2Korɛntea 10 - BII BILA

Mɛɛ Pol soo a baala ndɔɔ o kɔɔ yɛ

¹ Ya Pol, i co niaa tɛɛlɔn o yeela Krista-o nin a o vanakɛndɛyɛi ndɔɛi nin, ya vana vannda co hoo dimio maa te i va pɛ niaa tɛɛn, i soo fɛ́ɛ́-fɛ́ɛ́ a niaa, kɛ te i va pɛ niaa levil, i soo a hɔlta kalalan-ndo.

² I co niaa tɛɛlɔn, te i kɔɛ pɛ o niaa lo, la tosa mì soo a hɔlta kalalan o niaa lo le. Kani i yeema mì soo a hɔlta kalalan o vannda pum ndo, a co yiyanndo maa a yeeman ivanacieeyan o lakɔl naa n co kelaa ni-a.

³ I co toɲa maa vanndacieea naa n co ni, kɛ n co cɔlɔba o ivanaciea nin te.

⁴ Kani ɲɛm cɔvun naa n co cɔlɔbaa-on n co ɲɛm cɔvun n'vanndaciee le. Kɛ ɲɛm cɔvun kpaayan Hala yɔngu-on n co ni, n vana tɛɛmbuu fondala mayoomulan-ndon. Naa n co vanaa co tùúla fondolan tɛɛmbuuo-a ni.

⁵ N co yiyannda lacòòvalan a sɔɔn yongan kɛ́-kɛ̀ n co dɛnɛ sinaa Hala-o simullo tɛɛmbuuo, mì n va kɔltan kpow mingio nɛɛ pilɛ le diom Krista-o biyɔɔ.

⁶ Nduyɛ, telen niaa biinin sɔɛi nɛi-yo, naa bɛɛ n bɛɛndiannin le vanaa tui naa diom te-a dɛnɛ palaa tuisio coo.

⁷ Mɛɛ niaa co dɛnndan cɔw yɛ niaa co lan biyɔɔ ni. Te vanndo laalan pɛ maa le Krista o co ni, mɛɛ mò sínà maa naa bɛɛ le Krista naa n co ni.

⁸ Kani hali i lisan bɛɛ ɲɛ-pɔmbɔ le kpaaya Mɛlɛka yɔngu naa le niaa yoomuan lueiyo-o, o co le niaa tɛɛmbuu le, siɛmbula biinin ya le ken te.

⁹ I yeema mì vana yiyan te maa siòònde ya luei niaa o sɛbɛla nilan nin ni.

¹⁰ Kani vannda co dimio aa: «Diomnda co o sɛbɛla Pol-tan nin-ndan la vɔw bɔɔ, la hɛnan vana o tueyɔɔ le, kɛ ndu pila va pɛ naa tɛɛn, vana ci ndu ɲɛ-ɲɛ le, vana luei bɛɛ sɔɛi ndɔɛi yii le.»

¹¹ Mɛɛ mì vanaa co dimi kon lende-a sínà maa mɛɛ naa n soaa o sɛbɛla naalan nin n ve niaa tɛɛn te yɛ, lende koni naa n kɔ vanin vɛlɛ niaa tɛɛn o dɛnndan nin ni.

¹² Kani n tɔɔndan bɛɛ le siimanndo, te kon te le tuwvanndo a vanaa nɔ yiyannda vaa lende-a a pum te. A co kan nda pila cuannɔnndo maa ɲɛ tuvaa-a, nda pilaa tɛɛn nda co tuuŋanndan ni. Diɔmnda nda co ni.

¹³ Naa naa, n kilu yonga mí n hiow ba le, n va pɛ yongaa kiolɔɔ, n mɛɛlu o fonda Hala kilu naa le baalaa tosaa-o, kon mala ni mí n tiiyaa háá o niaa lo.

¹⁴ N nɔla mì n hiow pɛɛngula naalan coo le, vana ca ko bɛɛ maa n tiiya háá o niaa lo le. Naa n yɔŋnun vanaa tasea le tiiya haa o niaa lo a Yoongu kɛndɛ Krista-o dimio ni.

¹⁵ Lelan n kilu yonga mì n hiow ba a baala caanda tosa-o le. Kɛ n nɔ tiindanndo maa laalan niaa cɔɔlunnin, o kon mì fonda vali naa n tosa niaa tɛɛn-ndo hiow laci, nduyɛ, n hiwnin pɛɛngula hendulun naa lan coo le.

¹⁶ O kon kɔɔli, n hiawnin laci mì n kɔɛ o lɛŋii celen nin, mì n kɔ dimul vannda Yoongu kɛndɔɔ. Kani n yeema mì n lisan a baala caanda cii tosa-o o kɔɔ le.

¹⁷ Vana va pɛ yongaa kiolɔɔ, ndu kiolu ndu o Mɛlɛka nin.

¹⁸ Kani o co vana lisàn haliko mi vannda a bii ndu biyɔɔ kɛndɔɔ-o le Mɛlɛka cɛl te, fɔ vana ndu Mɛlɛka lisa-o.