Zakariya 6 - Bhiblia Yo Sawuleka

Txiwoniso txa wutxhanu ni siraru: Sikotxikani sa yimbi

¹ Se ni to gula kambe maso angu, ni wona mune wa sikotxikani, si txi huma ngu hagari ka mimango yimbidi, mimango yiya i ti ti mimango ya txikete.

² Txikotxikani txo khata txi ti ndindwa ngu mahantxhi o bhilivila, se txikotxikani txa wumbidi txi ti ndindwa ngu mahantxhi a mtima.

³ Se txikotxikani txa wuraru txi ti ndindwa ngu mahantxhi o basa, txikotxikani txa wumune txi ti ndindwa ngu mahantxhi a matshakatshaka, a mtamo.

⁴ Se ni to khani ka ngelozi yi yi nga ti ti womba-womba ni nani: Awe Nyamne wangu, nza txani sikotxikani siya kani?

⁵ Se ngelozi yi to ni xamula yi txi kha yona: Ayiya i mune wa mimoya ya nzumani, yi humako ngu mu yi nga ti ti kona masoni ka Mkoma wa mafu otshe.

⁶ Txikotxikani txile txi ndindwako ngu mahantxhi a mtima, txiya ditikoni ka Wuphemba, se ale o basa me londeta ngu msana ka ale a mtima, ale a matshakatshaka ma txi ya ditikoni ka Wulambwe.

⁷ Se mahantxhi ale a mtamo ma ti huma me lava kuthangela masoni, ma txi tsimbila-tsimbila ha mafuni. Se ngelozi yi to kha yona: Tsulani, mi tsimbila-tsimbila ha mafuni. Se ma to tsimbila-tsimbila ha mafuni.

⁸ Sekoko ngelozi yi to ni dhana, yi txi kha yona: Wona taku, ale ma nga ya ditikoni ka Wuphemba, ma humutile Moya wangu ka ditiko da Wuphemba.

M'bhoti wa Joxuwa

⁹ Se dipswi da Mkoma di tile kwangu di txi ta kha dona:

¹⁰ Amukela miningelo ya vale va nga yiswa wukhumbini: Ya Heldhayi, ya Tobhiya, ni ya Jedhaya (se uya kwawe ka dona ditshiku dile, u ya wulela nyumbani ka Josiya, mwana Zefaniya), i ku va va nga wuya ngu Bhabhilona.

¹¹ Eko ni khani amukela silivhela ni nzalama, u maha mibhoti, u yi veka ha msungo ka Joxuwa, mwana Jozadhake, mphaxeli wa hombe.

¹² Se m'gele, u txi khawe: Mkoma wa Mabutho a Tiyimbi, a khene: Ndiyo m'thu wu ditina dakwe i ku Kuthunga; Ene a na mila ka wukhalo wakwe, kambe a na aka dithepele da Mkoma.

¹³ Ene apune a na aka Dithepele da Mkoma, se a na teka wudhumo, kambe a na khalatsha, a na fuma ha txituluni kwakwe ka wukoma, ni kuva mphaxeli ha txituluni kwakwe ka wukoma, ku nava ni kudikha ka madhawa otshe a mambidi.

¹⁴ Se mibhoti yiya yi na va ya Helemi, ni Tobhiya, ni Jedhaya, ni Hemi, mwana Zefaniya, yi na maha txyalakanyiso dithepeleni ka Mkoma.

¹⁵ Se avale va ku kule, va nata ve ta aka dithepeleni ka Mkoma, anu mi na tiziva ti to Mkoma wa Mabutho a Tiyimbi a ni rumile kwanu; kambe eto ti na maheka, ngako mi txi pfisisa dipswi da Mkoma, Txizimu txanu.