Luke 17 - BII BILA

Silalan a hakio malɔɔ o kɔɔ

¹ Mí Yeesu dimul kaandeŋaa ndɔa aa: «Mɛɛ tosaa co le, fɔ mì tɔɔndanndan la va o ceendo coo. Kɛ dɛnɛ palaa co le vana malnin vanndo o tɔɔndanndo nin-ndo!

² O co fisa mì ndáà baa ndu pow bɛndoo o labolo, mì ndáà viow ndu o mɛmma ihɛllan nin, a cuaambɔa pɔmbɔa haa o pilɛ malɔɔ o pɔwlan nin.

³ La mandan a niaa pila. Te puapilɛ nɔmndo tosa pɛ dɛnɛ hakio a nɔm, a kpaandian ndu. Te o mangalan pɛ, a mal ndu haki.

⁴ Te o tosa pɛ yɔŋ vɔɔndo leŋɔmmɛw o paalen nin, mò hin vɛlɛ bɛmbɛ leŋɔmmɛw, mò dimul nɔm aa: ‹I cee le›, a mal ndu haki.»

⁵ Mí kiilaa dimul Maalii aa: «Cɔɔlu naa laalanndo.»

⁶ Mí Maalii muli aa: «Te niáà nɔ pɛ laalanndo ɲɛ-pɔmbɔ maa kulii mutarde, niáà dimulnin voosu tumndo ho aa: ‹Sungun mà kɔ tɔlnun o mɛmma ihɛllan nin›, mì ndóò tuei niaa diom.»

O vana baalaa bɛnda le tosaa-o

⁷ «O niaa tɛɛn, te vanndo nɔ pɛ vana baalaa, mì vana baala kon va vàá, te kon te mò va cɔlua mandaa, mò hin fulaa o poli, vɛ̀ɛ̀ o dimul ndu pá aa: ‹Hun cɔ́-cɔ́, mà de ɲɛdiaa›?

⁸ Ɛ-ɛ, o co lende le, nuaa o dimul ndu ni aa: ‹Toosial-la ɲɛdiaa, mà mangalan volɔɔlan lekɔɔ le ya ɲɔɔn yɔngoo telen ya vanin dioo a kolɔɔ-o. O kon kɔɔli, nɔm de niko.›

⁹ Vɛ̀ɛ̀ o mel pá buɛi kalaa balika le ɲɛ o vem ndu tosaa-o?

¹⁰ Lende koni, niaa bɛɛ, telen niaa ciinin o nda vem niaa tosa-o tosa kpow-vo, la dimi aa: ‹Buɛiya daama naa n co ni, n nɔ dí le nuvali sɔla le. O náà n bɛnda le tosaa-o naa n tosa ni.›»

Yeesu singi vanaa n'lɛlɛa n'van tɔ́

¹¹ Telen Yeesu va kɔlan Yerusalɛm-ndo, mó kei o pɛɛngulan tànda Samari-o a tàndá Kalile-o.

¹² Ndóò tiiyaa o cieo pum, mí vanaa n'lɛlɛa pum hun ndu bɔŋa. Má sim lándán,

¹³ má yonda aa: «Yeesu, Vana bɛndoo, tuinun naa iɲíí fɔ́!»

¹⁴ Yeesu cɔu nda, mó dimul nda aa: «La kɔ cɔmnun vanaa-solia-lasálàá.» Telen nda va kɔlan-ndo, má siangu.

^15-16 Vana pilɛ va nda tɛɛn, Samarinɔɔ o va ni. Mɛɛ o saalun maa o sengu, mó muungu pila nɛɛ Yeesu va-a a Hala balikaa mello coocoo. Mó kɔ del o kuumbuan Yeesu o labɛngunin, mó mel ndu balika.

¹⁷ O kon mí Yeesu ɲuna aa: «N'van tɔ́ le sɔla siongɔɔ le. A ŋɔmahiɔɔlua yɛ niko, ɔ́ɔ̀ ba nda co-o?

