Tɔŋ miingua 13 - BII BILA

¹ La bii sɔɔn ya co niaa dimullo-on kpow, mì la kela lecoo. La handu ɲɛ-ɲɛ lecoo le, la faŋa vɛlɛ ɲɛ-ɲɛ lecoo le.»

La del halaa fondoa kɔɔli le

² «Te vana-tɛɛngaa-diom Hala-o pum, te kon te vana sina kɔlɔ lɔma sɔlaan-ndo pum hun cɔmnun pɛ niaa tɛɛn, te o tosa pɛ dɛnɛ kaamaa pum, te kon te mò dimi sɔɛi co hunɔɔ yɔnnɔn-nde,

³ hali sɔɛi o dimi-e te kon te lɔma o sɔl-lan ma peelun, te o dimul niaa pɛ aa: ‹La n kɔnnun mì n kɔ soolun halaa celeŋaa naa n sina le-a›,

⁴ la yaŋ nilan o sɔɛi vana-tɛɛngaa-diom Hala kon te, te kon te o sɔɛi vana sina kon kɔlɔ lɔma sɔlaan-ndo le. Kani a vanaa súú vaa lende Mɛlɛka Hala niaa vanin keiyo le niaa kɔlɔɔ solio ni. Lende o vanin tosaa ni le sinaa te la kaola ndu lekɛ́ndɛi a kɔlta niaalan kpow a á yoomu niaa kpow.

⁵ Mɛlɛka Hala niaa ndu pilɛ kpé niaa bɛnda le lou kɔɔli ni, a ndu kínɛí niaa bɛnda le siòònde nɔu ni. La bii tɔŋnda ndɔlan, mì la yaŋ nilan o diom ndɔɔ. Ndu pilɛ niaa bɛnda le baalaa tosallo ni, ndu pilɛ niaa bɛnda le holnɔnndo ni.

⁶ Le vana-tɛɛngaa-diom Hala kon, te kon te vana sɔlaa malɔ kon, o bɛnda mò sɔla piɔ́mndo. Kani ndu va tosa ni mì vannda ndáà simul Mɛlɛka Hala niaa, ó soli niaa o lɛŋnde Esipte len nin mó faŋa niaa o cɛlen nin-ndo. Vana kon ndóò yeema mì ndóò faŋa niaa o nɛi Mɛlɛka Hala niaa dimul niaa le kɔlan coo-o coo. Nuaa niaa bɛnda ni mi la faŋa dɛnɛ vɔɔndo niaa tɛɛn.

⁷ Te puapilɛ nɔmndo, bɛ nɔm, te kon te pɔmbɔ nɔm kala pilɔɔ, po nɔmndo, cua nɔmndo, laa nɔm n kaola taw-vo, te kon te caan nɔm kɛndɛ-kɛndɔɔ pum hin pɛ o vionnɔnndo nin le nɔm lueiyo o pɔwlan nin, mò dimul nɔm aa: ‹N kɔ mì n kɔ sooluu halaa celennda, halaa nɔm pila a fuɲaa nɔmaa mamaa sina paandu le-a,

⁸ halaa vanaa súúla celennda co sooloo-a a pum, halaa vanaa co niaa macɛlu-a a vanaa co niaa levil-la co sooloo-a, á co icali o lɛŋnden kandɔnndo háá nɛɛ le mɛɛlu-a-a›,

⁹ cɛl tuu ndɔ kon te, yaŋ nilan o sɔɛi ndɔɛi le. Handɔɔ o kon coo, tosa iɲíí a ndu le, kumbu ndu isulal te, vian tɛɛmbuu ndɔɔ le.

¹⁰ Kɛ a bɛnda ma dii ndu. Nɔm fɔlɔn bɛnda ni ma vɛ ndu a powvo le ndu diyɔɔ, o kon kɔɔli vanaa tɔ̀a sɔɔnguu niko nɔm mayoomu.

¹¹ A powtan n lonin ndu viiyo ni háá mo vi, kani ndóò yeema le nɔm faŋaa o nɛi Mɛlɛka Hala nɔmndo coo, o soli nɔm Esipte nɛɛ n va o cɛlen nin-nda-o.

¹² Lɔ́ɔ́ Israɛlaa tɔ̀a tuɛinin sɔɛi ken-ndo, siòònde biinin nda, o kon vana tosa lɛnin dɛnɛ vɔɔn vaa lende niaa tɛɛn te.

¹³ Te la tuei pɛ maa o kobila Mɛlɛka Hala niaa ke niaa le calle lan o pilɛ nin,

¹⁴ Israɛlaa fondoa pum a cɛn, má luei vanaa co o kobi kon nin-nda o pɔwlan nin, má dimul nda aa: ‹N kɔ soolun halaa celeŋaa naa n sina le-a›,

¹⁵ la bɛnda mì la fɛfɛla sɔɛi ken, mì la nuwviaa ndi lebɛngu ɲɛkɛndɛi, mì la ɲuuniaa vannda o sɔɛi ken coo. Te toɲaa dɛnɛ kon yɔŋnun ni, te o va pɛ maa dɛnɛ nɔɔlɛi kon tosan niaa tɛɛn,

¹⁶ la bɛnda mì la diw vanndacieea a cɔlua co o kobi kon nin-nda a mɔɛi cɔwve. La bɛnda mì la tɛɛmbuu kobi kon a ɲɛ-ɲɛ co lenin le Mɛlɛka.

¹⁷ Mì la cuungiaa bolofaa vanin o kobi kon nin-ndo kpow o falii ndɔɛi tɛɛn, mì la lom kobi kon a bolofaa kon kpow le Mɛlɛka Hala niaa. Kobi kon bɛnda mò lo ciee pɔmndo le fɛɛn a fɛɛn, vana mingi lɛnin ndu tangul te.

¹⁸ La pilan ɲɛ-ɲɛ o ɲɛm bɛnda le tɛɛmbɔnndo o dangaa bɛngu-on nin te, haliko mi kɔltuw Mɛlɛka Hala niaa pɔlul. Mí Mɛlɛka tuinin niaa iɲíí, mò tosal niaa dɛnɛ kɛndɔɔ, mì la kui taw-taw maa mɛɛ o yiilu fuɲaa niaa mamaa kpemaa yɛ.

¹⁹ Kon tosannin, te la bii pɛ diom Mɛlɛka Hala niaa ya co niaa hau tɛɛngullo-o mì la kela lecoo, handɔɔ o kon coo mì la tosa dɛnɛ sandaa ndu o hɔl.»