Yɔɛl 4 - BII BILA

Hala kialunin yamɛi vanaa-mangalaa-isɔaa

¹ «La tofa vɔ, o palɛi ken nin, o telen kon, i minginin vanaa ndáà bii Yuda a Yerusalɛm-nda cuungiaa.

² I cuungiaanin vanaa-mangalaa-isɔaa kpow mì tol a nda o bóllo Yosafat nin. Lon ya kialunin yamɛi ndɛi a dɛnɛ yungu nuu o kɔɔ ni, Israɛlla pɛɛn, bau nda co kɛ́ nuu ni. Kani a tow nda má sɛŋi nda vanaa-mangalaa-isɔaa tɛɛn. I kialunin yamɛi ndɛi le lɛŋnde nile nda piɔvan-nden.

³ A mal siondei le vanaa nia piɔvanndo, má vɔngul poombɔ piaando o pilɛ le vanalanɔ suundɛiyo sɔlaa, má pisi cuaambɔ laandoo o pilɛ o mɔiyan bɛngu.

⁴ Niaa co icali o kobio Tir nin-nda, niaa co icali Sidɔn-nda a niaa co o tàndàla Filistia nin-nda, yɛɛ nɛ niaa yeema yɛ ya o n'dial? Bàà la yeema mi la mingi màá ya coo? Nduyɛ, te la cɛn pɛ le ya màá mingullo, i co màá niaa tuu kon le ya mingullo-o mingi niaa pila o lebol.

⁵ Niaa cua volin nun a sianin nun ni. Niaa cua ɲɛm nin sɔvɛɔn ni, mí la kɔannun a mun o cɛila máánnda niaalan nin.

⁶ Niaa pisi vannda Yuda a haa Yerusalɛm Krɛkia o ba ni, haliko ma kɔɛ lɛŋnde ndalen levil polon.

⁷ Kɛ ya, i co nda yoomuan mingi o n'dial nɛɛ niaa pisi nda-a mì mingi nda nanu, mì mingi màá dɛnɛ vɔɔn niaa tosa kon-ndo niaa pila o lebol.

⁸ I co poaa niaa a cuavaa niaa pisi Yudaa o ba, mì Yudaa nda kɔ pisi nda vannda Saba o ba, vanaa-mangalaa-isɔaa co kan nɛɛ levil-la. Kani ya Mɛlɛka soo nuaa ni.»

Cɔw mɛɛlaa a kɔɔsɔɔ

⁹ La yonda sɔɛi he vanaa-mangalaa-isɔɔa tɛɛn. La toosiaa vannda le cɔwvo, la soo kuubaa cɔwva o lani le cɔwvo tosaa. Vanaa cɔwva kpow a cɔn, mà sɔɔnguu le cɔwvo.

¹⁰ La cua dɛndɛla navaa niaa vàà lan mì la cɔw mɔɔn cɔwvon a lan. La cua lɛ́ɛ́nnda niaalan mì cɔw báltan a lan. Vana nɔ mayoomu loo bɛnda mò dimi aa: ‹Kuubanɔ cɔwvo ya co ni.›

¹¹ Niaa vanaa-mangalaa-isɔaa co balu nanu-a, la keleŋa hunɔɔ. La cuungian. Òó Mɛlɛka! Tuisi kuubaa nɔmaa cɔwva lon.

¹² Vanaa-mangalaa-isɔɔa cɔn, mà kɔɛ o bóllo Yosafat. Lon ya calnin le yamɛi vanaa-mangalaa-isɔaa co o tàndàá ho nin-nda kpow kiolɔɔ ni.

¹³ La bàá vɔlɔtɔɔ, kani maalon vesa le kovɔɔ. La hun, la hun nɛw a labɛngu, kani doolaa pɛ cá. Fɛngɛlan la pɛ mì la va coŋndo. Kpòkóó! Kɔlvesɛi nda co tosaa-o co o bɔɔ.

¹⁴ Kpókò, kpókò, kpókò! Má cè sɛ́lɛ́ bɛndu dɛ! Kpòkóó! Vannda ha co bɔɔ sɛ́lɛ́ o Ból kialaa n'yamaa nin. Kani paale Mɛlɛka len le co le tiiyaa o Ból kialaa n'yamaa nin.

¹⁵ Paalen a paangei piimiaa kpilo, loeon va diondɔɔ-on ɲum pɔ́lì.

¹⁶ Mɛlɛka co a hiilɛi Siɔn, o co yondaa Yerusalɛm a labɛɛla kpeekpei. Halataalaa a lɛŋnden le hiilun yongban-yongban. Kɛ Mɛlɛka co nɛɛ viannannda le vanaa ndɔa ni, ndu co nɛɛ yifannda le cuavaa Israɛlla ni.

¹⁷ O kon, la sinanin maa ya co Mɛlɛka ni, Hala niaa pɛɛn, maa i co icali o pembii nii diandɛi Siɔn coo. Yerusalɛm siŋnunnin kobi diandaa, mialla kei lɛnin ndon le fɛɛn a fɛɛn te.»

Mɛlɛka vanin icali Siɔn le lɔ́ɔ́-lɔ́ɔ̀

¹⁸ «Paale len, mɔima n'rɛsɛnndan ma vanin tɔlɔɔ o pembun bɛndon coo, nɔnɔma cɔlua ma vanin talaa fulaa o pembun pɔmbɔn coo. Mɛnndan ma vanin hiovɔɔ o peela pɔmbɔlan Yuda kpow nin. Peo pum kandunnin bollen o Cɛi-Hala-o nin mò tuusu, mò kɔ pɔɔliaa ból yɔmii akasia.

¹⁹ Esipte siŋnunnin lɛŋnde piɔlɛilen, mì Edɔm siŋnun lɛŋnde vana co nin te len. Kon co nda tosalan le dɛnnda kɔlvesɛila nda tosal Yudaa, má diw nda o lɛŋnde ndalen nin-ndan. Nduyɛ, Yudaa tɛɛmbuu isɔɔ le.

²⁰ Le tàndá Yuda-o yɛ, vannda vanin icali lon le lɔ́ɔ́-lɔ́ɔ̀. Le fɛɛn a fɛɛn, vanndacieea vanin icali Yerusalɛm.

²¹ I dindinin nda le diw nda diw vannda nda tɛɛn-ndo, kani yáà dindi vɔ nda le. Nduyɛ, ya Mɛlɛka vanin icali Siɔn.»