Varoma 10 - Bhiblia Yo Sawuleka

¹ Vanathu, kuxuva ka mbilu yangu ni mikombelo yi ni va mahelako ka Txizimu vanana va ka Israyeli, ngu ti to ve hanyiswa.

² Nguko nava fakazela ka ti to va na ni kukhutala ka Txizimu, kambe kukhutala kwawe hi nga ka wuzivi.

³ Nguko, ngu ku ambi ziva kululama ka Txizimu ni kulava ku ti emisela kululama kwawe vona ngu txawe, kha va ti veka hahatshi ka kululama ka Txizimu.

⁴ Nguko magwito a mlayo ngu Kristu, awu a ningako kululama ka wuhi ni wuhi a kholwako kwakwe.

Kuponiswa ka votshe vathu

⁵ Nguko Mosi a bhate ti to m'thu wu a mahako kululama ku i ku ka Mlayo, a na hanya ngu kona.

⁶ Aniko kululama ku kutako ngu kukholwa, kuwomba tiya: “U nga thuke u txi womba mbiluni kwako, u txi khawe: ‘I mani wu a no kwela nzumani kani?’ (Ti taku: Kasi kuya txhikisa Kristu.)

⁷ Mwendo ku: ‘I mani a no kwitima diphalani kani?’ (Ti taku: Kasi kuya humisa Kristu ngu ka vakufa), kani?”

⁸ Kasi Mibhalo yi womba txani kani? Yi womba tiya: “Dipswi di hafuhi kwako, di txisofuni kwako, ni mbiluni kwako.” Atiya ti womba dipswi da likholo li athu hi txhumayelako

⁹ i ku tiya: Ngako u txi fakaza ngu txisofu txako ka Mkoma Jesu, u tumela kambe mbiluni kwako ti to Txizimu txi m'wusile ngu ka va kufa, u na hanyiswa.

¹⁰ Nguko m'thu a kholwa ngu mbilu kasiku e mana wululami, kambe a fakaza ngu txisofu, kasiku e mana kuhanyiswa.

¹¹ Nguko Mibhalo yi womba tiya: “Wuhi ni wuhi a kholwako kwakwe, kha na mbi wiswa tingana.”

¹² Kha ku nga ho kuhambana hagari ka Mujudha ni Mugriki, nguko Mkoma wawe i mmweyo, awu a ku ni wuha ka votshelele va va m'khozelako.

¹³ Nguko wuhi ni wuhi a khozelako ditinani ka Mkoma a na hanyiswa.

¹⁴ Kambe va na khozelisa kutxani ka wule va nga mbi kholwa kwakwe kani? Va na kholwisa kutxani ka wule va nga mbi engisa timhaka takwe kani? Va na ti engisisa kutxani, ngako ku si nga ni mtxhumayeli kani?

¹⁵ Va na txhumayelisa kutxani, ngako va sa rumwa kani? Nga ti ti nga bhalwa taku: “Eto yi nga tshurisa tona mikondo ya vale va txhumayelako mahungu amanene!”

¹⁶ Aniko hi nga votshe va va nga amukela Evhangeli. Ngu toneto, Isaya a wombile a txi khene: “Mkoma, i mani a nga kholwa ka ti hi nga txhumayela kani?”

¹⁷ Kha ditshuri, kukholwa kuta ngu kuengisa ti ti txhumayelwako, kutxhumayela ngu kuzivisa dipswi da Kristu.

¹⁸ Se na wotisa: Ina kha va tiengisa kani? Kha ditshuri va ti engisile, nguko ti bhatwe taku: “Kutxhumayela kwawe ku pfate ka dotshe ditiko, ni mapswi awe ma hokile magemeta-mitshi ka mafu.”

¹⁹ Se na engeta ni txi wotisa: Ina Israyeli a nga va a sa tiziva kani? Ku thangile Mosi a txi khene: “Ni na mi wusela txiluse ngu ditiko di i ku si nga da txilo; ni na mi henyisa ngu ditiko di di ku si nga ni kupimisa.”

²⁰ Ni Isaya wa tsana a txi womba ku khene: “Ni manwi ngu va va nga mbi ni lava; ni ti kombisile ka vale va nga ti si wotiseli ngu ngani.”

²¹ Kambe ngako a txi womba ngu Israyeli, a khene: “Dotshe ditshiku ni nawulutile manza angu ka vathu va va si engisiko, va kanyisako.”