Tɔŋ lasálàá 13 - BII BILA

Tɔŋndo le nààla fula vana o yáwvo coo lan

¹ Mí Mɛlɛka soaa o Moise nda Aarɔn ndo, mó dimul nda aa:

² «Te kpukpuei, tafiei, te kon te sɔŋndo pum fula pɛ vanndo lekɔɔ, mò va le siŋnɔnndo maa paw nàà siaŋaa, à bɛnda mà kɔɛ a vana kon o Aarɔn vana-solia-lasálàá lo, te kon te o poaa ndɔa o pilɛ lo, vanaa-solia-lasálàá pɛɛn.

³ O kon, vana-solia-lasálàá mɛɛndian fonda ɲɛ kon fula ndu-o. Te yiiŋii co o fonda kon coo-e i muungu pɛ ihumbu, mì pawvo townun háá mò cii yáwvo, mɛɛ paw nàà siaŋaa co kon ni. Te vana-solia-lasálàá cii ndu pɛ mɛɛndian, o dimi aa vana nɔɔlɛiyo vana kon co ni.

⁴ Kɛ te sɔŋndo va pɛ o humbu, mò cii yáwvo a townɔnndo le, mì yiiŋii co o paw kalaa nin-nde muungu ihumbu le, vana-solia-lasálàá faŋa vana kon caanda coo, o ven ndu nɛɛ pum ndu pilɛ o palɛi ndii ŋɔmmɛw bɛngu.

⁵ O kon, o mɛɛndian ndu o paale ŋɔmmɛwndɔlen coo. Te pawvo hiw laci a dioo le, o faŋa vɛlɛ ndu caanda coo faŋa diinndɔɔ, o ven ndu vɛlɛ o palɛi ndii ŋɔmmɛw bɛngu.

⁶ Te palɛi ken cuu pɛ, o mɛɛndian ndu o paale ŋɔmmɛwndɔlen coo. Te sɔŋ kon kandu pɛ ɲumndo, mò hiw laci a pɛngɛlanndo le, vana-solia-lasálàá dimi aa vana diandaa vana kon co ni, aa tafiei kínɛí fula ndu ni. O kon, vana kon tɔɔ volɔɔla ndɔla cuɛinanndan, o dendu.

⁷ Kɛ te o cii nin pɛ vana-solia-lasálàá cɔmnɔn, mì vana-solia-lasálàá dimi aa vana kon dendu, o kon kɔɔli mì tafiei kɔ hiow laci a dioo, o bɛnda mò muungu vɛlɛ o vana-solia-lasálàá lo,

⁸ mì vana-solia-lasálàá mɛɛndian ndu vɛlɛ mɛɛndian diinndɔɔ. Te o ce pɛ maa tafiei hiow laci a dioo, o dimi aa vana kon co o nɔɔlɛiyo. Mɛɛ nàà siaŋa fúlà vana o yáwvo coo-o co kon ni.

⁹ Te nàà siaŋaa bii pɛ vanndo, a bɛnda mà kɔɛ a ndu o vana-solia-lasálàá lo,

¹⁰ mì vana-solia-lasálàá mɛɛndian ndu. Te kpukpui humbuei va pɛ ndu lekɔɔ, mì yiiŋii co o kpukpui ken coo-e bɛɛ i muungu ihumbu, mì falii kiyɛiye fula a huinde lecoo,

¹¹ mɛɛ nàà siaŋa lɔɔlɛi fulà vana o yáwvo coo-o co kon ni. O kon, vana-solia-lasálàá dimi aa vana nɔɔlɛiyo vana kon co ni, hali mò kue lɛ bɛɛ a ndu inɛɛ le ndu mɛɛndianndo le. Kani vana kon cennun kpendekele maa vana nɔɔlɛiyo lekɛ́ndɛi o co ni.

¹² Kɛ te nàà siaŋa kon soli pɛ kpukpon mì n tiw vana nàà kon lekɔɔ pindo, kandɔɔ o bollen háá o pelon,

¹³ mì vana-solia-lasálà co ndu mɛɛndianndo-o ce kpukpun mun kɔɔlen balɔɔ pindo, mo ce maa nàà siaŋaa cii kɔɔle vana kon kumbɔɔ kpow, o dimi aa vana diandaa vana kon co ni. Kani kɔɔle ndɔlen kpow le muungu lehumbu.

¹⁴ Kɛ paale nda co ndu falii kiyɛiye saalɔn lekɔɔ len, o siŋnun ɲinkon vana nɔɔlɛiyo.

¹⁵ Te vana-solia-lasálàá cii pɛ fonda falii kiyɛiye fula-o mɛɛndian, o dimi aa vana nɔɔlɛiyo vana kon co ni. I nɔɔlɛiye falii kiyɛyii ken co ni, kani nàà siaŋaa co kon ni.

