इब्रानियो 5 - बारेली पावरी

पुढारीन कोरता लायकी

¹ आखा महायाजक माणसोमा गोथो नेवळाय जातलो छे, एने माणसोन कोरता नेवळाय जातलो छे, तिना वातोन बारामा जो परमेश्वर साते नात राखे, ठराय जातलो कि पापोन कोरता भेट एने बलिदान दुयू चोळाव्या कोरे.

² चू नासोमोज एने भोटकला नोरमाइसी व्यहवार कोर सोकतलु, काहाकि चू खुद बी निर्बलतामा घेराय रोयतलु.

³ इना वजेसी चू निसतू नी माणसोन कोरता बाकीन आपनेन कोरता बी पापोन बलिदान चोळाव्या कोरे.

⁴ एने यो सन्मान कुदू आपसोत नी लेतलु, जेतार तोक हारुन सारकु परमेश्वरोन तोरोफसी बुलवाय जाणे पोर तीना काजे जोळतलो.

कायमोन कोरता पुढारी

⁵ इना रितीसी मसिह बी महायाजक बोननेन मान खुद नी लेदलु बाकीन चू आपलु जू तीना काजे कोयू, “तू मारू पुऱ्यु छे आज मे तुसे काजे पोयदा कोरलु छे.”

⁶ इना रितीसी चू एक दिसरा जागा पोर बी कोये कि, “तू मल्कीसदियक सारखू कायम पुजारू छे.”

⁷ आपना डीलोमा रोयनेन दाहळामा मसिह तीनासी जू तीनाक मोरनेमा गोथू वाचाड सोकतू जुरेत आवाजमा आयळीन एने आसवा वोयाळी वोयाळीन प्रार्थना एने विनता कोऱ्यु एने भोक्तीन वोजेसी तेरो सोमवाया गोयो.

⁸ पुऱ्यु होयने पोर बी चू दुख वेठी वेठीन आग्या पावने सिक्यू.

⁹ चू पाकु बोनीन तेरी आग्यान पालन कोरने वावान कोरता ओमोर जीवनोन छुटकारान झोर बोन गोयू.

¹⁰ एने परमेश्वरोन एने मल्कीसदियकन रिती पोर महायाजक नेवळाय गोयू.

आत्मिक मा कमजोरी

¹¹ आमु काजे तेरे बारामा घोनो काहीन कोयनू छे, जेरो सोमोजनो काठो छे, इनान कोरता कि तुमु मोटोत सोमवने बाज गोया.

¹² तुमु काजे हिमी तोक एने परमेश्वरोन ते मास्तर होय जानो होतो, ते बी यो गोरोजोन होय गोयली छे कि कुदू तुमु काजे एने परमेश्वरोन वचनोन आदी शिक्षा सिकाळ सोके. तुमु ते ओसा होय गोया कि तुमु काजे खाणान नी बाकीन दुदोन गोरोज छे.

¹³ आखात जे दुद पितला चे धोरमीन वचनोन भागीदार नी होय, काहाकि चे पुऱ्या छे.

¹⁴ बाकीन खाणो ते मोटलान कोरता छे, जिंदरी ग्यानइंद्रिय भोनता-भोनता वारला भुंडलो उवोखनेन हुशार होय जाय.