Ɛstɛr 3 - BII BILA

Haman tambu kɔllo a Mardosee

¹ Dɛnnda lan hiovɔɔ, mí masaa Sɛrsɛs ca Haman po Hammedata fula o polale Akak len nin-ndo ɲia. Mó siinguu ndu bolle simlacia va ndu o ba bɛngu-a kpow.

² Vanaa baalaa va o cɛi lemasaa nin-nda kpow a va vulan baŋɔɔ a tundɔnndo Haman o labɛngunin. Lende masaa ndóò dimi ni. Kɛ Mardosee cɛl le tundɔnndo a le vulan baŋɔɔ ndu o labɛngunin lɔ́ɔ́-lɔ́ɔ̀ le.

³ Mí vanaa baalaa kan ɲuna ndu le kɔlɔ o va tɔŋ masaa yii-yo tɛɛmbuuo-o.

⁴ A va ndu sɔɛi pilɛi ken ɲunaa lɔ́ɔ́-lɔ́ɔ̀, kɛ Mardosee ve nda lani yaŋɔɔ le. Mó va nda dimullo maa Yuifnɔɔ o va ni. O kon, má kɔ lɔalu ndu o Haman ndo le sinaa te ndóò lonin o diom o dimi kon-ndo coo.

⁵ Mí Haman pila dɔaw sɔɛi ken taasi lekɛ́ndɛi maa Mardosee ve tundɔn le vulan baŋɔɔ ndu o labɛngunin te. O kon mó tuulu kɔllo taw.

⁶ Má dimul vɛlɛ Haman maa Yuifinɔɔ Mardosee va ni. Le hee, Haman hini lɛ kɔl le Mardosee diyɔɔ ndu pilɛ kpé le. Mó tuunun o kɔl le Yuifia va o masale Sɛrsɛs len nin-nda kpow ciiyo.

⁷ O vɔsi tɔ́ a o diinndɔɔ nin o masale Sɛrsɛs len bɛngu, o paangii tasei nin, paangii Nisan pɛɛn, má vuu purim (kon co dimio ni aa «Siondei malɔɔ») Haman o hɔl le paalen a paangii ndíì bɛnda le sɔɔn ndóò tuu mún le tosaa-on-nde sinaa. Mí sionden le bii pangii tɔ́ a idiinndɔɛi, paangii Adar pɛɛn.

Hamam yeema le Yuifia diwvo

⁸ Mí Haman dimul masaa Sɛrsɛs aa: «Vannda pum co a sɛŋiannda vannda tɛɛn o tàndàla co o masale nɔmnden nin-ndan nin. Tɔŋnda ndalan la co ɲɛ pilɛ tɔŋnda caanda le, à bii vɛlɛ tɔŋnda masaa le. Nduyɛ, taa mal nda pɛ o ba ndaa coo lende, o co dɛnɛ kɛndɛ le.

⁹ Lelan taa cɛl pɛ, tɔŋndo handun le nda diwvo. Ya Haman, i tuunin volin latámán kilolan vaalan kɛmɛ leyáá (300 000), mì yɔngu vanaa co baalaa o masale nɔmnden nin-nda mun le vowvo o kesu lemasaa nin.»

¹⁰ O kon mí masaa solin kelɛi o isu, mó yɔngu Haman po Hammedata fula o polale Akak len nin-ndo, ó va kon yaamɔɔ Yuifia-o.

¹¹ Mí masaa dimul Haman aa: «Volin nɔmndon va nɔm o ba, i mal nɔm vɛlɛ vanaa kalaa o ba. Tosa hɛnan nɔmndo a nda.»

¹² Paangii tasei va malɔ tɔ́ a leyàá, má veelu vanaa sɛvaa masaa, má sɛval vanaa lebolla, masaa n'bungaa yɛ́-yɛ́a a simlacia va vannda coo-a sɛbɛlan. Mí sɛbɛla lan la sɛwviaan o sɛvala yɛ́-yɛ́lan nin a o sɔɔn mangalan yɛ́-yɛ́n va o lɛŋnde len nin-ndon nin. O diola masaa Sɛrsɛs lan nda sɛva sɛbɛla lan ni. Pondale ndɔlen koni ndáà handu vɛlɛ lecoo ni.

¹³ Má viam kiilaa a sɛbɛla lan le lan yɔɔ o kobila lebolta lemasalan nin, le vannda dimullo maa a tɛɛmbuu Yuifia, mà diw nda, mà cii nda selemenden: felengia, vanaa yuuvɛiya, cuaambɔa a vanlaandua, mà cɔwviaa ɲɛm ndan kpow o paale ten pilɛ bɛngu. Paale ndáà tuu le dɛnɛ kon tosaa len le va paale tɔ́ a leyàándɔlen o paangii tɔ́ a idiinndɔɛi nin ni, paangii Adar pɛɛn.

¹⁴ O tàndà oo tàndà nin, sɔɛi lemasɛi ken ndíì bɛnda le yondanndo vannda súúlan kpow o lani, haliko mi ndáà va a bɛɛndiannda le paale len.

¹⁵ Mí kiilaa piɔl a kiltan a sɛbɛla lan maa mɛɛ masaa ndóò dimi yɛ. Mí sɔɛi ken i yondan o kobi lebollo Suse nin. O kon, mí vanaa va o kobio Suse nin-nda luɛi o buulan bɛndoo nin. Telen kon, masaa Sɛrsɛs nda Haman nda vannun icali mɔima nda kolɔɔ.