¹⁶ Te falii kiyɛyii ken i mangalan pɛ mì i muungu ihumbu, vana nàà kon muungu o vana-solia-lasálàá lo.

¹⁷ O kon, vana-solia-lasálàá mɛɛndian ndu. Te pawvo muungu pɛ o humbu lekɛ́ndɛi, vana-solia-lasálàá dimi aa o diandaa vana kon co ni.

¹⁸ Te piɔŋndo fula pɛ vanndo mo sengu,

¹⁹ mì kpukpui humbuei, te kon te kàváá fula o fonda piɔŋndo va kon-ndo, vana kon bɛnda mò kɔ cɔmnun vana-solia-lasálàá.

²⁰ O kon, vana-solia-lasálàá mɛɛndian ndu. Te o ce pɛ maa kava kon hiow yáw ndɔɔ yingilaa, mo ce maa yiiŋii co o kàváá coo-e muungu ihumbu, o dimi maa vana nɔɔlɛiyo vana kon co ni. Kani nàà siaŋaa co kon ni, ndu soli kon kpukpon o kàváá coo ni.

²¹ Kɛ te vana-solia-lasálàá ce pɛ maa yiiŋii humbui co o kàváá coo le, maa kàváá hiw yáw ndɔɔ yingila le, mo ce vɛlɛ maa kava kon co nin ɲumndo, o faŋa ndu caanda tɛɛn, o ven ndu ndu pilɛ le palɛi ndii ŋɔmmɛw.

²² O kon kɔɔli, vana-solia-lasálàá ce pɛ maa kàváá hiow laci a dioo, o dimi aa vana nɔɔlɛiyo vana kon co ni. Paw nàà siaŋaa co kon ni.

²³ Kɛ te kàváá lo pɛ o fonda pilɔɔ, mò hiw laci a dionnɔnndo le, mɛɛ tindi piɔŋndo co kon ni. O kon, vana-solia-lasálàá dimi aa vana diandaa vana kon co ni.

²⁴ Te vanndo lomnun pɛ a yinnden, mì kava humboo, te kon te kava siaŋaa fula o fonda kon coo,

²⁵ vana-solia-lasálàá bɛnda mò mɛɛndian ndu. Te yiiŋii co o kava kon nin-nde muungu pɛ ihumbu, mì kava kalaa hiow yáw ndɔɔ yingilaa, mɛɛ nàà siaŋaa co kon ni. Ndu soli kon kpukpon o lomnɔnndo coo ni. Vana-solia-lasálàá bɛnda mò dimi maa vana nɔɔlɛiyo vana kon co ni, kani paw nàà siaŋaa co kon ni.

²⁶ Kɛ te vana-solia-lasálàá ce pɛ maa yiiŋii humbui co o kàváá nin te, mo ce vɛlɛ maa kava kon yingila le, mì kàváá kandu ɲumndo, o faŋa ndu caanda tɛɛn, o ven ndu ndu pilɛ kpé le palɛi ndii ŋɔmmɛw.

²⁷ O paale ŋɔmmɛwndɔlen coo, o mɛɛndian ndu. Te kàváá hiow pɛ laci a dioo, o dimi aa vana nɔɔlɛiyo vana kon co ni. Kani paw nàà siaŋaa co kon ni.

²⁸ Kɛ te kàváá lo pɛ o fonda pilɔɔ, mo hiw laci a dioo le, nduyɛ mò kandu ɲumndo, mɛɛ kpukpui loamnannde kínɛí co ken ni. O kon vana-solia-lasálàá dimi aa vana diandaa vana kon co ni, kani tindi paw loamnanndo kínɛí co kon ni.

²⁹ Te pawvo fula pɛ vanapɔnɔɔ, te kon te vanalanɔɔ o lebol, te kon te o dɔɔmoo coo,

³⁰ vana-solia-lasálàá bɛnda mò mɛɛndian paw kon. Te o ce pɛ maa pawvo townun mo hiaw yáw ndɔɔ, mì yiiŋii co lenin-nde diw maa divɔɔ cuɛima yavaa, mì i va vɛlɛ dalan-dalan, vana-solia-lasálàá bɛnda mò dimi aa vana nɔɔlɛiyo vana kon co ni. Mɛɛ tɛ̀ɛ̀ndo co kon ni, ndu co naa bii vana o lebol, te kon te o dɔɔmoo coo-o ni.

