Zakariya 14 - Bhiblia Yo Sawuleka

Mkoma, Mfumeli wa ditiko

¹ Wona taku data ditshiku da Mkoma, ka dona, valala va no abanela asi si nga handwa Jerusalema.

² Nguko ani ni na tshanganisa otshe matiko, me wukela Jerusalema, se didhoropa di na tekwa, tinyumba ti na handwa, vavasikati va na gimwa; hafu ya vathu va didhoropa yi na huma yi yiswa wukhumbini, aniko miboti ya vathu kha yi na mbi tutumiswa didhoropani.

³ Se Mkoma a na huma e yalwa ni matiko awa, ku nga tile a nga lwisa tona ngu ditshiku da yimbi.

⁴ Se ka ditshiku donedo, Mkoma a na ema txitimwi ka mmango wa miolivha, yi yi ku hafuhi ni Jerusalema, ngu didhawa da wutxani; se mmango wa miolivha wu na abaneka ngu hagari, ngu wutxani, ni mswa-ditambo, kambe ku nava ni mkova wa hombe ngutu; hafu ya mimango yi na tshuketa wuphemba, se yimwani hafu yi na tshuketa wulambwe.

⁵ Se mi na tutuma ngu mkova wa mimango yangu (nguko mkova wa mmango wu na hoka kala Azeli), se mi na tutumisa ku nga tile mi nga tutumisa tona, ngu kuzinginika ka mafu, ka masiku a Uziya, mfumeli wa ka Judha; sekoko a nata Mkoma, Txizimu txangu, ni votshe vasawuleki, awe Mkoma.

⁶ Se ku na maheka ka ditshiku donedo tito, kha ku na mbi va ni kuwoninga ka kunene, hambi kuphuma nga ka hunguva.

⁷ Aniko di na va ditshiku do ziwa ngu Mkoma; kha ku na mbi va ni mitshikari mwendo wusiku; se ku na maheka taku, ngu mbimo ya mitshikari ku nava ni kuwonekela.

⁸ Ka ditshiku dile, ku na maheka kambe ti to me khiringela mati, ma txi huma ngu Jerusalema, hafu ya ona yi txi ya ka Linene la wutxani, se yimwani hafu yi txi ya ka Linene la mswa-ditambo, ngu mbimo ya malanga ni ya wuxika, eto ti na maheka.

⁹ Se Mkoma a na maha mfumeli txitimwi ka otshe mafu, ka ditshiku donedo, mmwani a na va Mkoma, se mmwani a na va ditina dakwe.

¹⁰ Dotshe ditiko di na maha libala, kukhukhela Gebha kala Rimoni, ngu wulambwe ka Jerusalema; ene a na guletwa, ni kuaketwa wukhaloni kwakwe, kukhukhela ka txike txa Bhenjamini, kala ka wukhalo wa txike txo khata, kala ka txike txa Dikhonani, ni kukhukhela ka txitezi txa Hananeli, kala ka mapipa a mfumeli.

¹¹ Se va na zumba ka dona, kambe kha ku na mbiswa ku di ni wo rukwa, nguko Jerusalema a na zumba ngu kudikha.

¹² Se awuwa wu na va mtungu wule Mkoma, a no peka votshe vathu vale va nga lwisa Jerusalema: Nyama yawe yi na hetwa va di emile, se maso awe ma na sina ngu mule ka misendo ya ona, ni lidimi lawe li na sina mkanani kwawe.

¹³ Ka ditshiku donedo, ku na maheka ti to ku va ni pfilu-pfilu ya hombe ya Mkoma, hagari kwawe; nguko mmwani ni mmwani a na ñola dianza da mkwawe, mmwani ni mmwani a na nawuluta diwoko e lwisa mkwawe.

¹⁴ Se nene Judha a na lwa a di Jerusalema, kambe tithomba ta matiko otshe ale ma nga gwatama ni Jerusalema, ti na sengeletelwa, nzalama, ni silivhela, ni syambalo so tala ngutu.

¹⁵ Mtungu wa kona wu na va wa mahantxhi, wa mamula, wa makamelu, ni wa timbongola, ni wa sotshe sihari sile si manekako ka mtalo wule, ku nga wule wo khata.

Mkoma, a na khozelwa kona Jerusalema

¹⁶ Ku na maheka taku, votshe vale va no sala, ka otshe matiko ale ma nga lwisa Jerusalema, ma na kwelela dilembe ni dilembe, kuya khozela Mfumeli, Mkoma wa Mabutho a Tiyimbi, ni kuya maha m'buso wa Midhuti.

¹⁷ Se ku na maheka taku, ngako mwaya wokari wu si kweleli Jerusalema, kuya khozela Mfumeli, Mkoma wa Mabutho a Tiyimbi, mwayewo kha wu na mbi nelwa ngu nzuma.

¹⁸ Se hambi i di Vaegipta va si kweleliko mwendo kuta, wu nata kwawe mtungu wule Mkoma a no peka ngu wona, matiko ale ma nga mbi kwelela kuya maha m'buso wa Midhuti.

¹⁹ Atxiya i nava txitsayiso txa Vaegipta, ni ku va txitsayiso txa otshe matiko ale ma si kweleliko kuya maha m'buso wa midhuti.

²⁰ Ka ditshiku dile, ku na bhalwa ni ka sisimbzana sa mahantxhi taku: Ku Sawulekisetwe Mkoma; se tikhadi Nyumbani ka Mkoma, ti na nga timbiya masoni ka txiluvelo.

²¹ Se totshe tikhadi ta Jerusalema ni ta Judha, ti na sawulekiselwa Mkoma wa Mabutho a Tiyimbi, ni votshe vale va no phaxela va nata, ve ta teka ve bhikela ka tona; kambe ka ditshiku donedo, kha ku na mbiswa kumaneka Mkanana Nyumbani ka Mkoma wa Mabutho a Tiyimbi.