Tɔŋ miingua 1 - BII BILA

SƆƐI TASEI MOISE DIMI-E (1—4) Sɔɔn Moise dimul Israɛlla Yurdɛn leeloo-on

¹ Sɔɔn mun Moise dimul Israɛlla kpow o peo Yurdɛn leeloo, o lɛŋnde veselɛilen nin ni. A va vɔ o dɛɛla co Suf o hɔl-ndɔ-o nin, Paran a Tofɛl tɛɛn, Laban, Haserɔt a Di-Sahab tɛɛn.

² Cɔnɔnndo o pembei Horɛb, keiyo a nɛi kei a pembei Seir-o, kɔ tiiya háá Kadɛs-Barnea, palɛi tɔ́ a lepilɛ vana tosa o kɔlan nin ni.

³ Vɔsilan belehiɔɔlu o cɔnɔn ndaa Esipte kɔɔli, o paale taselen coo o paangii tɔ́ a ipilɛndɔɛi nin, mí Moise tɛɛngul Israɛlla sɔɔn Mɛlɛka sɔɔ ndu o sondo le nda-on kpow.

⁴ Kon tosan o nɔla Moise nɔla masaa ha-o kɔɔli: Sihon masa Amoriia, ò kobi ndɔ lebollo va Hɛsbɔn-ndo a Ɔk masaa Basan, ò nda nɔla Edrei-yo, ó va icali Astarɔt a Edrei-yo.

⁵ Yurdɛn leeloo, o lɛŋnde Moab len nin Moise tɛɛngul nda tɔŋ kon ni.

Hala dimul Israɛlla le kɔlan

⁶ Tuma naa n va o pembei Horɛb-o, mí Mɛlɛka Hala naa soaa o naa lo, mó dimul naa aa: «La viow nin bɔɔ icali o pembei he ikɛi.

⁷ Lelan, la puusiaa dɔ́ɔ́ngɔ́ɔ̀ mì la kɔɛ laci. La kɔ o tàndá n'pembu Amoriia nin a o tàndàla balu lon-ndan kpow nin: dɛɛlala vesɛilan, pembon, dɛngbɛlan, tàndá co o mɛmma ihɛllan kɔngɔ-o, Nekɛv a o mɛnndan demullo. La luɛi o lɛŋnde Kanannda nin a o lɛŋnde Liban-nden nin háá o pee bɛndoo Efrate.

⁸ La tofa vɔ, i yɔngu niaa lɛŋnde len, la luɛi lenin mì la hɛlu len. Lɛŋnde len Mɛlɛka yiilu fuɲaa niaa mamaa Abraham, Isaak a Yakɔb kpemaa le nda len yɔngoo nda cuavaa ndaa imamaa le fɛɛn a fɛɛn ni.»

Sɔɛi vanaa kialaa n'yamaa ndáà hɛli lɔ́ɔ́ kon-nda

⁹ «Tuma kon, mí yáà dimul niaa aa: ‹I nɔla kpekula niaalan toosiaa ya pilɛ le.

¹⁰ Mɛlɛka Hala niaa vangala niaa, mí la kui taw. La co nin sɛ́lɛ́ taw maa loeon o halataala.

¹¹ Màá Mɛlɛka, Hala fuɲaa niaa mamaa vangala niaa vɛlɛ vaalan o vaalan nin, mì la kui taw-taw! Màá o dɔw niaa duaa mɛɛ o yiilu niaa kpemaa yɛ fɔ́!

¹² Ya pilɛ kpé, vɛ̀ɛ̀ ya nɔla yɛnin niaa hɔlla landɔɔ coo kpede? Vɛ̀ɛ̀ ya nɔla yɛnin mì toosiaa balahavɛila niaalan a sɛɛngiannda niaalan?

¹³ Lelan, o polama niaan nin, la hɛli vanpiaandua kendu kɔl-la, á sina dɛnɛ-a, á nɔ diola kɛndɛlan-nda, mì siinguu nda simlacia niaa.›

¹⁴ Mɛɛ ya dimi lende, mí la mulul-la maa sɔɛi ya tuu ken-nde co bɔɔ sɔɛi kɛndɛ.

¹⁵ O kon mí cua vanaa va bolii lapangɛi o polama niaan coo-a, vanpiaandua kendu kɔl-la, á nɔ diola kɛndɛlan-nda, mí handu nda simlacia o kundala n'van vàá-vàálan, o kundala n'van kɛmɛ-kɛmɛlan, o kundala n'van beleŋuɛɛnu-beleŋuɛɛnulan a o kundala n'van tɔ́-tɔ́lan coo, mí siinguu nda vanaa toosiaa n'sɔɔa le polama niaan.

