Kundalan 9 - BII BILA

Duɲɛi kafo-hiavaa-coo

¹ O paangii tasei nin o vɔsi diinndɔɔ nin o faŋan Israɛlla faŋan Esipte-o kɔɔli, mí Mɛlɛka dimul Moise paale pum o lɛŋnde veselɛilen Sinai nin aa:

² «Israɛlla bɛnda mà tosa kafo-hiavaa-coo o telen kelun-ndo.

³ La bɛnda mì la tosa ndu o paale tɔ́ a lehiɔɔlundɔlen coo o paangei he coo, a paale delaalen. La va pɛ duɲɛi kafo kon tosaa, la tosa mɛɛ tɔŋndan a sɔɔn dimin lecoo-on co yɛ kpafii.»

⁴ O kon mí Moise tɛɛngul Israɛlla sɔɔn mun,

⁵ má tosa kafo-hiavaa-coo o lɛŋnde veselɛilen Sinai nin o paale tɔ́ a lehiɔɔlundɔlen coo o paangii tasei nin, a paale delaalen. Má tosa mɛɛ Mɛlɛka dimul Moise le tosaa yɛ.

⁶ Kɛ nduyɛ, vanaa va a nɔɔlɛiya Mɛlɛka o hɔl le vana vílɛ́iyo, te kon te le cɔlu vílɛ́iyo sɔɔnguuo ikɛi-ya a tiwba le kafo-hiavaa-coo tosaa ɲinkon te. Le hee, má kɔ komal Moise nda Aarɔn paale pilɛle len,

⁷ má dimul Moise aa: «N co a nɔɔlɛiya Mɛlɛka o hɔl le sɔɔnguu naa n sɔɔnguu vana vílɛ́iyo ikɛi-yo. Le kɔlɔ yɛɛ n hin a sálà naa o Mɛlɛka lo o telen kelun-ndo naa Israɛlaa tɔ̀a le?»

⁸ Mí Moise mulul nda aa: «La cum-ndɔ nanu mì kɔ yaŋ nilan o ɲɛ Mɛlɛka co dimi a sɔɛi ken o kɔɔ-o.»

⁹ Mí Mɛlɛka soaa o Moise lo, mó dimul ndu aa:

¹⁰ «Soo o Israɛlla lo ma dimul nda aa: ‹Kandɔɔ sisa, háá le fɛɛn a fɛɛn, te vana pilɛ o niaa tɛɛn va pɛ o nɔɔlɛiyo le sɔɔnguu o sɔɔnguu vana vílɛ́iyo ikɛi-yo, te kon te, te o va pɛ o kela levil nin, o tiwba mò tosa kafo-hiavaa-coo le ya Mɛlɛka biiloo.

¹¹ O paale tɔ́ a lehiɔɔlundɔlen coo o paangii diinndɔɛi nin nda bɛnda le kafo kon tosaa ni, mà de saa téndóó a bulu toosian a lɛvɛn too a á bil loloo.

¹² A bɛnda mà mɛi ɲɛ-ɲɛ le diimandɔɔ le, a bɛnda vɛlɛ ma pɛl paa cɔlu sálà kafo kon te. A bɛnda mà tosa mɛɛ silalan a tɔŋnda kafo-hiavaa-coo la co yɛ.

¹³ Kɛ te vana pum va pɛ o diandaa, mo ve o kela nin te, mo saalan le duɲɛi kafo-hiavaa-coo tosaa le, o bɛnda mò sɔla faŋaa Israɛlla tɛɛn few-few. Sanga oo sanga komal ndu pɛ mɛɛ ndu pila nuwviaa ndu ni, kani o solul Mɛlɛka dɛɛ sálà ndɔɔ o paale kelun-nden coo le.

