Osee 7 - BII BILA

¹ «telen yáà yeema le Israɛlla singio-o, mí kɔlvesɛi cuavaa-imamaa Efraim-nda a dɛnɛ vɔɔn Samaria fula ceen kpendekele. Kani o còòlan nin nda co kelaa ni. Vuiya co luɛyɔɔ cɛilan nin, vanaa del vannda coo-a tiw o nɛilan kpow coo.

² Nduyɛ, a co yiyanndo maa i co loonɔn a kɔlvesɛi ndaa kpede le. Sisa, dɛnnda nda co tosaa lan la balu nda nɛɛ-nɛɛ ka, i co dɛnnda ndala lan cɔu.

³ A co masaa kɔllo nɛŋio a yɔŋ vɔɔn ndaa, mà va simlacia kɔllo nɛŋio a sɔɔn lacòòvan.

⁴ Nda kpow vanaa suundaa nda co ni. Maa cɛi loamaa bulu vana loamaa buloo hiw tuuloo-o nda co ni. Kandɔɔ tuma o lindà kpeyanndo-vo, háá mì kpeyan kalaa cuu helɔɔ, vana loamaa buloo tofa lɛ cɛi loamaa buloo le.

⁵ O paale kafole masa naa coo, vanaa bɛndua kol pɛ mɔiyan tei, a yɔŋnun maa vanaa nàà. O kon, masaa siɛndul vanaa mam vannda-a baa.

⁶ À va pɛ sɔɔnguuo ndu ikɛi, à tosa kɔlkalu vɔɔndo a kɔltan nda latuw maa cɛi loamaa bulu. Icɔl pii kɔl nda tuwvo connun o malɔ, kɛ idii, o tuulu vundé-vundé maa yinnde bɛndu.

⁷ Nda kpow, a co a tuw kpɛikpɛi maa cɛi loamaa bulu. À co simlacia ndaa lumio, masaa ndaa kpow a co cɛɛlɔnndo. Kɛ o nda tɛɛn vana-vana co ya Mɛlɛka veelu le.

⁸ Cuavaa-imamaa Efraim-nda muulian a vanaa-mangalaa-isɔaa celen. Polale Efraim-nden le yɔŋnun fùlúfúlù nda mulumulu o toŋɔɔ loo.

⁹ Mialla co kpaaya ndaa ciiyo, kɛ nda pila co o sina nin te. Yuuvɛi bii nda icanya, kɛ a co ndi bila biyɔɔ le.

¹⁰ Yonga Israɛlla co nda pila seilen tɛndallo, kɛ a co muungu Mɛlɛka Hala ndaa o ibuŋ te. A kon kpede, a co ya Mɛlɛka nuwviaa le.

¹¹ Maa poonpoon diɔm nɔ kɔl too cuavaa-imamaa Efraim-nda co ni. A co Esiptea veeloo le nda malaa, a co kɔlan Asiri.

¹² Tuma nda co kɔlan lon-ndo, i co yala nuu tondɔɔ nda coo, mì tuisi nda maa yovaa co coocoo-a, mì soŋ nda le nda silaa mɛɛ ya dimul nda o cuungian ndaa coo yɛ.

¹³ Dɛnɛ palaa co nda cum le ɲaanɔn nda ɲaanun ya-o! Mɔnɛi co nda laci le tùú nda simul-la-o! Yáà yeema le nda ciindiaa, kɛ còòlan kposon nda co ya dimullo ni.

¹⁴ A co veelu a kɔlta ndalan kpow le. Nda yɛ, a co somisominndo o kpelela ndala hinialan coo. A co diallon tɛɛndianndo le maalon a le mɔima sɛnɛiyan sɔlaa. Lende nda co ya kɔlan levil ni.

¹⁵ Ya yɛ, ya pɛɛku nda ni, ya luei bala ndalan yoomuan ni, kɛ yiyan vɔɔndo koni nda nɔ a ya ni.

¹⁶ O va bɛɛ mà va muungu vana o ibuŋ, mɛɛ le vana celen, kɛ o co ya Mɛlɛka o ibuŋ te. Maa kpaasiaa tennda loo nda co ni. Simlacia ndaa delinin mà vi o mɔɛi cɔwve bɛngu le diɛɛmule ndale yeovaalen. Kon tosanin ni mì vannda mam nda o lɛŋnde Esipte len nin!»