¹⁸ A tɔ̀a kpede, vana-vana hin mò hun mel Hala balika le, fɔ miallo ho!»

¹⁹ O kon kɔɔli, mó dimul ndu aa: «Cɔn ma kɔɛ, laalan nɔmndo cii nɔm ciindiaa.»

Le hunɔɔ Masale Hala len

²⁰ Mí Faliisia ɲuna Yeesu aa: «Lɔ́ɔ́ kuɛɛ nɛ Masale Hala len le hun yɛnin?» Mó mulul nda aa: «Masale Hala len le hinnin mì vannda ce le.

²¹ Vana diminin te aa: ‹Má cè masale len nanu›, te kon te aa: ‹Má cè len o nda›. Kani masale Hala len le co niaa o lakɔl.»

²² O kon, mó dimul kaandeŋaa ndɔa aa: «Telen pum co hunɔɔ tiiya, la yeemanin le Po vanacieo cɔu paale pilɛ, kɛ la cinin paale len te.

²³ A dimulnin niaa aa: ‹La tofa vɔ o nda!› Te kon te aa: ‹La tofa vɔ nanu!› Kɛ hali mì la kue lon te.

²⁴ Kani mɛɛ piɔɔ-volia can o halataalaa kpengei pilɛi, mò kɔ tiiya o kpengei pilɛi nuaa yɛ, lende Po vanacieo vanin paale ndɔlen ni.

²⁵ Kɛ mɛɛ mò sanga fɔlɔn o dɛnndan taw nin, mì vanndacieea vaalio ho a kɛɛ ndu.

²⁶ Ɲɛ yɔŋnun o palɛi Noe-e-o, ndu yɔŋnunnin vɛlɛ o palɛi Po vanacieo ni.

²⁷ Vannda va dioo a kolɔɔ, a va laandua yilɔɔ, a va cuavaa ndaa kɛsio o nɔlan, háá paale Noé luɛi o dɛ̀ndɔ̀ɔ́ nin-nden. O kon, mí mɛmma bɛnduan ma hun, mí ma diw nda kpow.

²⁸ Ɲɔɔ yɔŋnunnin vɛlɛ maa o palɛi Lɔt-e. Vannda va dioo ma va kolɔɔ, a va ɲɔɔn piondɔɔ ma va pisio, a va tɔlɔɔ ma va tangullo,

²⁹ kɛ paale Lɔt faŋan Sodɔm-nden, mí Hala soli yinnden a powta leyinndan coocoo maa piɔɔ, mí le diw nda kpow.

³⁰ Lende koni ɲɔɔ yɔŋnunnin paale Po vanacieo cɔmnunnin-nden ni.

³¹ Paale len, vana vanin o yindɔ cɛi ndɔɔ coo-o tulnin mò luɛi le ɲɛm ndɔn cuaa le. Lende koni vɛlɛ ni, vana vanin o poli-o muungunin o ndu lo le.

³² La loonun a ɲɛ yɔŋnun lanɔɔ Lɔt-o.

³³ Vana-vana manda pɛ yoomu ndɔɔ, mɛɛ o hialunnin ndu, nduyɛ vana-vana yoomu ndɔɔ hɛlun pɛ, o ciindiaanin ndu.

³⁴ Mì dimul niaa, o ɲumma man nin, vannda nda ŋiɔn a vanin ihini o kpele pilɔɔ coo, mì vanndo pilɛ cuannun, mì o pilɔɔ lo lon.

³⁵ Vanlaandua nda ŋiɔn a vanin cúo latulu, mì o pilɛ cuannun, mì o pilɔɔ lo lon.

³⁶ Vanpiaandua nda ŋiɔn a vanin o poli, mì vanndo pilɛ hel, mì o pilɔɔ lo lon.»

³⁷ O kon, mí kaandennda ɲuna ndu aa: «Kuɛɛ nɛ hee yɔŋnun yɛnin, Maalii?» Mó mulul nda aa: «Nɛɛ ɲɛ vílɛ́iyo co-a, lon duàá cuungian ni.»