Luke 11 - BII BILA

Mɛɛ vana piɛi Hala yɛ

¹ Paale pilɛ, Yeesu va Hala piɛiyo nɛɛ pum. Mɛɛ o cii, mí kaandeŋaa ndɔa o pilɛ dimul ndu aa: «Maalii, pɛɛku naa piɛilen mɛɛ Nsaŋ pɛɛku kaandeŋaa ndɔa yɛ.»

² Mó dimul nda aa: «Telen niaa co va piɛilen-ndo, la dimi aa: Pua, màá vannda sina maa Hala Diandaa n co ni. Màá masale nɔmnden le hun.

³ Yɔngu naa ɲɛdiaa naa n bɛnda le dioo lepalaa-lepala-o.

⁴ Mal naa haki le hakila naalan, kani naa bɛɛ, n co vanaa-vanaa co tɛɛmbuuo a naa hakio malɔɔ. Mal naa mì n del o dɛɛniaa nin te.»

⁵ Mí Yeesu dimul nda vɛlɛ aa: «Te vana pilɛ o niaa tɛɛn nɔ pɛ caan ndɔ, mò kɔ kundul caan ndɔ kon dioo di-tɛɛndo, mò dimi aa: ‹Caan nuu, dɔnda ya bululan tan yáá,

⁶ kani caan ni pilɛ langa komal-la sunsun, ɲɛ-ɲɛ co ya o ba le ndu fandaa le.›

⁷ Te vana co kon cɛinin-ndo muli pɛ aa: ‹Pala ya le! Dioo co nihau o kindaa, cuavaa nia-ou, ya-ou, n connun nihau ihini. I nɔla lɛhau cɔnɔnndo mì ke nɔm bulu le.›

⁸ Mì dimul niaa, hali mò cen mò yɔngu ndu le tùú o co caan ndɔ-o le, kɛ mɛɛ mò cɛn, mò yɔngu ndu ɲɛ-ɲɛ o yeema le baŋnɔn o baŋnun ndu ɲunaa-o.»

Vana piɛi pɛ, a ke ndu

⁹ Lelan, ya co niaa dimullo ni maa: «La piɛi, o kon a kenin niaa. La nuwviaa, o kon la saalunnin. La lɔɔ dioo, o kon a kumbilnin niaa.

¹⁰ Kani vana-vana piɛi pɛ, ndu sɔla. Vana nuwviaa pɛ, o saalun. Vana lɔɔ pɛ dioo, a kumbil ndu.

¹¹ O niaa tɛɛn, ɔ́ɔ̀ fuɲa po ndɔɔ piɛi buloo mò ke ndu powvo-o? Te kon te o piɛi ndu pɛ suwvo, o ke ndu kɛwvo o fonda suwvo?

¹² Te kon te, o piɛi ndu pɛ pelte sɔɔlen, o ke ndu ngeemaa?

¹³ Niaa vanaa vɔɔnda co vɔ cuavaa niaa ɲɛm kɛndɔn keo, ko nin te Fuɲa niaa co o halataala-o, vɛ̀ɛ̀ o kɛɛ yɛnin vanaa co ndu ɲunaa-a Hala Kɔl-Diandaa yɔngu!»

Muli Yeesu yɔngu a Bɛlsibub ɲina vɔɔndo o kɔɔ-o

¹⁴ Yeesu va ɲina vɔɔŋoo siinguu vanndo bobonɔɔ-o tovɔɔ. Ɲina vɔɔn kon faŋanndo, mí vana kon soaa. Mí kɔndɔfillo bii vannda.

¹⁵ Kɛ mí vanaa pum nda dimi aa: «Bɛlsebul, o co bolle ɲinaa vɔɔnda-o co ndu kpaayaa keo le ɲinaa vɔɔnda tovɔɔ vannda kɔɔli nuaa ni.»

¹⁶ Vanaa celen ndáà yeema le Yeesu kɔlɔɔ solio, o kon má dimul ndu le dɛnɛ kaamaa pum tosaa, o fula o halataala-o.

¹⁷ Yeesu sinaa yiyannda ndalan, mó dimul nda aa: «Te vanaa co o masale pilɛlen nin-nda sɛyan pɛ, mì nda pila simulan, mɛɛ masale len le tambu, cɛila ndɔlan la koombian coo.

¹⁸ Lelan te Setana pila sɛyan pɛ, vɛ̀ɛ̀ masale ndɔlen le sim yɛnin? Kani la co dimio maa a kpaaya Bɛlsebul-lo ya co ɲinaa vɔɔnda tovɔɔ nuaa ni.

¹⁹ Te a kpaaya Bɛlsebul-lo ya co ɲinaa vɔɔnda tovɔɔ ni, ɛɛ vanaa co yɛ niaa simndan kɔɔli-a yɛ niko, a kpaaya nɛ̀ɛ̀ nda nda co yɛ nda tovɔɔ? Lelan, nda pila cɔmnin niaa maa la nɔ dí le.

