Varoma 9 - Bhiblia Yo Sawuleka

Txizimu ni vathu va txona va ka Israyeli

¹ Ani ni womba ditshuri masoni ka Kristu, kha ni hembi, livhalo langu la ni fakazela, na li txi woningwa ngu Moya wo Sawuleka.

² Na pfa kuxaniseka ka hombe ni kupandiseka ko mbi guma mbiluni kwangu.

³ Nguko ani wutumbu ni ndi na tumela kuruketelwa ni kuhambaniswa ni Kristu, idiku eto ti ti vhuna va lixaka la ka kwathu, ava i ku vamwevo ni nani ngu kuvelekwa;

⁴ i ku va ka Israyeli, ava va nga sawulwa ve mahwa vanana va Txizimu, va txi ningwa wudhumo, situmelelano, mlayo, wukhongeli, ni sithembiso;

⁵ avava i ku lixaka la vakokwani vathu, avava hambi Kristu a nga velekelwa kwawe ngu ka wuthu, ene a ku txitimwi ka sotshe somaha, i ku Txizimu txi txi dhumiswako yotshe mbimo. Amen.

⁶ Hi nga ti to dipswi da Txizimu di to txhipa. Ahim-him. Nguko hi nga votshe va va humako ngu ka Israyeli i ku Vaisrayeli va ditshuri;

⁷ kambe hi nga votshe va va humako ngu ka Abrahamu i ku vanana vakwe; nguko ti bhatwe tito: “Aniko vanana va Isaake ngu vona va no dhanwa ku liveleko lako.”

⁸ Ati ti wombako ku hi nga vanana va mtumbuluko ava i ku vanana va Txizimu. Vanana va txithembiso txa Txizimu ngu vona i ku va txona va ditshuri.

⁹ Nguko mapswi a txithembiso ngu awa: “Ni na wuya, aniko Sara a na va a di ni mwanana.”

¹⁰ Atiya kha ta maheka kwakwe dwe, aniko nene Rebheka, a velekile ngu ka wamwamna mmweyo, i ku tate wathu Isaake.

¹¹ Se, na vanana vava va sinzi kuvelekwa, na kambe va sinzi kuziva ta tinene ni to biha, kufela kutsaniswa kusawula kuwa Txizimu txi nga kumaha ngu kuranda ka txona,

¹² Rebheka a getwe ti taku: “Wahombe a na thumela wam'dotho.”

¹³ Madingano ni ti ti nga bhalwa taku: “Ni randile Jakobe ni venga Esawu.”

¹⁴ Se hi na khathu txani kani? Ina hi na khathu Txizimu kha txa lulama kani? Lambi!

¹⁵ Txizimu koko txi to kha txona ka Mosi: “Ni na mahela wumbilu awu ni ti lavako ku mmahela wumbilu, ni pfela wusiwana awu ni ti lavako ku mpfela wusiwana.”

¹⁶ Ngu toneto, kha ti yi ngu kuranda ka m'thu mwendo kutikarata kwakwe, aniko ti ta ngu ka Txizimu, atxi txi ku ni wumbilu.

¹⁷ Ngu toneto, Mibhalo yi wombako ka Faro, yi txi kha yona: “Ni ku wusile kasiku ni komba mtamo wangu ngu kwako, ni kuva ditina dangu di txi pfaliswa ka dotshe ditiko.”

¹⁸ Ngu toneto, Txizimu txi mahela wumbilu awule txi ti lavako ku mmahela, txi bangisa mbilu ya wule txona txi ti lavako ku m'bangisa.

Kuhenya ka Txizimu ni wumbilu wa txona

¹⁹ Sekoko u na khawe kwangu: “Se Txizimu txi sola txani kambe kani? Nguko i mani a sikotako kulamba kuranda ka txona kani?”

²⁰ Se u mani awe m'thu, u kanetisanako ni Txizimu kani? Ina txiya txo wumbwa txi nga wotisa ka muwumbi wa txona ku “U to ni wumbisa tiya ngu kutxani kani?”

²¹ Ina muwumbi kha nga ni mtamo wa kuwumba, ngu wona mraka wu wawumwewo, txiya txo xonipheka ni tximwani txo mbi nyawula kani?

²² Hi na khathu txani ngako Txizimu txi txi lava kukombisa kuhenya ka txona ni kuzivisa mtamo wa txona? Txizimu txi vile ni kutimisela ngutu ka vale va nga ti fanela kuhenyelwa ngu txona, avale va nga ti lulamisetwe kufuviswa.

²³ Txizimu txi lavile kambe kukombisa kukula ka wudhumo wa txona ka vale txi nga va sawula ngu kale, ngu wumbilu wa txona, kasiku va na ya zumba kutsakani ka txona.

²⁴ Vathu vava ngu ngathu Txizimu txi nga hi dhana, athu hi humako i si nga ngu ka lixaka la Vajudha dwe, aniko ni ka lixaka la vamatiko ni vona.

²⁵ Ngu toneto, Txizimu txi wombako amu ka dibhuku da Hoseya, taku: Ava i nga ti si nga vathu vangu, ni na va dhana ku: ‘Vathu vangu’, ni ditiko diya di nga ti si randwi, ni na di dhana taku: ‘Txirandwa

²⁶ Ni ka wukhalo wu ku nga ti wombilwe taku: ‘Kha mi nga vathu vangu’, va na dhanwa taku: ‘Vanana va Txizimu txa kuhanya.’ ”

²⁷ Isaya nene wa huwelela ta Israyeli, a txi khene: “Hambiko mtengo wa vanana va ka Israyeli wu fanako ni mtxhefa wa lineneni, miboti yokha ngu yona yi no poniswa;

²⁸ Mkoma a na tatisa dipswi dakwe ha mafuni ngu kuhetiseka ni kukuluveta.”

²⁹ Ngu toneto, Isaya a nga womba kale, a txi khene: “Idiku Mkoma wa Mabutho a Tiyimbi, a sa hi siyela miboti ya vanana, nga hi di lovile kufana ni Sodhoma ni Gomora.”

Vathu va ka Israyeli ni Evhangeli

³⁰ Se hi na khathu txani kani? Hi khathu: Vamatiko va va nga ti si xoti kululama, va ku mani kululama ku i ku ka kukholwa.

³¹ Kasi Vaisrayeli va va nga ti khutalela kutatisa mlayo wa Txizimu, va wu tandi.

³² Ngu txani kani? Nguko kha va wu lava ngu kukholwa, aniko va to wu lava ngu mithumo. Va humbilwe ngu dirigwi da txikhuvekiso,

³³ nga ti ti nga bhalwa taku: “Ndiko na veka Siyoni dirigwi di di ku na va humba, txiwindi txi txi ku na va wisa; aniko awu a no kholwa ka dona dirigwi diya, kha na mbi wiswa tingana.”