¹⁶ Tuma kon, mí dimul vanaa kialaa n'yamaa niaa kan aa: ‹La yaŋ nilan o kɔɔsɔla puapilɛa niaa ɲɛkɛndɛi, mì la kelu yamɛi sakpo le dɛnɛ yɔŋnun vanndo nda puapilɛ ndɔɔ, te kon te nda miallo tɛɛn-ndo.

¹⁷ La hiyan vannda mì la sim vana kɔɔli o yamɛi kiolɔɔ nin te. La yaŋ cuaambɔɔ nilan mɛɛ niaa yaŋ kaasonɔɔ nilan yɛ. La yɔŋ isiòòn le vana-vana le, kani Hala o ba yamɛi kiolɔɔ i fula ni. Te kɔɔsɔɔ pum hiow niaa pɛ mayoomu, la cuu ya ndu, i tofa dɛnɛ kon lenin.›

¹⁸ Lende ya cɔm niaa lɔ́ɔ́ kon ɲɛ niáà bɛnda le tosaa-o ni.»

Mɛɛ Israɛlla ndáà kindi nilan lɔ́ɔ́ kon a sɔɛi Mɛlɛka-e yɛ

¹⁹ «O kon kɔɔli, mí n faŋan o pembei Horɛb, mí n kei o lɛŋnde veselɛile bɛndu-bɛndule lueì len vana siòònde len nin, le niaa ce len pɛɛn. Mí n kɔa o tàndá n'pembu Amoriia nin maa mɛɛ Mɛlɛka Hala naa pila dimul naa yɛ. Mí n tiiya Kadɛs-Barnea.

²⁰ Mí dimul niaa aa: ‹Mí la cè mɛɛ niaa tiiya o tàndá n'pembu Amoriia nin yɛ, o Mɛlɛka Hala naa yɔngu naa-o.

²¹ La tofa vɔ, Mɛlɛka Hala niaa mal lɛŋnden niaa o ba. Lelan, la kɔ mì la kɔ hiɔlu len mɛɛ Mɛlɛka, Hala fuɲaa niaa mamaa dimul niaa ndi yɛ. La yɔ́ŋ isiòòn te, la ɲííyà le.›

²² O kon mí niaa kpow hun komal-la, mí la dimi aa: ‹N yeema vɔ fɔlɔn mì n vem vanpiaandua pum naa laci, haliko ma kɔ tosa suansuaannden, mà mɛɛndian lɛŋnde kalalen. A cii pɛ, a hun downun naa kona, a cɔm naa nɛi naa n bɛnda le keiyo mi n luɛi lon-ndo, a kobila naa n bɛnda mì n luɛi nin-ndan.›

²³ Mí tuu kon hɛnan ya, mí hɛli vanpiaandua tɔ́ a à ŋiɔn niaa tɛɛn, lepola oo lepola vana pilɛ.

²⁴ Má bii kɔlan a ba tàndá n'pemboo, má tiiya o dɛɛlaa Ɛskɔl, má mɛɛndian ndu a taasi.

²⁵ Má kiandu kɔmnde tɔlɔɔlan o lɛŋnde len nin, má cuu naa. O kona nda dɔwnun-ndo nin, má dimi aa: ‹Lɛŋnde Mɛlɛka Hala naa yɔngu naa len le co bɔɔ lɛŋnde kɛndɛ!›

²⁶ Kɛ mí la kɛɛ le kɔlan o lɛŋnde len nin, mí la kɛɛ le sɔɛi Mɛlɛka Hala niaa dimi-e biyɔɔ.

²⁷ Mí la soaa sɔɔn vɔɔnndon, mí la cɛɛŋun o cɛila-kolala-toandaala niaalan nin, mí la dimi aa: ‹Le tùú Mɛlɛka nɔ nɛyɔn naa-o o soli naa o lɛŋnde Esipte len nin ni. O yeema mò vɔngul naa Amoriia o ba, mì kan cii naa diw.

²⁸ Te o co yɛ pɛ lende, le yɛɛ naa n co yɛ heelu? Puapilɛa naa soli naa yoomuan má dimi aa vanaa kan a hiow naa vaa sɛ́lɛ́, a hiow naa vɛlɛ kpaayaa, aa kobila ndalan la co bɔɔ kobila bɛndu, la co lakungaalan a kpakilan háá o halataala. Mí n ca bɛɛ polale Anak len ndon.›

²⁹ Mí mulul niaa aa: ‹La ɲííyà le, la yɔ́ŋ isiòòn a nda le.

