याकुब 5 - बारेली पावरी

मालदार काजे सलाह

¹ हे मातभोर, सोमवी ते लेयू, तुमु आपना आवने वावा दुखो पोर आयळीन-आयळीन रोडू.

² तुमरो धोन बिगडी गोयलो छे एने तुमरा कापळा काजे किळा खाय गोयला छे.

³ तुमरो सोनो चांदी मा कीट लाग गोयली छे; एने वेदाय तुमरे पोर गोवायी देसे, एने आगठा ओगोव तुमरो मास खाय जासे, तुमु आखरी टेमोमा धोन एकठो कोरला छे.

⁴ देखू, जे कामगार तुमरा खेत काटला, तिंदरी जी दाहाळकी तुमु मेक लेदला छे आयळी रोय, एने चूपने वावान विनता सेनान प्रभून कानटे तोक पुग गोयली छे.

⁵ तुमु जोगोमा भोग विलास मा लागला रोया एने सोवटो हि सुख लेदा तुमु मारनेन दाहळा वाटू आपना मोनोन पालन पोषण कोरीन तीनाक जाडू-ताजू कोऱ्या

⁶ तुमु धोरमी काजे गुणावू ठेरावीन मार नाख्या, चू तुमरो सामना नि कोर सोकतू.

धीर धरणो

⁷ तेरेन कोरता हे भाशो, प्रभून आवने तोक धीर धोरू देखू खेतो वावु जोगोन किमती धानोन आस राखतु जाईन पेहेलु एने आखरी पाणी पोळने तोक धीर धोरतला छे.

⁸ तुमु बी धीर धोरू; एने आपने मोन काजे पाको कोरु, काहाकि प्रभून आवनेन दाहळू साते छे.

⁹ हे भाशो, एक दिसरा पोर दोष मा लागाळू, काहाकि तुमु गुणावा नि बोने; देखू नियाव कोरन्यू झोपला पोर उभू छे.

¹⁰ हे भाशो, जिना भविष्य कोरता मसिहन नावोमा वाते कोरला, तीनुक दुख चुटनो एने धीर धोरणेन एक वारू सोमजू.

¹¹ देखू आपु धीर धोरणेन वावा काजे सोयावा कोयतेला छे तुमु अय्युब धीरोन बारामा ते सोमवला छे, एने प्रभूनचा गोथो जू तेरो प्रतीफोव होयलो तिनाक भी जान लेदला छे, तेरेसी मसिहन घोन मोटी दोया एने मोंग प्रकट होयली छे.

¹² बाकीन हे भाशो, आखान मोटी वात जी छे कि कोसोम नि खाणो, नि सोरगोन, नि कोवन, नि कहाणली चीजोन बाकीन तुमरो वात हाव ती हाव एने नि ती नि होये, कि तुमु दोंडोन लायक नि ठोहरे.

भुरसान प्रार्थनान ताकत

¹³ ओगर तुमरेमा कुदू दुखी छे, ती चू प्रार्थना कोरे ओगर खुशीमा छे, ती चू स्तुतीन भोजन गावू.

¹⁴ ओगर तुमरेमा कुदू मांदलो छे, ती मंडवीन डाह-डाहाक बुलावू, एने होयू प्रभू येसु मसिहन नावोसी तेरे पोर तेल लागाळीन तेरेन कोरता प्रार्थना कोरसे,

¹⁵ एने भुरसान प्रार्थनान लारे मांदला वाच जासे एने परमेश्वर तिनाक उठाडीन उभू कोरसे; एने ओगर चू पाप भी कोरलु होसे, ती तेरी माफी होय जासे.

¹⁶ तेरेन कोरता तुमु आपनेमा एक दिसरान ओगोव आपना-आपना पापो काजे मान लेवू, एने एक दिसरा कोरता प्रार्थना कोरु, कि वारू होय जासे धरमी जनोन प्रार्थनासी सब काय होय सकतलो छे.

¹⁷ एलिया बी ते आपनेन तोसो दुख सुख वेठलु माणूस होतु; एने चू रावन्या कोरीन प्रार्थना कोऱ्यु कि पाणी नि पोळे; एने साळे तीन साल तोक धोरती पोर पाणी नि पोळ्यु.

¹⁸ ओवतेन होयू प्रार्थना कोऱ्यु, ती वादवाम गोथू पाणी पोळ्यु एने धोरतीन फोव आपी.

¹⁹ हे मारा भाशो, ओगर तुमरेमा कोयी खोरा रस्ता मा भोटकी जासे एने कुदू तीनाक फिरवीन लावे.

²⁰ ती चू यो जान लेये कि कुदू कुदा भोटकने वावा पापी काजे पोसू लावसे, चू एक जीव काजे मोरनेसे वाचाडसे एने लेके पापो पोर पोरदु नाखसे.