Marke 1 - BII BILA

Kaannde Nsaŋ Vana-yinaa len

¹ Kandɔn Yoongu kɛndɛ Yeesu Krista, Po Hala-o-o.

² Maa mɛɛ o co o sɛvaa o sɛbɛ Esai, vana-tɛɛngaa-diom Hala-o-o nin yɛ aa: «I co kiila nuu vomɔɔ nɔm laci, le nɔm pemalen pello.

³ Diomndo co yondaa o lɛŋnde veselɛilen nin aa: ‹La toosiaa nɛi Mɛlɛka-o, la siɛɛnduu nɛila ndɔla pɔmbɔlan.›»

⁴ O kon, mí Nsaŋ, ó va yinɔɔ o lɛŋnde veselɛilen nin-ndo can, mó va yondaa a yinɔɔ o kɔɔ le mangalanndo. Mí vannda sɔla malɔɔ lahakio.

⁵ Vanaa va o tàndá Yuda-o nin-nda a vannda Yerusalɛm kpow a va kɔlan o ndu lo, má va hakila ndalan sɔlɔlanndo. Mó va nda yinɔɔ Yurdɛn o peelo.

⁶ Doma bɛndu yiiŋii ɲɔɔmɛɔ va ndu Nsaŋ lekɔɔ, yáwlen le va yiiyaalen ndu o caŋ. Sóónɔa a lɛan ma va ɲɛ ndɔ diaa ni.

⁷ Mó va yondaa aa: «Vana hiow ya kpaaya-o co hunɔɔ o ya kɔɔli, i co bɛɛ o sɔvɛ le tundɔnndo mì timbi yoei ndɔɛi lasamtai le.

⁸ Ya, i co niaa yinɔɔ o mɛnndan nin, kɛ ndu yinnin niaa a Hala Kɔl-Diandaa.»

Yeesu sɔla yinɔɔ mo sɔla tɔɔndanndo

⁹ O telen kon, mí Yeesu can Nasarɛt o tàndá Kalile-o nin, mó hun. Mí Nsaŋ yin ndu Yurdɛn o peelo.

¹⁰ Tuma o va fulaa o mɛnndan nin-ndo, mó ca halataalaa kumbinndo. Mí Kɔl Hala-o toal ndu coo maa kangbo.

¹¹ Mí diomndo fula o halataala aa: «Po ni ya kaola taw-vo n co ni, a hɛnan ya taw.»

¹² Fɔ́ɔ́fɔ̀, mí Kɔl-Diandaa yaa Yeesu o lɛŋnde veselɛilen nin.

¹³ Mó kɔ tosa lon palɛi belehiɔɔlu, Setana va ndu tɔɔndanndo. Nda visia yondoa va latulu ni, mí mɛlɛkaa va ndu ikɛi.

Yeesu veelu vanaa yɔɔyaa nda hiɔɔlu

¹⁴ Mɛɛ nda bii Nsaŋ, mí Yeesu kɔannun Kalile. Mó va yondaa a Yoongu kɛndɛ Hala-o o kɔɔ,

¹⁵ mó va dimio aa: «Telenndo tiiya, masale Hala len le sɔɔnguu. La mal yɔŋ vɔɔndo, mì la mangalan, mì la laalan Yoongu Kɛndɔɔ!»

¹⁶ O va mɛmma ihɛllan Kalile demullo, mó ca Simɔn nda Andre puapilɛ ndɔ, a va yalala ndalan malɔɔ o mɛmma ihɛllan nin, kani vanaa yɔɔyaa nda va ni.

¹⁷ Mí Yeesu dimul nda aa: «La del-la kɔɔli, mì siinguu niaa vanaa yɔɔyaa n'vanndacieea.»

¹⁸ Fɔ́ɔ́fɔ̀, má mal yalala ndalan, má kɔa ndu kɔɔli.

¹⁹ Ndáà kɔlan lándán, mó ca Nsaki po Sebede-o nda Nsaŋ puapilɛ ndɔ, nda bɛɛ a va o dɛ̀ndɔ̀ɔ́ nin, a va yalala ndalan toosiaa.

²⁰ Mó veelu nda dɔ́ɔ́. Má mɛi Sebede fuɲa nda o dɛ̀ndɔ̀ɔ́ nin ndon nda vanaa ndaa baalaa, má kɔa Yeesu kɔɔli.

Langbanɔ ɲina vɔɔndo va saangiaa-o

²¹ Mí Yeesu nda kaandeŋaa ndɔa kɔa Kapɛrnaum. Paale pɛngiaalen tiiyaa, mí Yeesu luɛi o cɛi lekaando nin, mó can vannda pɛɛkoo.

²² Mí kɔndɔfillo bii nda a mɛɛ o va pɛɛkoo yɛ, kani a kpaayaa o va pɛɛkoo ni, o ve maa vanaa pɛɛkaa latɔŋnda le.