³¹ Kɛ te vana-solia-lasálàá ce pɛ maa tɛɛn kon tuwnun mó hiaw yáw ndɔɔ le, mò ce maa yiiŋii co lecoo-e co itiŋi le, o faŋa vana kon caanda tɛɛn, o ven ndu ndu pilɛ le palɛi ndii ŋɔmmɛw.

³² O paale ŋɔmmɛwndɔlen coo, vana-solia-lasálàá mɛɛndian ndu. Te o ce pɛ maa tɛ̀ɛ̀ndo hiw laci a dioo le, mò ce vɛlɛ maa yiiŋii co lecoo-e diw maa cuɛima yavaa le, maa tɛ̀ɛ̀ndo tuwnun mo hiaw yáw ndɔɔ le,

³³ o kon, vana tɛ̀ɛ̀ndo fula kon-ndo sendin tembello. Kɛ o bɛnda mò sendi fonda tɛ̀ɛ̀ndo co-o le. O sendin pɛ, vana-solia-lasálàá faŋa ndu caanda tɛɛn, o ven ndu vɛlɛ ndu pilɛ o palɛi ndii ŋɔmmɛw bɛngu.

³⁴ O paale ŋɔmmɛwndɔlen coo, vana-solia-lasálàá mɛɛndian ndu. Te tɛ̀ɛ̀ndo hiw laci a dioo le, te o tuwnun mò hiow yáw ndɔɔ le, vanaa-solia-lasálàá dimi aa vana diandaa vana kon co ni. Kɛ o bɛnda mò tɔɔ volɔɔla ndɔla cuɛinanndan le siŋnɔnndo vana diandaa.

³⁵ Kɛ taa dimi nin pɛ maa vana diandaa o co ni, o kon kɔɔli mì tɛ̀ɛ̀ndo hiow laci a dioo,

³⁶ fɔ mì vana-solia-lasálàá mɛɛndian ndu vɛlɛ. Te o ce pɛ lekɛ́ndɛi maa tɛ̀ɛ̀ndo hiow laci a dioo, hali mò nuwviaa lɛ le yiiŋii diw maa cuɛima yavaa-e saalɔnndo le. Kani vana kon cennun kpendekele maa vana nɔɔlɛiyo lekɛ́ndɛi o co ni.

³⁷ Kɛ nduyɛ, te tɛ̀ɛ̀ndo hiw laci a dioo le, mò lo o fonda pilɔɔ, mì yiiŋii tiŋiei vil lecoo, mɛɛ tɛ̀ɛ̀ndo sengu. Vana kon bɛɛ dendu. O kon, vana-solia-lasálàá dimi aa vana kon dendu.

³⁸ Te sɔŋnda humbulan la fula pɛ vanndo lekɔɔ,

³⁹ vana-solia-lasálàá bɛnda mò mɛɛndian vana kon. Te sɔŋnda fula ndu lekɔɔ lan la va pɛ pupulaa, mɛɛ kpukpon kínɛí n fula ndu mun lekɔɔ ni, mɛɛ vana kon connun o diandaa.

⁴⁰ Te yiiŋii co vanndo o lebol-le keendun pɛ, mì temboo del ndu, mɛɛ vana kon dendu Mɛlɛka o hɔl.

⁴¹ Te yiiŋii ndɔɛi keendun pɛ a ba tendei co-o, mɛɛ vana nɔ temboo laci-o co kon ni. Ndu dendu Mɛlɛka o hɔl.

⁴² Kɛ te paw co tiŋ o siaŋa-o fula pɛ o tembe del kɔɔli-o, te kon te o tembe del laci-o coo, mɛɛ nàà siaŋaa soli kon kpukpon o tembe del kon-ndo coo ni.

⁴³ O kon, vana-solia-lasálàá mɛɛndian ndu. Te o saalun pɛ kpukpun co tiŋ n'siaŋa-on o yáw ndɔɔ coo o tembe del kon kɔɔli, te kon te laci-o coo, mì n velan a paw nàà siaŋaa,

⁴⁴ mɛɛ vana nàà siaŋaa vana kon co ni. Vana nɔɔlɛiyo o co ni. O kon, vana-solia-lasálàá dimi aa vana nɔɔlɛiyo vana kon co le paw fula ndu kon o lebol-lo ni.

⁴⁵ Fɔ mì vana nàà kon bii-o vownun volɔɔla ndɔla cuɛinanndan lasɛɛsiɛilan, mò puusiaa yiinde ndu o lebol, mò kumbu siayii co o milinndo bɛngu-e, mò yonda aa: ‹Vana nɔɔlɛiyo! Vana nɔɔlɛiyo!›

⁴⁶ Mɛ̀ɛ́-mɛ̀ɛ́ o viow, te paw kon co vɔ pɛ ndu lekɔɔ, vana nɔɔlɛiyo o co ni. Mɛɛ o co yɛ vana nɔɔlɛiyo yɛ, o bɛnda mò va ndu pilɛ kpé. Nɛɛ ndɔa calaa vanin o dɔ́ɔ́ngɔ́ɔ̀ kɔɔli ni.»

