Kundalan 6 - BII BILA

Vanndacieaa solin nda pila sálà le Mɛlɛka-a

¹ Mí Mɛlɛka soaa o Moise lo, mó dimul ndu aa:

² «Soo o Israɛlla lo ma dimul nda aa: ‹Te vanapɔnɔɔ, te kon te vanalanɔɔ solin pɛ ndu pila sálà mò siŋnun teengen le Mɛlɛka, mò cua ciɛ́ɔn le ndu pila sálàá solinndo le Mɛlɛka.

³ Ndu bɛnda lɛ mo kol mɔiyan a ɲɛm vana kol mì n hiŋ vana hɔlla-on te. O bɛnda mò kol mɔima vaalɛiyan te, o kol vɛlɛ ɲɛ-ɲɛ vana kol mo bii vana le. O bɛnda mò kol mɛmma n'rɛsɛnndan te, o dia vɛlɛ rɛsɛŋun koaman te, o va n'kiyɛi o va n'vesɛi.

⁴ Háá mì telen ndu pila kelu le sálàá solinndo-o cuu, o bɛnda mò de ɲɛ-ɲɛ toosian a rɛsɛnndon te, o va a kullon nda toosiaa ɲɛ kon ni, o va a kɔloo ni, o bɛnda mò de ndu le.

⁵ O telen kon nin vɛlɛ kpow, kùisiei bɛnda mì i kei ndu o lebol te, o bɛnda mò sendin te. Háá mì telen ndu pila solin kon sálà le Mɛlɛka-o cuu, o diandaa o vanin Mɛlɛka o hɔl ni. Lelan, o bɛnda mò mal yiiŋii ndɔɛi a siayii ndɔɛi hindɔɔ o ba ndɔɔ coo.

⁶ O telen ndu pila solin kon sálà le Mɛlɛka-o nin kpow, o bɛnda mò pilan vana vílɛ́iyo le.

⁷ Hali fuɲa ndɔ, kala ndɔ, bɛ ndɔ, pɔmbɔ ndɔ, te kon te le yema ndɔ sɔla piɔ́mndo ni, o bɛnda mò nɔɔlian o dialun ndan pilanndo le. Kani tɔɔmasele cɔm kpendekele maa ndu pila solin sálà le Hala ndɔɔ-o co ndu o lebol.

⁸ O telen ndu pila solin kon sálà le Mɛlɛka-o nin kpow, o diandaa o co Mɛlɛka o hɔl ni.

⁹ Te vanndo sɔla pɛ piɔ́m kiyɛiyo ndu ikɛi, mɛɛ yiiŋii co tɔɔmaseloo maa ndu pila solin sálà le Mɛlɛka-e i nɔɔla Mɛlɛka o hɔl. Lelan, te palɛi hiow pɛ ndii ŋɔmmɛw, paale o vanin dindinndo Mɛlɛka o hɔl-ten, o sendi yiinde ndu o lebol a siayii ndɔɛi.

¹⁰ O paale ŋɔmaandɔlen, o yoo vana-solia-lasálàá piinda nda ŋiɔn, te kon te kangboa nda ŋiɔn o cɛi-kola-toandaa-labɔɔŋianndo sondoo.

¹¹ O kon, vana-solia-lasálàá soli o pilɛ sálà co le hakio sɔlaa malɔɔ-o, o soli o pilɔɔ sálà loamaa, o tosa faleŋii dindiannde ndu coo le sɔɔnguu o sɔɔnguu vana vílɛ́iyo ikɛi-yo. Paale len, o soli vɛlɛ bolle ndɔlen sálà sɛnɛi,

¹² ndu pila solin vɛlɛ sálà sɛnɛi le Mɛlɛka, le telen solian sálà ndóò kelu-o peeloo. O kon, o yɔngu saa téndé nɔ vɔsio pilɛ-o le sálà bɛɛndiaa isɔɔ solio. Kɛ palɛi tasei o tosa o sálà solian kon nin-nde co o cɔm coo le, kani telen ndɔ ndóò kelu mó solin ndu pila sálà-o nɔɔla Mɛlɛka o hɔl.

