O Kandɔɔ 44 - BII BILA

Yosɛf tofa bɛndaa ndɔa kɔltan

¹ Mí Yosɛf dimul vana va cɛi ndɔɔ hɔlten coo-o aa: «Vowlul vannda ha ɲɛdiaa o bɔlɔla ndalan nin mà pei lan cá-cá, mà mingul nda volin ndan vowlul o bɔlɔla ndalan sondoo.

² Mà vow taala kólaa ni cɔwnun a volii humbuei-yo o bɔlɔ pɔmbɔ nda lumndo sondoo a volin ndɔn o hin le baloo piondɔɔ-on.» Mí langbanɔ kon tosa mɛɛ Yosɛf dimul ndu yɛ.

³ Mɛɛ paalen le sɛ diimandɔɔ, má mal vanaa kan kɔnndan a sofɛlɛa ndaa.

⁴ Má faŋan ciee, má bii kɔlan. A kue bɛɛ levil te, mí Yosɛf koma dimul vana va cɛi ndɔɔ hɔlten coo-o aa: «Diom vannda ha. A bendal nda pɛ, a ɲuna nda aa: ‹Le yɛɛ niaa mingi yɛ dɛnɛ vɔɔndo le dɛnɛ kɛndɛ nda tosal niaa-o?

⁵ Le yɛɛ niaa ciimbuu yɛ taala kólaa vana ni bɛndoo kol nin-ndo? A taala kólaa kon koni o dimi vɛlɛ sɔɔn yɔŋnunnin laci-on ni. La tosa kɔlvesɛi bɛndu!›»

⁶ Mí langbanɔ kon diam nda, mó kɔ bendal nda, mó ɲuuniaa nda mɛ̀ɛ́-mɛ̀ɛ́ Yosɛf cɔm ndu yɛ.

⁷ Kɛ má mulul ndu aa: «Vana bɛndoo, vɛ ma va sɔɔn vaa nuaa dimio? Yiyan del naa le dɛnɛ kɔlvesɛi vaa lende tosaa le.

⁸ Tuma naa n cɛn Kanaan le muungoo nanu-o, mí n cuu nɔm volin naa n kɔ saalun o bɔlɔla naalan nin-ndon. Yɛɛ viam yɛnin naa vɛlɛ mì n ciimbuu volion, te kon te sianion o vana nɔm bɛndoo lo cɛinin?

⁹ Le hee, vana-vana n saalun pɛ taala kólaa kon o ba, vana kon sɔla piɔ́mndo. Handɔɔ o kon coo, naa vanaa tɔ̀a n siŋnun cɛa nɔmnda.»

¹⁰ Mí langbanɔ kon muli aa: «Bala tiɔn. I tuei. Vana-vana ya saalun pɛ ndu o ba, ndu siŋnun cɛ nuu, kɛ a tɔ̀a nda nɔnin isɔɔ le.»

¹¹ Mí nda kpow a tuisi dɔ́ɔ́ bɔlɔla ndalan lɛŋ a kiltan, mí vana-vana kumbi o ndɔɔ.

¹² Mí langbanɔ kon yaasiaa bɔlɔla lan, mó kandu a bɔlɔ bɛ nda cuu nda o kɔɔ kpow-vo, mó kɔ mɛɛlu a bɔlɔ pɔmbɔ nda lumndo. O kon, mó saalun taala kólaa o bɔlɔ Bɛnyamɛn-ndo nin.

¹³ Mí bɛndaa ndɔa sɛɛsiaa domala va nda lekɔɔ lan a mɔnɛi, mí vana-vana mingi volɔɔla ndɔlan handɔɔ o sofɛlɛ ndɔɔ coo, má muungu ciee kpow.

¹⁴ Mí Yuda kɔa nda puapilɛa ndɔa o Yosɛf lo cɛinin. Yosɛf va vɔ lon, má kɔ baŋ vulan ndu o labɛngunin.

¹⁵ Mí Yosɛf ɲuna nda aa: «Dɛnɛ yɛɛ niaa tosa yɛ ho? La co pá sinaa maa te vanndo va pɛ mɛɛ ya co nuaa yɛ, o bɛnda le sɔɔn viannanndon sinaa?»

¹⁶ Mí Yuda dimi aa: «Vɛ̀ɛ̀ naa n co yɛ hee muli, vana bɛndoo? Yɛɛ naa n co yɛ dimi? Vɛ̀ɛ̀ naa n nɔla yɛnin cɔmndo maa n del kasi le? Hala cii tɛɛmbuu naa cɔɔmuu. N cuu siŋnɔn cɛa nɔmnda, vana bɛndoo. Kandɔɔ a naa pila, kɔ bii a vana nda saalun taala kólaa o bɔlɔ-o.»

