Varoma 11 - Bhiblia Yo Sawuleka

Wumbilu wa Txizimu ka Israyeli

¹ Se na wotisa: Ina Txizimu txi nga va txi di tshotshile vathu va txona kani? Lambi! Nguko nani ni Muisrayeli, wa lixaka la ka Abrahamu, ka lihunzu la ka Bhenjamini.

² Txizimu kha txa tshotsha vathu va txona, ava txi nga va ziva ngu kale. Mwendo mo va mi si ti zivi ati ti wombwako ngu Mibhalo, ti txi womba ngu Elija, mbimo yi a nga dila ka Txizimu, a txi mangalela va ka Israyeli, a txi khene:

³ “Mkoma, va date vaprofeti vako, va khundumusete magandelo ako, ku to sala ani nokha, ni konkuwa va xota wutomi wangu!”

⁴ Kambe Txizimu txi mxamulisile kutxani kani? Txi wombile txi txi kha txona: “Ni ti sawulete 7.000 wa vavamna, ava va nga mbi khizama masoni ka Bhahali.”

⁵ Ngu toneto, ni konkuwa yi ho mibotyana yi nga sawulwa ngu kuranda ka kateko.

⁶ Kambe, ti txi tsimbila ngu kateko, hi nga ngadi kambe ngu mithumo; nguko, ngako i di ngu mithumo, kateko hi nga ngadi i di kateko.

⁷ Se hi na txani kani? Atxi Israyeli a nga ti txi lava, kha txi mana, kambe ava va nga sawulwa va txi mani; kasi vamwani va bangisilwe timbilu.

⁸ Nga ti ti nga bhalwa taku: “Txizimu txi va ningile moya wa mphume wa hombe; ni maso a ku ambi wona, ni tinzeve ta ku ambi engisa, ni nyamsi i ngadi toneto.”

⁹ Se Dhavhidha a ti khene: “Meza yawe yi na hinduke yi maha mlawu ni likhumbi, txitsha txa ku va humba ni txitsayiso txa ku va dingana!

¹⁰ Maso awe ma na mahe txidema, ti to ma si ngadi me wona; ni misana yawe yi na dombeke!”

¹¹ Se na wotisa: Ina va ka Israyeli va nga va va di humbetwe kuwa ka magwito kani? Aniko ngu mhaka ya kuwa kwawe, vamatiko va mani kuhanyiswa kasi kuvhuka txiluse txa va ka Israyeli.

¹² Se ngako kuwa kwawe ku di hindukile ku txi maha thomba ya ditiko, ni kutandeka kwawe ku di hindukile ku txi maha thomba ya vamatiko, ina kuwuya ka va ka Israyeli, ngu wungi wawe, ku na mbi wuyisa thomba yo pindisa ngutu kani?

Kuhanyiswa ka va i singako Vajudha

¹³ Ni womba ni nanu, mi ku vamatiko, ni khani: Ngako ani ni ku mpostoli wa vamatiko, ni na ti karata ngu kutsimbitisa kha kwati mthumo wangu,

¹⁴ kufela ku mwendo vathu va lixaka la ka kwathu va na navela, kasi ni txi sikota kuhanyisa vamwani vokari hagari kwawe.

¹⁵ Nguko akuwa kutshuralelwa kwawe ngu Txizimu ku nga hinduka ku txi maha kuhuluka ka ditiko, ina kutshumela kwawe ve wuya kuhundulukani kha ti na mbi fana ni kuwuka ka vakufa kani?

¹⁶ Ngako m'baba wo thanga va gandelako ngu wona Txizimu wu di sawulekile, wotshe wu wu nga sala ni wona wu sawulekile; se ngako mikoloti yi di sawulekile, ni ona madhavi a kona ma sawulekile.