²³ Nduyɛ vanndo pum va o cɛi lekaan kon nin, ɲina vɔɔndo va ndu kɔɔli, mó yonda aa:

²⁴ «Yɛɛ n yeema yɛ naa yɔŋndo, nɔm Yeesu fula Nasarɛt-o? Le naa ciiyo n hin ni? I sina vana n co-o, O-Diandaa Hala vem-ndo n co ni.»

²⁵ Mí Yeesu deŋul ɲina vɔɔndo aa: «Mei ma fula langbanɔɔ ho nin!»

²⁶ Mí ɲina vɔɔn kon hiiluu langbanɔɔ taw-taw, mó yonda coocoo kpélén o fula o va-o!

²⁷ Mí siòònde bii nda kpow, má muungu ɲuunianndo aa: «Dɛnɛ yɛɛ co yɛ hoo? Pɛɛku sɛnɛi celen co vɛlɛ hoo ni, o nɔ bɔɔ kpaayaa. Hali ɲinaa vɔɔnda, langbanɔɔ ho co nda deŋullo mà va sɔɛi ndɔɛi biyɔɔ.»

²⁸ O kon, mí tɔ́ɔ́ ndɔɔ keleŋa tiw cɔ́-cɔ́ o tàndá Kalile-o nin kpow.

Yeesu singi vanaa lanàá taw

²⁹ Ndáà fulaa o cɛi lekaando nin, má kɔa nda Nsaki a Nsaŋ o Simɔn nda Andre-a lo cɛinin.

³⁰ Lefu laandu Simɔn-ndo va ihini a dialun tuwvon. Fɔ́ɔ́fɔ̀, má kɔ dimul Yeesu sɔɛi ndɔɛi.

³¹ Mó sɔɔnguu, mó bii ndu baa, mó cua ndu, mí dialun tuwvon mal ndu. Mó kandu bɛɛ nda ɲɛdiaa keo.

³² Paalen delɔɔ, mí ɲumndan má toal. Má cuu ndu vanaa lanàà súú-súù ka a vanaa ɲinaa va kɔɔli-a.

³³ Mí kobio kpede kɔ cuungian o dio lon.

³⁴ Mó singi vannda taw a nààla yɛ́-yɛ́lan. Mó toaw vɛlɛ ɲinaa vɔɔnda vanaa bɔɔ-bɔɔ kɔɔli. Kɛ o ve ɲinaa vɔɔnda malɔɔ sɔɛi le, kani ndáà sina ndu.

Yeesu balu o tàndá Kalile-o nin

³⁵ Idiiyo púŋ, ɲumndan ma va vɔ, mó can le kɔlan o lɛŋnde veselɛilen lepum nin, mó kɔ va piɛilen.

³⁶ Mí Simɔn nda caaŋaa ndɔa can dɔ́ɔ́ ndu nuwviaa.

³⁷ Ndáà saalɔnndo ndu, má dimul ndu aa: «Vannda kpede co nɔm nuwviaa.»

³⁸ Mó mulul nda aa: «N kɔnnun nɛɛ celen, o cieon pɔmbɔn co macɛlu nanu-on, haliko mi i kɔ yonda vɛlɛ sɔɛi Hala-e lon, kani lelan ya hin ni.»

³⁹ O kon mó kɔa o tàndá Kalile-o kpow nin, mó va sɔɛi Hala-e yondaa o cɛila lekaanndan nin a ɲinaa vɔɔnda tovɔɔ.

Yeesu singi vana nàà siaŋaa

⁴⁰ Mí vana nàà siaŋaa hun o ndu lo, mó hun baŋ vulan ndu o labɛngunin. Mó tɛɛlun ndu aa: «Taa cɛl pɛ, i yeema ma singi ya, mì dendu Mɛlɛka o hɔl.»

⁴¹ Mí ɲííye bii Yeesu a ndu. Mó siɛndi baa, mó pilan ndu, mó dimi aa: «I cɛl, siongu!»

⁴² Fɔ́ɔ́fɔ̀, mí nàà siaŋaa faŋan ndu, mó diandu.

⁴³ O kon kɔɔli, mí Yeesu dimul ndu le kɔnndan, mó dimul ndu kpéŋ-kpéŋ aa:

⁴⁴ «Caa dɛ! Dimul vana-vana ndi le, kɛ kɔ cɔmnun vanaa-solia-lasálàá, mà tosa ɲɛ Moise sɛva le vana co maa nɔm-ndo dindio-o, haliko mi ken va seilen le nda.»

⁴⁵ Kɛ langbanɔ kon fulaa dɔ́ɔ́, mó kandu ndi keelaa a yondaa le vannda ndi dimullo. Le kɔlɔ kon, Yeesu ndóò nɔla lɛ luɛyɔɔ o kobi oo kobi nin te, fɔ o vionnɔnndo nin. O cieon kɔɔli, o lɛŋnde veselɛilen nin ndóò lo nin ni, mì vannda ndáà fula nɛɛ-nɛɛ ka le kɔlan o ndu lo.