¹⁷ Kɛ mí Yosɛf dimi aa: «I co tosa lende le. Vana nda saalun taala kólaa o bɔlɔ-o, ndu co va cɛ nuu ni. Kɛ niaa vanaa tɔ̀a, la muungun o fuɲa niaa lo, la nɔ isɔɔ le.»

Yuda pila yɔngun o fonda Bɛnyamɛn-ndo

¹⁸ O kon mí Yuda sɔɔnguu, mó dimi aa: «A yandi vana bɛndoo. Cɛl-lɔ mì dimul nɔm sɔɛi pum, tuulu kɔl a ya le sɔɛi ya co nɔm dimul-le le, kani kpen-kpen niaa co niaa Faraɔnnɔɔ ni.

¹⁹ O kandɔɔ tasoo, vana bɛndoo, má ɲuuniaa naa aa: ‹La nɔ pá fuɲaa, te kon te pɔmbɔ celen?›

²⁰ Mí n mulul nɔm ɲinkon aa: ‹N nɔ fuɲa naa yuuvɛiyo, n nɔ vɛlɛ pɔmbɔ celen, o fuɲa naa kon velu o yuuvɛi nin-ndo. Pɔmbɔ naa lum kon, bɛ ndɔ nda fula kala pilɔɔ-o vi nin, ndu pilɛ kpé lo nin ni. Nduyɛ, fuɲa naa kaola ndu taw.›

²¹ Má dimul naa aa naa n cuu nɔm ndu mà ce ndu a lehɔl.

²² Mí n dimul nɔm aa poombɔ kon nɔla mò faŋan fuɲa naa ikɛi le, o faŋan pɛ tuŋ, fallo koma vu.

²³ Má dimul naa aa te naa n hin a pɔmbɔ naa lum kon te, aa naa n fúlà lɛ nɔm o hɔl te.

²⁴ Mɛɛ naa n muungu o buɛi nɔmndo lo, fuɲa naa pɛɛn, mí n kɔ downun ndu kona mɛɛ n soo yɛ.

²⁵ Tuma fuɲa naa kalaa dimul naa aa naa n muungu nanu mì n hun pindu nda baloo-o,

²⁶ mí n dimul ndu maa le kɔla naalan nin ndon, fɔ mì n kɔɛ a pɔmbɔ naa o ba. Kani te n kue naa ndaa le, n nɔla lɛ mì n fula langbanɔ kon o hɔl te.

²⁷ O kon mí fuɲa naa dimul naa aa: ‹Niaa pila sina maa poaa nda ŋiɔn koni Rasɛl laa ni vilul-la ni.

²⁸ Mí o pilɔɔ hialun ya, mí visi biyaa sɔam ndu, i ci lɛ ndu le few.

²⁹ Te la cua vɛlɛ pɛ hoo, mì la kɔɛ a ndu ya levil, mì dɛnɛ vɔɔn kɔ tosalan ndu, mɛɛ la yɛɛ ya ciee-piɔ́m a mɔnɛi o yuuvɛi nii nin.›

³⁰ Le hee, te i muungu pɛ fuɲa nuu o ibuŋ, mì kue a poombɔ o holnun hoo holnɔn bɛndoo mó kaola ndu taw-vo le,

³¹ te o ci ndu le, o co vunnɔn. O tosan yɛ pɛ lende, mɛɛ naa buɛyaa nɔmnda n yɛɛ ndu ciee-piɔ́m a mɔnɛi o yuuvɛi nin ni.

³² Kani ya Yuda, mí cua kpemaa o fuɲa nuu lo le sɔɛi poombɔɔ ho, mí dimul ndu aa: ‹Te i cuu nɔm ndu le, haki kon vanin ya o lebol nɔm o hɔl le fɛɛn a fɛɛn.›

³³ Lelan, i tɛɛlun nɔm a yandi, cɛl mì ya Yuda siŋnun cɛ nɔmndo o fonda poombɔɔ ho, haliko mo muungu nda bɛndaa ndɔa.

³⁴ I bɛnda mì muungu o fuɲa nuu lo le, te o co a poombɔɔ ho le. Kani i yeema mi kɔ cɔ fuɲa nuu mɔnɛi biyɔɔ le.»