì yinnden le bii. Lende koni vana kpɛlɛkpɛlɔɔ hun a sɛɛngianndan ni.

22 Maa ɲɛdiaa kɛndɛ yeelɛi vannda congoo co ni, o kɔllo nin di congulan la tiiya vana ni.

23 Sɔɔn kɛndɔn vanndo dimullo kɛ ma nɔ nɛyɔn ndɔɔ o kɔl, kon co ko kpen a bɔ́wvo yikpaa o volin humbun dindu lon.

24 Vana pɛɛsa vannda-o, sɔɔn kɛndɔn tuŋ o dimul nda ni. Kɛ o kɔl ndɔɔ nin ɲɛ celen pɔ́ co lon ni.

25 Vana vaa lende soo bɛɛ sɔɔn kɛndɔn, laalan ndu le. Kani kɔl ndɔɔ co o piaa cá a sɔɔn vɔɔnndon.

26 Nduyɛ mɛ̀ɛ́-mɛ̀ɛ́ o caa nɛyɔn ndɔɔ vionɔɔ, paale vanin mì vannda kpow a ce kɔlvesɛi ndɔɔ.

27 Vana tow pɛ soondo, ndu pila del lenin. Vana pimbul pɛ powvo, pow kalaa kei vana pimbul ndu-o coo.

28 Vana lacòòvaa pɛɛsà bɔɔ vanaa o co yɔullo a còòla lan-nda. Nduyɛ vanndo hiw pɛ vanndo sangalaa, o mal nɔm.

© Alliance Biblique en Guinée

Bible Society in Guinea-Conakry
Swiv nou:



Piblisite