¹⁷ Se ngako madhavi okari ma di phatutwe, se awe u ku didhavi da muolivhera wa txitinga u nga ta txhomekwa ha wukhaloni ka ona, u va u sengela nawo kudyiswa ngu ndome ya mkoloti wa muolivha wa m'tini,

¹⁸ u nga ti kukumukisa txitimwi ka mamwani madhavi; ziva ti to hi nga awe u rwalako mkoloti, aniko mkoloti ngu wona wu ku rwalako awe.

¹⁹ Kambe u na khawe: “Madhavi ma phatuletwe kasiku ani ni txhomekwa ha wukhaloni ka ona.”

²⁰ Ngu txona; ma phatutwe ngu ku ambi kholwa; se awe u tsani ngu mhaka ya kukholwa, u nga ti kulise, aniko thava!

²¹ Nguko, akuwa Txizimu txi nga mbi divalela Vajudha i ku madhavi a txona, na nawe kha txi na mbi kudivalela.

²² Ngu konaho, khumbuka wunene wa Txizimu, ni kukarata ka txona; Txizimu txa karata ka vale va nga wa; txi komba wunene kwako ngako u txi simama wuneneni; aniko ngako u si mahisi toneto, na nawe u na gangwa.

²³ Nivona, ngako va txi leka ku ambi kholwa kwawe, va na tshumela ve txhomekwa; nguko Txizimu txi ni mtamo wa ku va txhomeketa kambe.

²⁴ Nguko akuwa awe u nga phatulwa ka muolivha wako wa txitinga wa mtumbuluko, u ta txhomekwa ka muolivha wa m'tini, i si nga wa mtumbuluko wako; ngutu-ngutu ava i ku madhavi a similwa ngu mtumbuluko wa ona, ma nata txhomekwa kambe mndongani ka ona.

Wunene wa Txizimu ka votshe vathu

²⁵ Nguko, vanathu, kha ni ti dhundi ti to mi timelelwa ngu msisalo wuwa, kasiku mi si thuki mi txi alakanya ti to mi txharihile: Va ka Israyeli vokari va bangisilwe timbilu, kala kuza ve wulela votshe vamatiko;

²⁶ ngu toneto, votshe va ka Israyeli va na hanyiswa, nga ti ti nga bhalwa taku: “Mtiruli a na huma ngu Siyoni, a na thavisa sisolo ka Jakobe.

²⁷ Se atxiya txi na va i di txona txitumelelano txangu, mbimo yi ni no thavisa sionho sawe.”

²⁸ Kha ditshuri, ngu didhawa da Evhangeli, mbalala, ngu mhaka yanu. Kambe ngu didhawa da kusawulwa, nzirandwa ngu mhaka ya vakokwani vawe;

²⁹ Kasi siningo sa Txizimu ni kudhanwa ngu txona kha si na kutshumelela msana.

³⁰ Ngako anu mi nga ti eyisa Txizimu ka txikhati txa kale, senikoko mi nga mana divalelo ngu mhaka ya ku ambi engisa ka Vajudha.

³¹ Ngu toneto, ni vona konkuwa kha va engisi Txizimu ngu mhaka ya wumbilu wu mi nga mahelwa, kasiku ni vona konkuwa ve mana kudivalelwa.

³² Se ngu toneto, Txizimu txi tumete ti to votshe ve eyisa, kasiku na sikota ku va mahela wumbilu votshelele.

³³ Oh! Kutshima ka kufuma ni wuzivi ni wutxhari wa Txizimu! Kulamula ka txona kha ku ziwi ngu m'thu, hambi tinzila ta txona ni tona kha ti ziwi ngu m'thu.

³⁴ Nguko: “I mani a nga yi ziva mialakanyo ya Mkoma? I mani a nga va mlayeli wakwe kani?

³⁵ Mwendo i mani a nga thanga ene a txi mninga txo maha, kufela ku na tshungulwa ngu ngene kani?”

³⁶ Nguko sotshe si ta ngu kwakwe, sotshe si ho ngu mtamo wakwe, sotshe si konama ene. Wudhumo wu nave kwakwe kala kupinduka. Amen!