Fulaa 26 - BII BILA

Le Calta Mɛlɛka lan tangullo

¹ «Ma tangul Calta Mɛlɛka lan a kolala keeselan tɔ́, la nda muulian lɔu a kɛila kpeendaalan, a kolala yiiŋii saala nda yin a kaan-ndan, la nda yin yinɔɔ siaŋa sɔɔtɔtɔɔ lan a la nda yin yinɔɔ siaŋa vólotótoo lan-ndan. Mì vanaa caa sɔɔluuo taw-va tuuliaa mɛlɛkaa kanda ɲɛm Hala-on-nda lecoo.

² Mì kola oo kola va bandei dunndo bidiin a leŋɔmaa, buo dunndo lehiɔɔlu. Kola oo kola bɛnda mò nɔ bandei a buo lende kpafii.

³ Mì laŋuɛɛnulan la ciiŋian nɛɛ pilɛ, mì la sɔndun. O kon, laŋuɛɛnula tɔ̀lan la siow vɛlɛ sɔndɔn nɛɛ pilɛ.

⁴ Ma bayiaa kɛila nda yin a kaan-ndan maa n'kela o kola mɛɛlu o kolala ŋuɛɛnula sɔndun nɛɛ pilɛ lan-ndo, ma bayiaa vɛlɛ lan o kola mɛɛlu o kolala ŋuɛɛnulan lapilɛlan-ndo.

⁵ O kon, mì kɛila lan la bɛnda beleŋuɛɛnu o kpengei pilɛ, beleŋuɛɛnu o kpengei pilɛi, mì la kɔ bɔŋa tumndan nɛɛ pilɛ.

⁶ Ma tosa bawlan beleŋuɛɛnu a sianion le kolalan biyɔɔ latulu a lan, haliko mi Calta Mɛlɛka lan la va latomboliaa ɲɔɔ ndu pilɛ.

⁷ O kon kɔɔli, ma tosa vɛlɛ kolalan a yiiŋii cuinnda le Calta Mɛlɛka la lan vuɔɔ a lan, a bɛnda ma tosa lan tɔ́ a ò pilɛ.

⁸ O kɛ́-kɛ̀ bɛnda mò va bandei dunndo beleyaa, buo dunndo lehiɔɔlu, o kɛ́-kɛ̀ bɛnda mò nɔ bandei a buo lende kpafii.

⁹ Ma ciiŋiaa laŋuɛɛnulan nɛɛ pilɛ, ma ciiŋiaa vɛlɛ laŋɔmpumndan lapilɛlan nɛɛ pilɛ, ma tuisi o ŋɔmpumndɔɔ o cɛi-kola-toandaa kon laci.

¹⁰ Ma bayiaa yoei lakolɛi beleŋuɛɛnu o yáw mɛɛlaa sondoo o kpengii tasei a o kpengii diinndɔɛi.

¹¹ Ma tosa bawlan beleŋuɛɛnu a daɲan, ma sɔɔ lan o yoei lakolɛi ken nin, haliko mi cɛi-kola-toandaa kon tombolan lende, mò va ɲɔɔ ndu pilɛ.

¹² Le kolala hiawnin-ndan yɛ, kpengii lakolɛi tálɛi hiawnin-nde pɛɛn, ndi bɛnda mì i tol o Calta Mɛlɛka la lan a makɔɔ.

¹³ Kola hiawnin bandei o kpengon dunndo lepilɛn-pilɛn kpengeí a kpengei pilɛi-yo, ndú bɛnda mò tol o kumbun miuŋun Calta Mɛlɛka la lan le lan kumbɔɔ.

¹⁴ Ma tomboliaa yáwla saa kóndóla nda yin yinɔɔ siaŋaa lan, ma kumbu cɛi-kola-toandaa-labɔɔŋian kalaa a lan, ma tomboliaa vɛlɛ yáwla kálà-kálàlan.»

Yɔmnde o cɛi-kola-toandaa-labɔɔŋianndo nin

¹⁵ «Ma tosa pɛngɔn a yɔm akasia le Calta Mɛlɛka la lan, ma tɔl mun lɛŋ.

¹⁶ Mì pɛngɛi pilɛ va bandei dunndo tɔ́, buo dunndo lepilɛ a tálá.

¹⁷ Ma toosiaa ɲɛlan le ɲɛla tiɔnnda bii pɛngɛn kalan tumndo o kpengon-ndan sɔɔŋiaa lenin. Ma toosiaa pɛngɛn co mun le Calta Mɛlɛka lan-ndon kpow lende.

¹⁸ Ma tosa pɛngɛn mun bidiin le Calta Mɛlɛka lan a ba too.

¹⁹ Ma toosiaa ɲɛla pɛngɛn mun kɛsinin tumndan nin-ndan belehiɔɔlu a volin humbon le pɛngɛn bidiin mun, ma handu lan latiɔn-tiɔnndan o pɛngɔn n'pilɛn-pilɛnndon bɛngu, le ɲɛla tiɔnnda bii pɛngɔn tumndo o kpengon-ndan tɔlɔɔ lenin.

