Jonasɨ 2 - bjv Makɨtɨbɨ lə Luwə kɨ ta Nangɨnda

Jonasɨ əl ta kɨ Ɓaɓe lokɨ to me kanjɨ tɨ

¹ Ɓaɓe adɨ kanjɨ kɨ bo re ur Jonasɨ. Jonasɨ to ndɔ mɨtə me kanjɨ tɨ.

² Lokɨ to me kanjɨ tɨ no̰o̰ ə əl ta kɨ Ɓaɓe Luwə ləne ə nə:

³ «Lokɨ mi dan nḛ kɨ to tɨ, M-no̰ dɔ Ɓaɓe tɨ ə oo dɔ no̰ ləm. M-no̰ m-ɓar-e, Lokɨ mi dan lokɨ koo tɨ, Nɨngə oo dɔ ndum.

⁴ Ɨlə-m lo kɨ ndul kururu tɨ, pungɨ ba tɨ, Man gugɨ dɔm sɨpɨ, Pungɨ man je kɨ kɔr man je ləi, mani dɔm tɨ kɨ go-naa go-naa.

⁵ Adɨ m-ɔjɨ ta mem tɨ m-ə nə: “Mi ka m-ra nḛ madɨ Luwə tuwə-m kɔ ta kəmne tɨ”. Re e be ka, M-a m-o kəy kaw-naa ləi kɨ ay njay kɨn ɓəy.

⁶ Man uwə-m mɨndɨm tɨ adɨ mi ta yo tɨ. Wale je kɨ baa ɓɨndi mi ɓɨndɨ ɓɨndɨ.

⁷ M-aw bɨtɨ m-ɔdɨ gɨn ba, Lokɨ mbal je ɨsɨ bəi tɨ. Nangɨ tɨbɨ tane dɔm tɨ adɨ tam tḭ. Nɨngə gɨn ɓe koy tɨ kɨ əbɨ bɨngɨ, Ḭ Ɓaɓe Luwə ləm ɨtḛḛ səm tɨ kare.

⁸ Lokɨ m-ɔr mem dɔ rɔm tɨ ngata nɨngə, Mem ole dɔ Ɓaɓe tɨ. Be ə, Ta kɨ m-əl səi aw ratata tḛḛ mbi tɨ, Lo kɨsi tɨ kɨ ay njay.

⁹ NJé kuwə kul yo je kɨ ndade goto, Nḛ kɨmə ləde mbata kajɨ ləi ḭ Luwə goto.

¹⁰ Nə mi, M-a m-adi kadɨ-kare. Nɨngə m-a m-un ndum ta, kadɨ m-ra-i oyo tɔ, Ə ndu kun je pətɨ kɨ m-un m-adi ka, M-a m-a dɔ tɨ tɔ. Tadɔ m-ɨgər kadɨ ḭ Ɓaɓe kɨ kari ba ə ajɨ-m.»

¹¹ Ɓaɓe əl ta kanjɨ adɨ tɔmo̰ Jonasɨ dɔnangɨ tɨ kɨ tutɨ.