रोमी 2 - बारेली पावरी

परमेश्वरोन धोरमीन नियाव

¹ आखरी, हे गुणू लागाळने वावा, तू कुदुबी काहा नी होय, तू रिकामा छे; काहाकि जिनी वातोमा तू दिसरा पोर दोष लागाळे तिनी वातोमा तू खुदो काजे बी गुणावू ठेरावतलु, इनान कोरता कि तु जू गुणू लागाळलु खुद बी चो काम कोरतेलू.

² आमु काजे मालूम छे कि ओसला-ओसला काम कोरणे वावा पोर परमेश्वर भूनी गोथू खोरला दोंडन आग्या होयतेली.

³ हे माणसो तु जो ओसला-ओसला काम कोरने वावा पोर गुणू लागाळतलु एने तू खुद चो काम कोरतेला छे. काय तू यो सोमजे कि तू परमेश्वरोन दोंडोन आग्यासी वाच जाय?

⁴ काय तू तेरी दया एने सहन शीलता एने धीरोज रूपी धोन काजे गोलोत सोमोजतलु? काय यो नी सोमोजतलु कि परमेश्वरोन दया तुसेक मोन फिरावने सीकाळे?

⁵ बाकीन तू आपनी रीसोमा एने होट्टी मोनोन वोजेसी तेरा रीसोन दाहळान कोरता, जीनामा परमेश्वरोन खोरलो न्याय प्रगट होयसे, तेरेन कोरता रीस कोमाय रोयू.

⁶ चू होर एक जोना काजे तिंदरे कामोन अनसारे बदलू देसे;.

⁷ जू वारला कामोन एकुत जागे उबो रोयीण, महिमा एने, आदर, एने ओमोर हेरेमा छे तीनुक चू ओमोर जीवन आपसे;

⁸ बाकीन जू विवादी छे एने खोरला काजे नि मानतेलु बाकीन अधोरमोन काजे मानतलु तीनु पोर रीस पोळसे,

⁹ एने तोकलीत एने सोंकट होर एक माणसोन जीवो पोर जू बुरो कोरतेलू आवसे, पेहेले यहुदि पोर ओवतेन युनानीपोर;.

¹⁰ बाकीन महिमा एने आदर एने कल्याण होर एक काजे जोळसे जे वारलो कोरतेला छे, पेहेले यहुदा काजे ओवतेन युनानी काजे.

¹¹ काहाकि परमेश्वर कुदान भेदभाव नि कोरतेलू.

¹² इनान कोरता जे बिना शास्त्रनियमोन पाप कोऱ्या, चे बिना नियम शास्त्रान नाश बी होयसे, एने जे नियम शास्त्र काजे लीन बी पाप कोऱ्या, तिंदरू दोंड नियमोन अनसारे होयसे.

¹³ काहाकि परमेश्वरोनचा नियम काजे सोमोवनेवावा धोरमी नि होय बाकीन वचनोन अनसारे चालने वावा धोरमी ठेरायसे से.

¹⁴ ओवतेन जेतार दिसरा जातीन माणसे जिंदरे जू नियम शास्त्र नि होय, तिंदरा स्वभाव सी नियम शास्त्रान वातो पोर चालतला, ती नियम शास्त्र तिंदरे जुव नि होयनेन वोजेह बी चे तिंदरेन कोरता खुद नियम शास्त्र होता.

¹⁵ चा नियमोन वाते आपना-आपना मोनोमा लिखलो देखाळे एने तिंदरा विवेकोण बी गोवायी आपे एने तिंदरी चिंता तीनुक गुणू लागाळे नीती निरदोष ठेरावे.

¹⁶ जीने दाहळे परमेश्वर मारा वारली खोबरोन अनसारे येसु मसिहन लारे माणसोन डूकायला वातोन नियाव कोरसे.

यहुदि एने नियम

¹⁷ अगर तू खुद काजे यहुदि कोये, नियम शास्त्र पोर भुरसू कोरे, परमेश्वरमा घमंड कोरे.

¹⁸ एने तेरी मोर्जी जानतू एने नियमोन शिक्षा लीन वारला वातो काजे वारू जानतलु छे.

¹⁹ एने आमरेपोर भुरसू मेके कि मे आंदवान अगवू एने आंदारलामा पोळला वाटू विजावो,

²⁰ एने बिन बुद्धी वावाक भोनावनेवावु, एने पुऱ्याक सिकाळन्यू छे. एने ग्यान एने खोरलायीन नमुनु, जो नियमोमा छे मेसेक जुळलो छे. नी अविस्वासी होईन परमेश्वरोन वायदा पोर शंका कोऱ्यु.

²¹ आखरी काय तू जू दिसराक भोनावे, तू खुदो काजे नि भोनावे? काय तू जू चुरी नि कोरणेन प्रचार कोरे?

²² तू जो कोये “भुंडला विचार घन कोरे,” काय तू खुद भुंडलो काम कोरे? तू जू मूर्तीसी रीस कोरे, काय तू खुद मंदीर काजे लुटे.

²³ तू जू वचनोन. बारामा मे घमंड कोरतेला छे, काय नियम नि मानीन परमेश्वरोन अपमान कोरतेला?

²⁴ “काहाकि तुमरे वजहेसी दिसरा जातीमा परमेश्वरोन नाव बोदनाम होयतो होतो,” जोसो लिखलो बी छे.

खतना फायदु नि होयनो

²⁵ अगर तू नियम शास्त्र पोर नि चाले ती सुंतामा फायदु ते से, बाकीन अगर तू नियम शास्त्र काजे नि माने ती तारो सुंता, नि सुंता वावा सारखु गीनायसे. (यिर्म. 4: 4)

²⁶ ती अगर सुंता वावा माणसे नियमोन विधी काजे मानतु रोये ती काय तेरा बिना सुंतान हाल काय सुंता वावान सारकी गीनायसे.

²⁷ एने जू माणूस डीलोन रूपमा बिना सुंता रोयू अगर चू नियम काजे पुरो कोरे, ती काय तुसेक जो लिखलो लेने एने सुंता कोरायने पोर बी नियम काजे मानतला नि, गुणावा गीनायसू

²⁸ काहाकि चे यहुदि नि जा निसता बारथेला रुपमा यहुदि एने नि चू सुंता छे जू सामने बी छे एने डीलमा बी छे.

²⁹ बाकीन यहुदि चा छे, जा डीलमा छे, एने सुंता छे, जो मोनोन एने आत्मामा छे, नि ते लेखोन, असो कि बोडाय माणसोनचा गोथा नि, बाकीन परमेश्वरोनचा छे.