Varoma 4 - Bhiblia Yo Sawuleka

Abrahamu, tate wa va va kholwako

¹ Hi na khathu txani ngu Abrahamu, kokwani wathu ngu ka nyama kani?

² Ngako Abrahamu a di wombilwe ku mbwo lulama ngu mithumo yakwe, a naso so ti kulisa ngu sona, kambe i si nga masoni ka Txizimu.

³ Kasi Mibhalo yi txani kani? Yi womba tiya: “Abrahamu a khotwe ka Txizimu, se atiya ti mningile ku e mahwa mlulami.”

⁴ Kasi ka wule a thumako, muholo wu a ningwako hi nga kusizwa, ngu dihelwa.

⁵ Aniko awu asi thumiko na a txi kholwa ka wule a sikotako kuninga wululami muonhi, kukholwa kwakwe kuwombwa ku ngululama.

⁶ Ngu toneto, nene Dhavhidha a wombako kukateka ka m'thu wu Txizimu txi mu wombako ku mbwo lulama, na i si nga mhaka ya mithumo, ngako a txi khene:

⁷ “Va katekile avava sihoxo sawe si nga divalelwa; avava sionho sawe si nga fenengetwa.

⁸ A katekile m'thu wu asi wombwiko ku i muonhi ngu Mkoma.”

⁹ Se kukateka kuwa kulumba va wukwera dwe, mwendo kulumba ni ona makhutu kani? Nguko hi khathu Abrahamu, kukholwa kwakwe ku mningile ku e wombwa wo lulama.

¹⁰ Se a wombilwe ku mbwo lulama ngu mbimo muni kani? A wombilwe wo lulama, a di yisilwe wukwerani mwendo a sinzi kuyiswa wukwerani kani? A wombilwe a sinzi kuyiswa wukwerani, kha wombwa msana ka kuyiswa.

¹¹ Nguko txikombiso txa wukwera a ningilwe kasiku txi maha txixambanyo txa wululami wu a nga amukela ngu kukholwa na a sinzi kuyiswa wukwerani; ngu toneto ene a mahile tate wa va va kholwako, hambi i di makhutu, kasiku ni vona ve mana wululami.

¹² I tate wawe ni vona va va wukwera, na i si nga mhaka ya wukwera dwe, kambe ngu kuwa va tsimbilako ngu nzila ya kukholwa, ayi tate wathu Abrahamu a nga tsimbila ngu yona, ni mbimo yi a nga sinzi kuyiswa wukwerani.

Txithembiso txi mahekile ngu kukholwa

¹³ Kunene, i ti si nga mhaka ya Mlayo, txithembiso txi txi nga mahwa ka Abrahamu ni liveleko lakwe ti to a na maha m'dyi wa thomba ya mafu, aniko txi mahilwe ngu mhaka ya kululama ka kukholwa.

¹⁴ Nguko, ngako vadyi va thomba ya mafu i di va va namarelako mlayoni, kukholwa kuphindukile ku txi maha txilo txa walo, ni txona txithembiso txi txhipile;

¹⁵ nguko mlayo wu va nga kuhenya, kasi ahawa ku ku si nga ni mlayo kuwalo kundaka mlayo.

¹⁶ Ngu konaho, thomba yi manwa ngu kukholwa; ti to txi va i di txiningo txa makatekwa, kasiku txithembiso txi tsaniswa ka liveleko lotshelele, i si nga ka liveleko la mlayo dwe, aniko ni ka liveleko la kukholwa ka Abrahamu, i ku tate wa hotshethu;

¹⁷ madingano ni ti ti nga bhalwa, va txi kha vona: “Ani ni kumahile tate wa tixaka ta tingi.” Ene i tate wathu masoni ka Txizimu txi a nga kholwa ka txona, Txizimu txi txi hanyisako vakufa, txi vangako ni si si ku si nga ho.

¹⁸ Abrahamu a verete ati ti nga ti si koteki kuverelwa, e kholwa ti to a na va tate wa tixaka to tala, madingano ni dipswi di daku: “Liveleko lako li na talisa ku nga toneto.”

¹⁹ Ene kha nga telwa ngu dikhodho likholoni kwakwe ngu kuwona mmidi ngako se a nga ti ni 100 da malembe, hambiko a nga wona mkatakwe Sara ti to a pindetwe ngu mbimo.

²⁰ Ngu mhaka ya txithembiso txa Txizimu, kha nga kana-kana ngu txilo mu ka likholo, aniko a to tsaniswa kukholwani, na a txi dhumisa Txizimu,

²¹ a txi kholwa ta tinene ti to awu a nga mthembisa a ni mtamo wa ku ti maha;

²² ngu konaho a mahilwe wo lulama ngu kona kukholwa kuwa.

²³ Kha ta bhalelwa ene dwe tito: “A wombilwe mlulami,”

²⁴ aniko ti bhaletwe ni kwathu hi kholwako ka wule a nga wusa ka vafi Jesu Mkoma wathu,

²⁵ ene wu a nga ningelwa ngu kuonha kwathu, e wuswa ka vafi, kasi ku hi txi mana kumahwa valulami.