Varoma 1 - Bhiblia Yo Sawuleka

Kulosa

¹ Paulo, txithumi txa Jesu Kristu, a nga dhanwa kuva mpostoli, a nga sawulwa ti to e txhumayela Evhangeli ya Txizimu,

² ayi Txizimu txi nga ti yi thembisile kale, ngu vaprofeti va txona, mu ka Mibhalo yo Sawuleka;

³ yi wombawombako ngu Mwanana wa txona, a nga velekwa lixakani ka Dhavhidha ngu ka nyama;

⁴ aniko ngu ka Moya wo Sawuleka, a kombisilwe ti to i Mwanana wa Txizimu, ngu kuwuka kwakwe ngu ka vakufa, ene Jesu Kristu Mkoma wathu.

⁵ Ngu ngene hi amukete kateko ni fanelo ya wupostoli, kasiku votshe vathu va matiko ve yiswa kuengisani ka kukholwa, ve dhumisa ditina dakwe;

⁶ hagari kwawe nanu mi dhanwi, ku ta maha va ka Jesu Kristu.

⁷ Ka motshenu mi manekako Roma, mi ku va kudhundeka ka Txizimu, mi nga dhanwa ku ta maha valulami, na mi navelela makatekwa ni kudikha ka Txizimu Tate wathu, ni ka Mkoma Jesu Kristu.

Paulo a navela kuendela Varoma

⁸ Kukhata na bonga Txizimu txangu ngu Jesu Kristu, nguko kukholwa kwanu ka sumwa ngu vathu va dotshe ditiko.

⁹ Nguko Txizimu txi, ni txi khozelako moyani kwangu ngu kutxhumayela Evhangeli ya Mwanana wa txona, ngu txona i ku fakazi yangu ka ti to kha ni leki ku mi alakanya;

¹⁰ na kombela yotshe mbimo mikhongeloni kwangu tito, ngako i di kuranda ka Txizimu, ni mana dithomo da kuta kheyo kwanu.

¹¹ Nguko na xuva ngutu ku mi wona, kufela ku miha txiningo txokari txa Moya, kasiku mi tsaniswa.

¹² Kasi ngu tito, ngako ni di hafuhi ni nanu, hi na thavelelana ngu likholo li hi ku nalo, anu ni nani.

¹³ Se vanathu, kha ni dhundi ku mi leka mi si ti zivi ti to sikhati sasingi ni akile makungo a ku mi endela kasi ku ta hapha mihando yokari hagari kwanu, nga ti ni nga ti maha ka mamwani matiko, aniko ni to khameka kala nyamsi.

¹⁴ Nina ni mnandu ka Vagriki ni ka va i ku si nga Vagriki, ka vo ziva ni ka va va si ziviko.

¹⁵ Ngu konaho, ni ti emisete ku ta txhumayela Evhangeli ni konakheyo kwanu, anu mi ku Roma.

Mtamo wa Evhangeli

¹⁶ Ani kha ni nga ni tingana ngu Evhangeli, nguko i mtamo wa Txizimu, awu wu hanyisako wuhi ni wuhi a kholwako, kukhata Mujudha, ngu msana nene Mugriki.

¹⁷ Nguko kululama ka Txizimu ku wonekelisilwe ka yona, kuhuma amu ka likholo, ku txi yisa likholoni, madingano ni ti ti nga bhalwa taku: “Awu a nga mahwa mlulami ngu likholo, a na hanya.”

Mnandu wa votshe vathu

¹⁸ Nguko kuhenya ka Txizimu ka ti kombisa ku txi ta ngu nzumani, ku ta peka wubihi ni kugombonyeka ka vathu va va tshingelelako ditshuri ngu kona kwa mbi lulama kwawe;

¹⁹ nguko ati ti kotekako kuziwa ta Txizimu ti wonekisilwe kwawe ha kubasani: Txizimu txipune txi va kombisile tona.

²⁰ Nguko asi sa Txizimu si si wonwiko ngu maso, i ku mtamo wa txona wo mbi na magwito ni wuzimu wa txona, eso sa ti wonekisa amu ka mithumo ya txona, kukhukhela kuvangwani ka ditiko; ngu konaho kha va na nzila yodanga ngu yona.

²¹ Nguko, hambi va di txi zivile Txizimu, kha va txi dhumisa kota nga Txizimu; hambi ni ku txi bonga kha va txi bonga; kambe va to pengiswa ve yiswa ka ta walo ngu mialakanyo yawe; se timbilu tawe ti pwata wutxhari, ti zumba mtemani.

²² Va kha vona va ziva, kuve nzipumbu.

²³ Se va phindute wudhumo wa Txizimu txi, txi si fiko, ve wu maha wa sithombe sa m'thu wu a fako, ni wa sinyana, ni wa sihari sa mune wa minenge, ni wa so tsimbila ngu dibindi.

²⁴ Ngu konaho Txizimu txi to va leka nzambwani kota kunavela ka timbilu tawe, se ve ti onha vapune mimidini kwawe.

²⁵ Vonavo va to phindula ditshuri da Txizimu ve di maha makuhu, ve khozela ni kuthumela siwumbwa, ve leka Muwumbi, awu a fanelako kubongwa ngu malembe ni malembe. Amen.

²⁶ Ngu konaho, Txizimu txi va ningete kunavelani ka manyala; vavasikati vawe va phindute mahanyelo awe a mtumbuluko ve maha ta kuhambana ni mtumbuluko.

²⁷ Nivona vavamna va lekile mahanyelo o ziva wamsikati ngu nzila ya mtumbuluko, se ve tura ngu kunavelana ngu txawe, vavamna ve maha to yila ni vavamna kulowe, se ve mana txitsayiso txi txi dinganako txihoheto sawe.

²⁸ Se aku va nga mbi lava kuziva txilo ngu didhawa da Txizimu, txona Txizimu txi va ningete ka mialakanyo yawe yo mbi vhuna txilo, veza ve maha ti ti si lavekiko.

²⁹ Va taletwe ngu kwa mbi lulama, ni tshofu, ni timbiti, ni wubihi; va taletwe ngu livengo, wugevenga, kunyenyana, kukanganyisa, ku kujetela, kulumbeta;

³⁰ mbaruketeli, mbalala va Txizimu, vakanyisi va kutikulisa, va kutithemba, vasiki va to biha, vaeyisi va vaveleki vawe, mabhemba;

³¹ mahundwa, vaongi vo mbi na wuxaka,

³² hambiko va ti zivako ti to Txizimu txi vekile mlayo wu wu wombako ti to avale va mahako toneto, va fanetwe ngu kufa, vona kha va gwiteli ku ti maha dwe, aniko va emela ni vale va ti mahako.