2 तीमथी 3 - बारेली पावरी

आखरी दाहळान चेतावनी

¹ पुन यो फोम राख कि आखरी दाहळामा भुंडलु टेम आवसे.

² काहाकि माणूस मोतलोबी, लालची, मोटायकी, बुराई कोरणे वावू, आसी बासोन आग्या टावने वावू भुंडलु, अपवित्र.

³ दया नी करनेवावु, क्षमा नी कोरने वावु, चुगली कोरन्यू, असयंमी, मोटकायी, वारलान दुष्मोन,

⁴ भुरसू तुडने वावु, ठीठ, घोमोंडी एने परमेश्वरोन नी बाकीन सुखविलासन भी चाहनेवावा होयसे.

⁵ होया भोक्तीन तोसा ते कोरसे, पुन हिंदरी ताकत काजे नी माने; हीनु गोथा ओलोग रोयजू.

⁶ इनूमा गोथा होया आवसे छे जे घोरमा मोनोन भोराय जातला छे एने हीनु गरीब बायरा काजे तंबूमा कोर लेतला छे जी पापे मा दाबायली एने हर भातीन भुंडली मोर्जीन ताबामा छे.

⁷ एने दाहळीन सिकती ते रोयतली छे पुन खोरला वातोनचा लोगुन कोबी नि पुगतली.

⁸ जोसो कि यन्नेस एने यम्ब्रेस मुसान विरोध कोरला होता, तोसोत यो, बी खोरलान विरोध कोरतेला छे, होया ओसला माणसे छे, जिंदरी बुद्धी खोतम होय गोयली छे, एने होया भुरसान बारामा रिकामा छे.

⁹ पुन होया इंदरे गोथा ओगोव नि जाय सकतला, काहाकि जोसो इंदरी अग्यानता सोब माणसो पोर प्रगट होय गोयली होती होसी हिंदरी बी होय जासे.

मसिही जीवनमा दुख झेलणो

¹⁰ बाकीन तू प्रचार, चाल चलन, मोर्जी, भुरसू, सहनशक्ती, मोंग, धीर, एने वेला पाळेने, एने दुख उठावनेमा मारू साथ देदलु;.

¹¹ एने ओसला दुखोमा बी जू अन्ताकिया एने इकुनियुम एने लुस्त्रा मार पोर पोळला होता, एने जो दिसरा दुख बी झेललु होसे; पुन प्रभू मेसेक इनू आखान चा गोथू वाचाड लेदलु.

¹² बाकीन जोत्रा मसिह येसुमा भोक्तीन पुठी जीवन जीवने हिंडे तीनु आखा काजे वेला पाळसे.

¹³ पुन दुष्ट एने भडकावने वावा धोकू देतला एने धोकू खातला, बिगडी जातला.

¹⁴ पुन तू हीनु वातो पोर जो तू सिकलू होतु एने भुरसू कोरलु होतु यो जानीन पाकु बोनीन रोय कि तू हीनु कहानला माणसोनचा गोथू सिकलू छे.

¹⁵ एने बचपनसी नियम शास्त्र तारो जानलो छे, जो तुसेक येसु मसिह पर भुरसू कोरनेसी छुटकारू हासील कोरनेन कोरता बुद्धिमान बोनाव सोकतलु छे.

¹⁶ आखो पवित्र शास्त्र परमेश्वरोन ओगवाईसी बोनावलो से एने प्रचार एने सोमजाडने, एने सुधारणे, एने धर्मान भोनने फायदान कोरता छे.

¹⁷ काहाकि परमेश्वरोन माणसे वारला बोने, एने हर एक माणसे वारला कामोन कोरता तीयार होय जाये.