²⁰ Ma tosa vɛlɛ pɛngɔn bidiin lende le Calta Mɛlɛka la lan a maluaŋ,

²¹ mì mun bɛɛ va n'tɔalaa o fondala pɛngɔn kɛsi tumndan nin-ndan belehiɔɔlu nin, la toosian a volin humbon-ndan pɛɛn, latiɔn o pɛngɛi ipilɛ bɛngu.

²² Le o Calta Mɛlɛka la lan a makɔɔ, ma tosa pɛngɔn mún ŋɔmpum le kpengii paalen le del-le.

²³ Ma tosa vɛlɛ pɛngɔn mún miun le cɔɔloo sungbuma co o sɔngilan-ndan yoomuan lueiyo o Calta Mɛlɛka la lan a makɔɔ.

²⁴ Mì pɛngɛn mun va n'baalanndon mún miun lebɛngu, mì n kɔ luei bolle o kelɛi pilɛi nin lecoo. Lende n bɛnda ni mi n va ɲɛ pilɔɔ, mì n va o sɔngila tiɔnndan.

²⁵ Pɛngɔn bɛnda mì n va mún ŋɔmaa a fondala pɛngɛn mun kɛsi tumndan nin-ndan tɔ́ a laŋɔmpum, la toosian a volin humbon-ndan, latiɔn o pɛngɛi ipilɛ bɛngu.

²⁶ Ma toosiaa kandola Calta Mɛlɛka la lan tan ŋuɛɛnu a yɔm akasia le kpengei ipilɛ,

²⁷ tan ŋuɛɛnu le Calta Mɛlɛka lan kpengei pilɛi vɛlɛ, tan ŋuɛɛnu le a makɔɔ, ba paalen le del-lo pɛɛn.

²⁸ Kando tɛɛndo ndu bɛnda mò kei o pɛngɔn tɛɛn kínɛí, cɔn o cɛi-kola-toandaa-labɔɔŋian kon kpengeí, kɔ tiiya o kpengeì pilɛi, mò va tɛɛn déŋ.

²⁹ Ma yikpa pɛngɛn mun kpow a sianion. Ma toosiaa kelan kandola lan la bɛnda le luɛyɔɔ nin-ndon a sianion, ma yikpa vɛlɛ kandola lan a sianion.

³⁰ Tangul Calta Mɛlɛka la lan mɛɛ ya cɔm nɔm tuu ndɔɔ o pembei coo yɛ kpafii.»

³¹ «Ma toosiaa kola-landaa a kolala keesela nda lɔ a kɛila kpeendaala nda yin a kaan-ndan, la nda yin yinɔɔ siaŋa sɔɔtɔtɔɔ lan a la nda yin yinɔɔ siaŋa vólotótoo lan. Mì vanaa caa sɔɔluuo taw-va tuuliaa mɛlɛkaa kanda ɲɛm Hala-on-nda lecoo.

³² Ma landu kola kon o sungbuma hiɔɔluma cɔwnun a pɛngɛn akasia mà yikpa mun a sianion-ndan, a bawla n'sianilan, sungbuma nɔ man tumndan o fondala toosian a volin humbon-ndan nin-ndan pɛɛn.

³³ Ma landu kola-landaa kon o bawla lan bɛngu, ma hivi kesu kpemaa o kola-landaa kon lekɔɔli. Kola-landaa kon vanin pɛɛngulan Fonda-Diandaa a Fonda Diandaa-Diandaa tɛɛn le niaa ni.

³⁴ Ma kɛsi kumbu kesu kpemaa o kesu kpema kon coo o Fonda Diandaa-Diandaa nin.

³⁵ Ma simi tabalio o kola-landaa kon lekɔɔli baa pilɔɔ o Calta Mɛlɛka la lan a maluaŋ, ma kɛsi ɲɛ kɛsiaa lafitinaa o tabali kon hɔl-ndɔ a ba too.

³⁶ O kon kɔɔli, ma toosiaa kola-landaa celen a kolala keesela nda lɔ a kɛila nda yin a kaan-ndan, la nda yin yinɔɔ siaŋa sɔɔtɔtɔɔ lan a la yin yinɔɔ siaŋa vólotótoo lan le dio cɛi-kola-toandaa-labɔɔŋianndo, mò va o sɔɔlaa ɲɛkɛndɛi.

³⁷ Ma toosiaa sungbuan man ŋuɛɛnu a pɛngɛn akasia le kola-landaa kon landɔɔ lon, ma yikpa pɛngɛn mun a sianion, mà toosiaa bawlan a sianion, ma baŋ ndan o pɛngɛn kalan. O kon kɔɔli, a cɔw fondala sungbuma man ma kɛsinin tumndan nin-ndan taŋ ŋuɛɛnu a daɲan.»