Zefaniya 1 - Bhiblia Yo Sawuleka

Ditshiku da kulamula ka Txizimu

¹ Adiya dipswi da Mkoma, di nga ta ka Zefaniya, mwana Kusi, mwana Gedhaliya, mwana Amariya, mwana Ezekhiya, ka masiku a Josiya, mwana Amoni, mfumeli wa ka Judha.

² Ni na fuvisa sotshe si si kuho ha mafuni, kuwomba Mkoma.

³ Ni na fuvisa vathu ni sihari, ni na fuvisa sinyana sa nzuma ni sihaka sa linene, ni sikhunguvanyiso sa va wubihi; kambe ni na fuvisa vathu txitimwi ka mafu, kuwomba Mkoma.

⁴ Se ni na nawuluta dianza dangu txitimwi ka Judha, ni txitimwi ka votshe vaaki va Jerusalema; ni na fuvisa ka wukhalo wuwa miboti ya Bhahali, ni matina a vale va thumelako sithombe, ni vaphaxeli;

⁵ ni va va khizamelako dibutho da nzuma va di txitimwi ka tinyumba; ni vale va namako ve xambanya ka Mkoma, ni kuxambanya ngu Malikami;

⁶ ni va va lekako kulondeta Mkoma, ni vale va si laviko Mkoma, hambi ku wotisa txilo ngu ngene.

⁷ Malala masoni ka Mkoma Txizimu, nguko ditshiku da Mkoma di hafuhi, Mkoma a lulamisile mphaxo ni kusawulekisa vale a nga va ramba.

⁸ Se ku na maheka taku ngu ditshiku da mphaxo wa Mkoma, ni tsayisa tinduna ni vanana va mfumeli, ni votshe va va ambalako syambalo sa walo.

⁹ Ni na tsayisa kambe ka ditshikuedo votshe vale va ndakako mtshunzuti, va tatako tinyumba ta vanyamne vawe ngu so honyola ngu kulwisa ni kukanganyisa.

¹⁰ Se ka edo ditshiku, kuwomba Mkoma, ku na pfala huwa kukhukhela ka Txike txa Sihaka; ni xomulo kukhukhela ka didhawa da diphya, ni huwa ya hombe, kukhukhela mimangoni.

¹¹ Pekani huwa anu vaaki va Makitesi, nguko votshe vathu Vakanana va gumile, votshe vanyatimale va hoxotilwe.

¹² Se ku na maheka taku, ka yona yile mbimo, ni woningeta Jerusalema ngu malambu, ni tsayisa vavamna vale va khalahatshako txitimwi ka nzambwa yawe, va kukhona ngu mbiluni kwawe: Mkoma kha mahi ta tinene, kambe kha mahi to biha.

¹³ Ngu toneto, yi na handwa thomba yawe, ni kuxaselwa tinyumbani kwawe; kambe va na aka tinyumba, aniko kha va na mbi zumba ka tona, va na phaya mivhinya, aniko kha na mbi yi sela vhinya ya kona.

¹⁴ Ditshiku da hombe da Mkoma di hafuhi, di hafuhi, kambe da kuluveta ngutu dipswi da ditshiku da Mkoma; wamwamna wa mtamo ngutu, a na peka nyandayeyo.

¹⁵ Ditshiku dileya, ditshiku da txiviti, ditshiku da kupandiseka ni kuvilela, ditshiku da kukhundumusela ni kufuvisa, ditshiku da kuphuma ni txidema, ditshiku da marefu ni txidema txa hombe,

¹⁶ disthiku da mpundu ni nyandayeyo, si wukelako madhoropa o tsana, ni sitezi so lapha.

¹⁷ Ni na xanisa vathu, se va na tsimbilisa ku nga mabhofu, nguko va onhete Mkoma; kambe mnoha wawe wu na wavalaswa nga lithulu, se nyama yawe nga nzambwa.

¹⁸ Hambi silivhela yawe mwendo nzalama yawe, kha si na mbi sikota ku va hulukisa, ka ditshiku da kuhenya ka Mkoma, aniko ngu mndilo wa kuhiseka kwakwe, otshe mafu awa ma na fuviswa, nguko kha ditshuri a na lovisa votshe vazumbi va ha mafuni ngu txidhukisa.