²⁰ Kɛ te a kpaaya Hala-o ya co ɲinaa vɔɔnda tovɔɔ ni, mɛɛ masale Hala len le tiiya o niaa lo.

²¹ Vana dialun kalaa nɔ pɛ ɲɛm cɔwvon mò va bɛ́ɛ̀ ndɔɔ kandaa, ɲɛ-ɲɛ yɔŋnun mun te.

²² Kɛ te vana hiow ndu dialun kalan-ndo hinul ndu pɛ, mò nɔla ndu, o poondiaa ndu ɲɛm cɔvun o tiindan mun-ndon o ba. O kon kɔɔli, o piɔw mun vanaa celen tɛɛn.

²³ Vana-vana naa n co diom pilɛ le, mɛɛ yaamɔɔ nuu o co ni. Vana co mɔɔsiaa maa ya le, mɛɛ puusiaa ndu co ni.»

Mɛɛ ɲina vɔɔndo muungu vana o n'dial-lɛ

²⁴ «Ɲina vɔɔndo fula pɛ vanndo o n'dial, o kɔ nuwviaa nɛɛ vesɛiya le pɛngio. Kɛ te o seelun te, o dimi aa: ‹I muungu vɔ o cɛi ni ya va-o nin.›

²⁵ Te o muungu pɛ mò kɔ komal cɛi kalaa o basaa, mò va o toosiaa ɲɛkɛndɛi,

²⁶ o kɔ veelu vɛlɛ ɲinaa vɔɔŋaa celen nda ŋɔmmɛw, a hiow ndu pila vɔwlen-nda. A hin pɛ, a hun cal lon. O kon, mɛɛlula vana kon la vɔw hiovɔɔ mɛɛ o va o tasendɔ yɛ.»

Dɛnɛ kɛndɛ kpeekpeiyo

²⁷ Mɛɛ Yeesu cii sɔɔn mun dimi, mí vanalanɔɔ pum heelu diomndo o sɛ́lɔ́ɔ́ tɛɛn, mó dimi aa: «Dɛnɛ kɛndɔɔ co le vanalanɔ velu nɔm, mó vɔɛsi nɔm-ndo!»

²⁸ Kɛ mí Yeesu mulul ndu aa: «Lende i co ni, kɛ nduyɛ, vanaa tuei sɔɛi Hala-e má bii ndi-a, le nda dɛnɛ kɛndɔɔ co ni.»

Yeesu kɛɛnun le kaamaa vannda ɲuna ndu-o tosaa

²⁹ Telen vannda a va cuungianndo Yeesu ikɛi-yo, mó cua sɔɛi, mó dimi aa: «Vannda paalen nden hau, vanaa vɔɔnda nda co ni. A co dɛnnda kaamaalan ɲunaa, kɛ dɛnɛ kaamaa celen cɔmnunnin nda o dɛnɛ Yonas-o kɔɔli le.

³⁰ Mɛɛ Yonas yɔŋnun tɔɔmaseloo le Ninive yɛ, lende koni Po vanacieo yɔŋnunnin tɔɔmaseloo le vanndacieea paale hau len nden ni.

³¹ Masa laandu va a ba too-o muungunin yoomu o paale kɔɔsɔlen, mò kɔɔsal vanndacieea vaalio ho, mò yaala nda. Kani ndu, o lɛŋnden mɛɛlulan di o cɛn ni, mó hun le sɔɔn kɔlkalun Salomɔn-ndon yaŋnɔnndo. Nduyɛ, o hiow Salomɔn-ndo co nanu.

³² Ninivea muungunin yoomu o paale kɔɔsɔlen, mà kɔɔsal vanndacieea vaalio ho, mà yaala nda. Kani mɛɛ nda tuei pɛɛkula Yonas lan, má mal yɔŋ vɔɔn ndaa, má mangalan. Nduyɛ, o hiow Yonas-o co nanu.»

Hɔltan la co macoaa maa lambo

³³ Vana-vana mɛndul fitinaa mò kɛsi ndu nɛɛ viannan-nda le, te kon te mò ven ndu o hɛngɔɔ bɛngu. Kɛ o ɲɛ kɛsiaa lafitinaa coo vana kɛsi fitinaa ni, haliko mi vanaa co luɛyɔɔ-a ce ɲɛ-tengaa.

³⁴ Hɔlta nɔmndan la co lamboo le dialun nɔmndon ni. Te la co pɛ la kɛndɛ, dialun nɔmndon kpow n pɛ a ɲɛ-tengaa, kɛ te la co la kɛndɛ le, n pɛ a ɲumndan.

³⁵ Lelan caa taw, yɔŋii ɲɛ-tengaa co nɔm nin-ndo siŋnun ɲumndan.

