1 तीमथी 5 - बारेली पावरी

मंडवीन माणसो साते वागणूक

¹ काहना डाहला काजे मा लोळे, पुन हिनाक बास जानीन सोमवाळ दे एने जुवान्या काजे भाश जानीन;

² डाहली बायर काजे आश जानीन; एने जूवानाय बायर काजे आखी चुखलायसी बहोनिश जानीन सोमवाळ दे.

रोनडायलान मदत

³ तीनु रोंडायला काजे, जो खोरी रोंडायला छे मान सन्मान कोर.

⁴ ओगर काहनली रोंडायलीन पुऱ्या या सोगायता होय ती होया पेहेल आपने घोरल्यान साथे भोक्तीन तोसा रोयने जुवे, एने तेरा आसी बासा आखा काजे हर एक काजे तिंदरू होक आपने सिक, काहाकि यो परमेश्वर काजे गोवतेलो छे.

⁵ जे छाचलीन रोंडायला छे, एने जेरा कुदू नी होय, ची परमेश्वर पोर आस राखे, एने रात दाहळू विनता एने प्रार्थनामा मग्न रोयतली छे;

⁶ पुन जी सुखोमा पोड गोयी, ची जीवतलीत मोर गोयी.

⁷ इनी वातो काजे बी आग्या आप्या कोरजू काहाकि होया निरदोष रोये.

⁸ जर कोदि कुदु आपनी भूनी खास कोरीन आपना घोरोन चिंता नी कोरे ती होयू भुरसू नी राखणेवावासी बी भुंडो बन गोयलो छे.

⁹ हिनी रोंडायलीन नाव लिखनो जुवे जी साठ साल गोथी कम नी होय एने एक जोनान लाडी रोयी होसे.

¹⁰ एने वारला कामोमा गीनाय रोई होसे, जीन पुऱ्यान राखवावी कोरी होसे; पाहांतऱ्यान चाकरी कोरी होसे, चुखला माणसोन पाय धुवी होसे, दुखी माणसोक मदत कोरी होसे, एने हर एक वारला काममा मन लागाळली होसे.

¹¹ पुन जुवान रोंडायलान नाव नि लिखनो, काहाकि जेतार चो मसिहन खिलाप कोरीन सुखमा पोड जातली छे, ची वियाव कोरणे कोरतेली.

¹² एने गुणावी होय जातली, काहाकि होई हेरा पेहेला भुरसा काजे छुळ देदली छे.

¹³ एरे पुठी होई घोर-घोर फिरीन उजगाय बोन गोयली छे, एने निस्तु उजगाय नि पुन बकबक करती रोयतली एने दिसरा कामोमा हात बी नी नाखतली एने रिकामा वाते बुलतली छे.

¹⁴ हेरेन कोरता मे चाहो कि जुवान रोंडायला, वियाव कोरे एने पुऱ्या पोयदा कोरे एने घोर-बार सोमावे दुसरा दुष्मोन काजे बदनाम कोरनेन टेममा आपु.

¹⁵ काहाकि कोतराक जोना भुतडान पोछोव जात रोया.

¹⁶ अगर कहानी विस्वासीन सारीक रोंडायला होसे, ती होयू हिंदरी मदत कोरे कि मंडवी पर भार नि जुवे, काहाकि होयो हिंदरी मदत कोरीन जी छाचलीन रोंडायला छे.

वचन काजे सिकाळन्यान सन्मान

¹⁷ जे डाह-डाहा वारला पुरती कोरतेला छे, खास कोरीन चे जे वचन सोमवाळने एने सिकाळनेमा मेहनत कोरतेला छे, दुय गुणा आदरन लायक समजनो जुवे.

¹⁸ काहाकि पवित्र शास्त्र कोयलो कि “डोखारन्या बुलोन मूय नि बांधनो” काहाकि “दाहाळक्या तिंदरी दाहाळकीन होकदार छे.”

¹⁹ कहानलू गुणू काहनला डाह-डाहा पर लागाळे ती बिना दुय या तीन गोवाह काजे हिनाक नि सोमवी.

²⁰ पाप कोरणे वावा काजे आखा सामने सोमजाड दे, काहाकि ओवी माणसेबी बिहे.

²¹ परमेश्वर एने मसिह येसु एने नेवाळला सोरग दूतोन हजर जानीन मे तुसेक जोताळीन कोयो कि मन खुलीन इनी वातो काजे मान ले, एने कानलो काम बिना रुकीन नि कोरे.

²² कुदा पोर चालूत हात घोन मेके एने दिसरान पापोमा नी भेसकायनो; खुदो काजे चुखला बोनावीन राखनो.

²³ भविष्यमा निस्तु पाणीत पिणेवावो नी रोयनो पुन आपने भूनी तारो घोळी-घोळी मांदलु होयनेन वोजेसी थूडू-थूडू आंगुरोन रोस भी काममा लाव्या कोर.

²⁴ काहना माणसोन पाप प्रगट होय जातला छे एने नियावोन कोरता पेहलुत पुग जाणे, पुन कुदु पोछोव गोथा आवतेला.

²⁵ होसा भी काहनला वारला काम बी प्रगट होय जातला छे एने जे ओसा नी रोयतला, होया बी डूकाय नी सोकतला.