प्रकाशित वाक्य 15 - बारेली पावरी

प्रकोप सी भरायला सात सोनान वाटका

¹ पोछु मे सोरगोमा एक एने मोटू एने नेवलायन निशाणी देख्यू, मतलब सात सोरग दूत जिंदरे जुव सात आखरी तोकलीत होता, काहाकि तिंदरो सोर जाणेसी परमेश्वरोन रीसोन आखरी छे.

² तेत्यार मे आगठो मेवायलो काचो सारखो एक दोरीयु देख्यू; एने जे माणसे तिना चिल्ला पोर एने तेरी मूर्ती पोर एने तेरे नावोन आकळा पोर जीत गोयला होता, तीनुक तिना आरसीन दोरीयान साते परमेश्वरोन फेपाऱ्या काजे लीन उबरोयलु देख्यू.

³ चे परमेश्वरोन दास मुसान गीत, एने गाडरान गीत गावीन-गावीन कोयता होता, “हे आखी ताकत वावा प्रभू परमेश्वर, हे युगान युग राजा, तारी चाल ठीक एने खोरली छे.”

⁴ हे प्रभू, कून तुसे काजे नि बिहे एने तारा नावोन महिमा नि कोर? काहाकि निस्तु तूत चुखलु छे आखा जात्या उठीन तेरे ओगोव नोमोन कोरसे, काहाकि तारा नियावोन काम आव लागलो छे.

⁵ तेरे बाद मे देख्यू कि सोरगमा गोवायीन तंबून मंदीर उगळाय गोयो;

⁶ एने चे सात सोरग दूत जिंदरे साते सात तोकलीत होता, मलमल पोर सोनान पट्या बांधीन मंदीरमा गोथा निकव्या.

⁷ तिना चारू जोनावरमा एक तीनु सात सोरग दूत काजे परमेश्वर, जू कायम जीवतलु छे, कि रीससी भोरला सात वाटका आप्यू;

⁸ एने परमेश्वरोन महिमा एने तेरु ताकतोन वोजेसी मंदीर धुवाळासी भोराय गोयो, एने जेतार तोक सात सोरग दूतोन सात तोकलीत सोर नि गोया तेत्यार तोक कुदू मंदीरमा नि जाय सोक्यू.