प्रकाशित वाक्य 20 - बारेली पावरी

भुतडा काजे 1000 सालोन कोरता आगठाम नाखनो

¹ पोछु मे एक सोरग दूत काजे सोरगे गोथू उतरतेलु देख्यू, जेरा हातोमा उंडा खाडान कुची एने एक मोटली साकव होती.

² चू तिना अजगर, मतलब जूनला घोळसा काजे, जू इबलीस एने भुतडू छे, धोरीन होजार सालोन कोरता बांध देदु,

³ एने तीनाक उंडा खाडामा घालीन बोंद कोर देदा एने तिना पोर छापा लागाळ देदा कि चू होजार साल पुरो होयने तोक जाती जातीन माणसो काजे पोछु नी विसरावे एरेन ओवतेन छाचलीन छे कि चू थुलिक वारोन कोरता पोछु उगडाय जासे.

⁴ ओवतेन मे सिहासन देख्यू, एने तिना पोर माणसे बोस गोया, एने तीनुक नियाव कोरनेन होक आपाय गोयू, मे तिंदरी आत्मा काजे बी देख्यू, जिंदरा मुंडका येसुन गोवायी देणे एने परमेश्वरोन वचनोन वोजेसी काटाय गोयला होता, एने जे नी तिना जोनावरोन, एने नी तेरा मूर्तीन पूजा होती. एने नी तेरा छापू आपना निंडावा पोर एने हातो पोर ली लेदला होता. चे जीवतला होयीन मसिह साते होजार साल तोक राज कोरता रोये.

⁵ जेतार तोक जे होजार साल पुरा नी होया तेत्यार तोक बाकी मोरला नी जीव उठे यो ते पेहेलो पोछो जीव उठनो छे.

⁶ सोयावा एने चुखला चे छे, जे एरेन पेहेले पोछो जीव उठनेन भागीदार छे ओसलापोर दुसरा मोरोनोन कायबी होक नी होय, बाकीन परमेश्वर एने मसिहन पुजारू होयसे एने तिंदरे साते होजार साल तोक राज कोरसे.

भुतडान विनाश

⁷ जेतार होजार साल पुरो होय जासे ती भुतडू बोंदीमा गोथू छुळवाय जासे.

⁸ चू तिना जात्या काजे जे कोवीन चारू धोळे होसे, मतलब गोग एने मागोक काजे जोतरी गिनती दोरीयान रेवतो बोराबोर होसे भूलवाडीन लोळायीन कोरता एखठा कोरनेन निकवसे.

⁹ चू आखा कोवी पोर पोसरीन चुखला माणसोन साहवू एने मोंगावान गाव काजे घेर लेसे; एने आगठो सोरगे गोथो उतरीन तीनुक नाश कोर देसे.

¹⁰ तीनुक भूलवावने वावु भुतडू आखठो एने गंधकोण तिना झीलमा, जिनामा चू जोनावर एने झुटू भविष्य कोरणे वावू बी होसे, घालाय जासे; एने चे रात दाहळू कायम पिढामा तोडपता रोयसे.

धोव्वा महासिहासन एने आखरी नियाव

¹¹ एने मे एक मोटलु धोव्वु सिहासन एने तिना काजे, यु तिना पोर बोस रोयू, हेरे सामने सी कोवी एने वादवो वाटाय गोया, एने हिंदरेन कोरता जागा नि जोडी.

¹² पोछु मे नानला मोटला आखा मोरला काजे सिहासनोन सामने उभरोहलू देख्यू, एने किताबे उगळी गोया; एने ओवी पोछि एक किताब उगळाय गोयी; मतलब जीवनोन किताब; एने जोसो तिना किताबमा लिखायलो होतो, तोसोच हिंदरा कामोन अनसारे मोरलान नियाव कोराय गोयू.

¹³ दोरीया तीना मोरला काजे जे हेरेमा होता आप देदू, एने मोरनो एने अधोलोक तीनु मोरला काजे जे हिंदरेमा होता आप देदा; एने हिंदरेमा गोथो होर एक कामोन अनसारे तिंदरू नियाव कोराय गोयू.

¹⁴ मोरनो एने अधोलोक बी माणसे आगठान झीलमा घालाय गोया जो आगठान झील दुसरो मोरोन छे;

¹⁵ एने जेरो कुदान नाव जीवनोन किताबमा लिखायलो नि जोळ्यो, चू आगठान झीलमा घालाय गोयू.