³⁰ Mɛlɛka Hala niaa, o co kɔlan niaa laci-o, ndu pila cɔlɔbanin le niaa mɛɛ o cɔlɔba Esipte le niaa niaa pila kpow o hɔl-lɛ,

³¹ lende koni i yɔŋnun o lɛŋnde veselɛilen nin ni. Lon niaa sina ni maa Mɛlɛka Hala niaa landu hɔlla niaa coo mɛɛ fuɲaa landu hɔlla po ndɔɔ coo nuaa yɛ. Nɛɛ-nɛɛ niaa kei, lende o lo niaa hɔlla landɔɔ coo ni háá mi la hun tiiya nanu.›

³² Kɛ a kon kpede, la laalan Mɛlɛka Hala niaa le.

³³ Nduyɛ, ndu va kɔlan niaa laci le niaa fondala niaa bɛnda le dɔ́ɔ́ngɔ́ɔ̀ kilaa lan nuwviallo ni. Icɔl, o va kɔlan niaa laci o tindile leyinnden nin le niaa nɛi niaa va kɔlan coo-o teengiallo, ipala o va kɔlan niaa laci o tindile ikumnden nin.

³⁴ Mɛɛ Mɛlɛka tuei sɔɔn fula niaa o sondo-on, mó tuulu kɔl, mó mɛnan aa:

³⁵ ‹Vanaa lanila kalua ha, o pilɛ bɛɛ ci lɛŋnde kɛndɛle ya yiilu fuɲaa ndaa mamaa kpemaa le nda len yɔngoo len te.

³⁶ Fɔ Kalɛb po Yefune-o canin nden ni. Lɛŋnde o kela len nin-nden, i yɔngunin ndu pila a cuavaa ndɔa imamaa len, kani o lo o lediom coo a ya Mɛlɛka.›

³⁷ Mí Mɛlɛka tuulu vɛlɛ kɔl a ya le dɛnɛ niaa, mó dimi aa: ‹Nɔm Moise bɛɛ a luei o lɛŋnde len nin te.

³⁸ Kɛ nduyɛ, Yosue po Nun-ndo, vana nɔm malaa, ndu co luɛyɔɔ lenin. Lelan luei ndu yoomuan. Kani ndu lueinin Israɛlla o lɛŋnde len nin ma hɛlu len ni.›

³⁹ O kon kɔɔli, mí Mɛlɛka soaa vɛlɛ o niaa lo nuaa: ‹Cuavaa niaa daama, a niaa va dimio maa yaamɔaa niaa co nda diw-va, poaa niaa sina vɔ haa sɛyanndo dɛnɛ kɛndɔɔ a dɛnɛ vɔɔndo tɛɛn te-a, nda luɛinin o lɛŋnde len nin ni. Nda ya yɔngunin nden ni, nda loonin nden ni.

⁴⁰ Niaa yɛ, la muungu mì la kɔɛ o lɛŋnde veselɛilen nin a kpengii mɛmma ihɛlma makpɛ̀ndɛ̀an.›

⁴¹ O kon mí la mulul-la aa: ‹N cua hakio a Mɛlɛka, kɛ o va bɛɛ lende, n kɔanin mì n tosa cɔwvo mɛɛ Mɛlɛka Hala naa dimul naa le tosaa yɛ.› Mí vana-vana cua ɲɛm ndɔn cɔwvon, niáà laalan ko maa niáà helnin o pembei coo bɛɛn-bɛɛn.

⁴² Kɛ mí Mɛlɛka dimul-la aa: ‹Kuuna nda aa a hel le cɔwvo tosaa le, yɔŋii yaamɔaa ndaa diw nda. Kani ya Mɛlɛka, i co nda tɛɛn te.›

⁴³ Mí soaa o niaa lo taw, kɛ la yeŋ nilan o sɔɛi nii le. Mí la kɛɛ Mɛlɛka diom, mí la hel o pembei coo a hɔlaa heelaa.

⁴⁴ O kon mí Amoriaa co icali lon-nda fula, má kuel niaa, má toaw niaa mɛɛ lɛa toaw vana nuaa yɛ. Má kandu niaa koŋɔɔ Seir, má kɔ mɛɛlu niaa háá Hɔrma.

⁴⁵ Mɛɛ niaa muungu, mí la kɔ caŋ Mɛlɛka o hɔl, kɛ o yeŋ niaa lani le, o yeŋnun koŋul niaa va kon-ndo le.

⁴⁶ Ken tosa ni mí la viaw Kadɛs taw-taw.»