¹⁴ Te mial co icali niaa o bɛngu coo-o yeema pɛ le kafo-hiavaa-coo Mɛlɛka-o tosaa, o bɛnda mò tosa mɛɛ tɔŋndan a sɔɔn kafo kon dimin yɛ. Tɔŋ pilɔɔ kpé co le miallo a le cua pilacieo ni.›»

Vundule ikumnden le kumbu Calta Mɛlɛka lan

¹⁵ Paale nda tondu Calta Mɛlɛka lan-nden, mí kumde kumbu lan mɔku-mɔku. Icɔllo, mí kumii va ken o Calta Mɛlɛka lan coo-e siŋnun yinnden, mí yinnde len le lo lecoo lende háá idiiyo.

¹⁶ Mí ɲɔɔ va niko tosanndo lende lɔ́ɔ́-lɔ́ɔ̀, ipala kumnde va o Calta Mɛlɛka lan coo ni, icɔl niko, kumii ken ndíì siŋnun maa leyin.

¹⁷ Lepalaa-lepala kumii ken ndíì faŋan pɛ o cɛi-kola-toandaa-labɔɔŋian kon coo, Israɛlla ndáà puusiaa dɔ́ɔ́ngɔ́ ndaa (le hiovɔɔ laci). Fonda oo fonda ndíì kɔ sim pɛ yili, ndáà kila dɔ́ɔ́ngɔ́ ndaa lon a fondala ndala yɛ́-yɛ́lan.

¹⁸ Mɛɛ kon co dimio ni maa tɔɔmasele Mɛlɛka-o Israɛlla ndáà cum ni le dɔ́ɔ́ngɔ́ ndaa puusiaa, tɔɔmasele ndɔɔ koni ndáà cum vɛlɛ ni le dɔ́ɔ́ngɔ́ celen kilaa. Te kumnde ndíì va vɔ pɛ o Calta Mɛlɛka lan coo, ndáà feŋan o fonda kon le hiovɔɔ laci le.

¹⁹ Mɛ̀ɛ́-mɛ̀ɛ́ kumii ken ndíì viow o Calta Mɛlɛka la lan coo, ndáà sɛɛngiaa diom Mɛlɛka-o le, ndáà kue laci le.

²⁰ Lɔ́ɔ́ lepum, le palɛi bingi koni kumnde ndíì sim o Calta Mɛlɛka lan coo ni. Lɔ́ɔ́-lɔ́ɔ̀, tɔɔmasele Mɛlɛka ndóò yɔngù-o ndáà cum le dɔ́ɔ́ngɔ́ɔ̀ kilaa, te kon te le ndu puusiaa ni.

²¹ Lɔ́ɔ́ lepum, le lɔma lepilɛ koni kumnde ndíì sim o fondaa pum ni. Te ndíì faŋan dɔ́ɔ́ pɛ diimandɔɔ idiiyo, Israɛlla bɛɛ ndáà puusiaa dɔ́ɔ́ngɔ́ɔ̀. Lɔ́ɔ́ lepum, mì ndíì niinu mì ndíì lɔl o fonda kon malan ndíì hiaw laci, kɛ ndíì hiow dɔ́ɔ́ pɛ, nda bɛɛ ndáà puusiaa dɔ́ɔ́ngɔ́ɔ̀ le kɔlan.

²² Kumii ken ndíì cii palɛi ŋiin, ndíì cii paangii pilɛ, ndíì viow vɛlɛ bɛɛ taw o Calta Mɛlɛka lan coo lon, Israɛlla va icali o dɔ́ɔ́ngɔ́ kon nin tuŋ, ndáà kue laci le. Fɔ mì kumnde ndíì faŋan malan ndáà puusiaa dɔ́ɔ́ngɔ́ ndaa le hiovɔɔ.

²³ Tɔɔmasele Mɛlɛka-o ndáà cum le dɔ́ɔ́ngɔ́ɔ̀ kilaa a le ndu puusiaa ni. Lelan ndáà mɛɛndan ni, le sinaa ɲɛ Mɛlɛka va dimi-o. Mɛɛ Mɛlɛka ndóò yɔngu nda silalan a sondo Moise-o yɛ ndáà tosa baala Mɛlɛka-o ni kpafii.