³⁶ Te ɲɛ vavonndo va yɛ pɛ o dialun nɔmndon nin kpede, mì ɲɛ-ɲɛ ve o maɲum nin te, mɛɛ diallon kpow n co n tengaa mɛɛ lamboo ke vana ɲɛ-tengaa nuaa yɛ.

Yeesu simul Faliisia a vanaa pɛɛkaa latɔŋnda

³⁷ Mɛɛ Yeesu cii sɔɛi, mí Faliisinɔɔ pum veelu ndu le dioo nda ndu o ndu lo. Mí Yeesu kɔa, mó kɔ cal le dioo.

³⁸ Kɛ mɛɛ Faliisinɔɔ ce Yeesu dioo, o pilu balan lɔ́ɔ́ pá mo de le, mí kɔndɔfillo bii ndu.

³⁹ O kon, mí Maalii dimul ndu aa: «Niaa Faliisia, maa taala kólaa a hɛngɛi nda tuei o kɔɔ-o niaa co ni, kɛ yeemɛi ciimbuɛi a kɔlvesɛiyo co niaa o piaa o lakɔl ca.

⁴⁰ Kpòkóó niaa diɔmnda ha! Vɛ̀ɛ̀ o co vana toosiaa lekɔɔlio-o le toosiaa vɛlɛ leninndo le?

⁴¹ Lelan, la yɔngu vɔ fɔlɔn ɲɛ co o hɛngɛiyo nin-ndo a ɲííye, o kon mì ɲɛ-ɲɛ dendu le niaa.

⁴² Kɛ dɛnɛ palaa co le niaa Faliisia! Kani la co o-tɔ́ndɔɔ solio o tɔlɔɔlan lapum nin, maa mɛnte, ru a tɔlɔɔla nakɔla niaalan kpow, le Hala yɔngoo, kɛ la co dɛnɛ sandaa a canyɛi Hala-e cɔm te. Dɛnnda niaa bɛnda le tosaa lan la co lan ni, handɔɔ niko o dɛnnda tɔ̀lan coo.

⁴³ Dɛnɛ palaa co le niaa Faliisia! La yeema calle o fondala taselan o cɛila lekaanndan nin. La yeema mì vannda va keiyo yilɔɔ o bɛ́ɛ̀la bɛndulan.

⁴⁴ Dɛnɛ palaa co le niaa! Kani maa sɛila vana bii bila le lan niaa co ni, la vana kei coo a sina le lan pɛɛn.»

⁴⁵ O kon mí vana pɛɛkaa latɔŋndo pum dimul Yeesu aa: «Vana bɛndoo, naa bɛɛ yeowlan n co naa nuaa o sɔɛi he nin ni!»

⁴⁶ Mí Yeesu mulul ndu aa: «Niaa bɛɛ, dɛnɛ palaa co le niaa, niaa vanaa sina tɔŋndo taw-va! Kani volɔɔla lusulaalan niaa co vannda siiluuo ni, la niaa pila yee bɛɛ suei mì la pilan te lan.

⁴⁷ Dɛnɛ palaa co le niaa! Kani la co sɛila vanaa-tɛɛngaa-diom Hala-a cɔvɔɔ, nda yɛ fuɲaa niaa mamaa diw nda ni.

⁴⁸ Kon cɔm ni maa seiya niaa co ni, maa la hini kɔl a dɛnnda fuɲaa niaa mamaa tosa lan. Kani nda diw vanaa-tɛɛngaa-diom Hala-a, mì niaa niaa va sɛila ndalan cɔvɔɔ.

⁴⁹ Lelan Hala dimi o kɔlkalu ndɔɔ nin ni aa: ‹I vimnin nda vanaa-tɛɛngaa-diom Hala-a nia a kiilaa nia. À diwnin a pum, mà tol a tiŋ yɛlen.›

⁵⁰ Kon tosannin haliko mi dɛnɛ piɔ́m vanaa-tɛɛngaa-diom Hala-a nda diw kabi o ceendo ho kandɔɔ-a kpow del vanndacieea vaalio ho o lebol.

⁵¹ Kandɔɔ a piɔ́m Abɛl-lo, kɔlan háá a piɔ́m Sakari-o, à nda dii o fonda-loamaa-lasálàá a Cɛi-Hala-o tɛɛn-ndo. Mì dimul niaa, dɛnɛ piɔ́m vanaa ɲunannin vanndacieea vaalio ho.

⁵² Dɛnɛ palaa co le niaa, niaa sina tɔŋndo taw-va. Kani la soli kíì co le luɛyɔɔ o dio kɔlkaloo-e. Niaa pila luei le, mí la kuuna vɛlɛ vanáà yeema le luɛyɔɔ-a luɛyɔɔ.»

⁵³ Telen Yeesu faŋan o fonda kon-ndo, mí Faliisia a vanaa pɛɛkaa latɔŋnda simul ndu a ɲuuniaalan taw.

⁵⁴ A va nɛilan nuwviaa, haliko mi ndóò biinun o sɔɛi ndɔɛi nin.