Sɔŋnda fula o volɔɔla cuɛinanndan coo lan

⁴⁷ «Te sɔŋnda ipawlan la va pɛ o kola fengbɔɔ, te kon te o kola keesoo coo,

⁴⁸ o va o kola toosian a funnden-ndo coo, o va o kola fengbɔɔ coo, o va o kola keesoo coo, o va o yáw visio coo, o va o ɲɛ toosian a yáw visio-o coo sɔŋnda lan la fula ni,

⁴⁹ mì la va tiŋ maa yinɔɔ peele kiyɛi, te kon te maa yinɔɔ siaŋa tiŋ, mɛɛ sɔŋnda nàà siaŋaa la co lan ni. Vana-solia-lasálàá bɛnda mò mɛɛndian ndu.

⁵⁰ O cii pɛ sɔŋnda lan mɛɛndian, o ven volɔɔ cuɛinan sɔŋndo co kon coo-o o palɛi ndii ŋɔmmɛw bɛngu.

⁵¹ O paale ŋɔmmɛwndɔlen coo, o cɔɔlu ndu mɛɛndian. Te sɔŋndo cɔɔlu pɛ pɛngɛlan o volɔɔ cuɛinan kon coo, mɛɛ sɔŋnda vɔɔn-vɔɔnndan la co lan ni. Lelan, volɔɔ nɔɔlɛiyo volɔɔ cuɛinan kon co ni.

⁵² Vana-solia-lasálàá bɛnda mò lom ndu kpúlúká o yin, o va kola keese, o va doma lebɛngu, o toosian bɛɛ a funnden, yiiŋii saa, te kon te volɔɔ toosian a yáwla cɔlua-o. Kani vana nɔla lɛ sɔŋ kon faŋa le. Lelan, volɔɔ cuɛinan kalaa bɛnda mò ŋɔɛ o yinnden nin.

⁵³ Kɛ te vana-solia-lasálàá mɛɛndian pɛ, mò ce maa sɔŋndo hiw laci o volɔɔ cuɛinan kon coo le,

⁵⁴ o dimi, a tɔɔ ndu fó-fó. O kon kɔɔli, o ven ndu vɛlɛ o palɛi ndii ŋɔmmɛw bɛngu.

⁵⁵ Te vana-solia-lasálàá cii pɛ volɔɔ cuɛinan kalaa tɔɔ, o mɛɛndian ndu. Te o ce pɛ maa sɔŋndo mangalan te, hali mì sɔŋ kalaa hiw laci le, mɛɛ volɔɔ kon o nɔɔlɛiyo o co ni. Hali o va bɛɛ maa o hɔlaa kɛndɛa, te kon te o hɔlaa vɔɔnda sɔŋndo fula volɔɔ kon ni mo yul, o bɛnda mò ŋɔɛ o yin.

⁵⁶ Kɛ te vana-solia-lasálàá tɔɔ pɛ volɔɔ cuɛinan kon, mo mɛɛndian ndu, mo ce maa sɔŋndo kandu mɔɲamɔɲaa, o kɛɛya fonda kon o volɔɔ kalaa.

⁵⁷ Kɛ o kon kɔɔli, te sɔŋndo fula vɛlɛ pɛ paale celen o volɔɔ kon coo, mɛɛ nàà siaŋaa pooɲiaa volɔɔ cuɛinan kon a sɔŋndan lende ni. Le hee, o bɛnda mò ŋɔɛ o yin.

⁵⁸ Te sɔŋ vaa lende fula pɛ o volɔɔ cuɛinanndo coo, o va o volɔɔ toosian a funnden-ndo coo, te kon te o ɲɛ toosian a yáw visio-o coo, mà tɔɔ volɔɔ kon mì sɔŋ kon faŋan, fɔ mà tɔɔ ndu vɛlɛ tɔɔ diinndɔɔ haliko mo siŋnun volɔɔ diandaa.»

⁵⁹ Silalan la co lan le sɔŋnda fula o volɔɔla cuɛinanndan coo lan o kɔɔ ni, o va o kola fengbɔɔ coo, o va o kola keesoo coo sɔŋ kon fula ni, o va vɛlɛ bɛɛ o kola súú-súù coo, te kon te o ɲɛ toosian a yáw visio-o coo. Silalan ndan la cɔm vana ni maa ɲɔɔ ho co o diandaa, te kon te ɲɛ kon co o nɔɔlɛiyo.