¹³ Tɔŋndo co hoo le vana solin ndu pila sálà-o ni: paale palɛi o kelu le ndu pila sálàá solinndo le Mɛlɛka-e cuunin-nden, a bɛnda mà hin a ndu o cɛi-kola-toandaa-labɔɔŋianndo sondoo,

¹⁴ mò solul Mɛlɛka sálà ndɔɔ: mò yɔngu saa kóndó téndé nɔ vɔsio pilɛ-o, o nɔ lenamta loo le sálà loamaa solio, saa téndé laandu nɔ vɔsio pilɛ-o, o nɔ lenamta loo le sálàá co le hakio sɔlaa malɔɔ-osolio a saa kóndó nɔ lenamta loo le sálà kɔlɲuloo solio.

¹⁵ Mò hin vɛlɛ a kambɛi bulu toosian a lɛvɛn too co nin-ndo, bulu nda lom a kpeyan nda vɔɔca o cuɛiyan nin-ndo, a fùlúfúlù nda linda a cuɛiyan-ndo, a sálàla kpeyanndan a á sálàla mamɔila co le dɛnɛ kon-ndan.

¹⁶ Mì vana-solia-lasálàá cua cɔwviaala lan kpow, mò sɔɔnguu lan Mɛlɛka o hɔl, mò soli sálà co le hakio sɔlaa malɔɔ-o a sálà loamaa.

¹⁷ Mò solul vɛlɛ Mɛlɛka sálà kɔlɲuloo a saa kóndóó, a kambɛi bulu toosian a lɛvɛn too co nin-ndo, mò handu kpeyan sálàá a mɔima sálàma ndɔan lecoo.

¹⁸ O kon kɔɔli, vana ndóò solin ndu pila sálà le Mɛlɛka-o sendi bolle ndɔle ndóò soli sálà len o cɛi-kola-toandaa-labɔɔŋianndo sondoo. O kon, o cua yiiŋii ndɔɛi a siayii ndɔɛi o sendi-e, o vuu ndi o yinnde co biyɔɔ o sálà kɔlɲuloo bɛngu len nin.

¹⁹ Te visin saa kóndón mun lɔw pɛ, vana-solia-lasálàá cua congú saa kóndó kon, o cua buloo o pilɛ o kambɛi bulu toosian a lɛvɛn too co nin-ndo nin, a dɛɛ toosian a lɛvɛn too, o sɔɔ vana ndóò solin ndu pila sálà-o ɲɛm mun o ba telen vana kon ciinin bolle ndɔle ndóò soli sálà len sendi-o.

²⁰ O kon, vana-solia-lasálàá tosa faleŋii vana heelu ɲɔɔ coo le Mɛlɛka ndu cɔmndo-e. Ɲɛm dian mun a ɲɛmahilu kon, ɲɛ diandaa-diandaa pila o co Mɛlɛka o hɔl ni, le vana-solia-lasálàá ɲɛm mun co ni, lende koni kɔŋɔ nda tosa faleŋii cɔmaa sálàá Mɛlɛka o hɔl-le coo-o a lɔlu nda faŋa-o co vɛlɛ le ndu ni. Kon cuu pɛ, vana ndóò solin ndu pila sálà-o nɔla niko mò kol mɔiyan.

²¹ Tɔŋndo co hoo le vana solin ndu pila sálà mó cua ciɛ́ɔn o Mɛlɛka lo-o ni, ɲɛm o bɛnda yɛ le Mɛlɛka sálàá solullo le sálà ndɔ ndu pila solin-ndo-on co n pesin mun diolan-ndon ni, faŋanndo o kɛndɛi ndu pila bɛnda le tosaa te o nɔ pɛ ɲɛ-e coo. O bɛnda mò tosa mɛɛ ndu pila cua ciɛ́i o Mɛlɛka lo yɛ, handɔɔ o ɲɛ tɔŋ sálà solianndo dimi-o coo.›»

Mɛɛ vana bɛnda le duaa dɔvɔɔ yɛ

²² Mí Mɛlɛka soaa o Moise lo, mó dimul ndu aa:

²³ «Soo o Aarɔn nda poaa ndɔa lo, ma dimul nda aa: ‹Te la va pɛ le Israɛlla duaa dɔvɔɔ, nuaa niaa bɛnda le dimio ni aa:

²⁴ Màá Mɛlɛka dɔw nɔm duaa mò kanda nɔm!

²⁵ Màá Mɛlɛka tofa nɔm tofa kɛndɛ mò tosal nɔm kɛndɛi!

²⁶ Màá Mɛlɛka landu hɔlla nɔm coo mò yɔngu nɔm kɔlɲuloo!

²⁷ Lende vannda bɛnda ni ma piɛi ya le Israɛlla, o kon mì dɔw nda duaa.›»