Valamuli 13 - Bhiblia Yo Sawuleka

Kuvelekwa ka Samusoni

¹ Se vanana va ka Israyeli va to engeta kumaha to biha masoni ka Mkoma, se Mkoma a to va ningela manzani ka Vafilista amu ka mune wa magumi a malembe.

² Se Kambe ku ti ti ni wamwamna wokari ditikoni ka Zora, wa nyumba ya ka Dhani, ditina dakwe i ti ti Manowa; se msikati wakwe i ti ti txifule.

³ Se Ngelozi ya Mkoma yi to ti wonekisa ka wu wa wamsikati, yi txi m'gela tiya: “Wona taku u txi fule, khu khali ku va ni vanana; aniko, u na mana txirumbu u txi veleka mwanana wa mfana.”

⁴ Konkuwa koko, ti wonele, u nga sele vhinya hambi sopa, hambi kudya ni txihi txo yila.

⁵ Nguko u na mana txirumbu u txi veleka mwanana wa mfana, eyo ha msungo kwakwe ku nga thuke ku txi pinda limo, nguko mfaneyo a na va i di munazira wa Txizimu, kukhukhela mndani ka mame wakwe, se ene a na khata kutxhatxhisa va ka Israyeli, manzani ka Vafilista.

⁶ Sekoko wamsikati a to wulela e womba-womba ni mwamna wakwe, a txi khene: M'thu wa Txizimu a tile kwangu, a txi wonekisa kuthisa ko fana ni ka Ngelozi ya Txizimu; aniko kha na mu wotisa taku a txi ta ngu hani, hambi ene kha ni gela ditina dakwe.

⁷ Aniko ene a ni gete ku khene: “Wona taku u na mana txirumbu, u veleka mwanana wa mfana; konkuwa koko, u nga sele vhinya hambi sopa; kambe u nga dye ni txihi txo yila; nguko mfana a na va i di munazira wa Txizimu, kukhukhela mndani ka mame wakwe, kala ka ditshiku da kufa kwakwe!”

⁸ Sekoko koneko Manowa a to kombela ka Mkoma, a txi khene: O! Nyamne wangu, na ku kombela ti to m'thu wa Txizimu, awule u nga mruma, a na engete a txi ta kwathu kambe, a txi ta hi gondisa ti hi dinganako ku ti maha ka mfana wu a no velekwa.

⁹ Se Txizimu txi to engisa txikombelo txa Manowa; se Ngelozi ya Txizimu yi to ta kambe ka wamsikati, mbimo yi a nga ti ti thembweni, aniko a ti si nga ni mwamna wakwe Manowa.

¹⁰ A to kuluveta koko wamsikati e tutuma, a txi ya zivisa mwamna wakwe, a txi khene: “Wona taku m'thu wule a nga ta kwangu dile, a tile kambe.”

¹¹ Sekoko, Manowa a to khukha, a txi londeta msikati wakwe, eya wotisa ka m'thu wule, a txi kha ene: “Ngawe m'thu wule u nga womba-womba ni wu wamsikati, kani?” Se a to khene: “Ngani.”

¹² Sekoko Manowa a to khene: “Ma na tatiseke mapswi ako; se ngu ahi mahanyelo ni mthumo wa mfana wuwa kani?”

¹³ Se Ngelozi ya Mkoma yi to kha yona ka Manowa: “Totshe ti ni nga womba ka wamsikati, a na ti xayise.”

¹⁴ Sotshe sile si humako ngu ka m'vhinya, a nga dye, hambi vhinya, mwendo sopa, a nga sele, ni txihi txo yila, a nga dye; totshe ti ni nga mleleta a na ti xayisa.

¹⁵ Sekoko Manowa a to khene ka Ngelozi ya Mkoma: “Hi tumelele hi txi ku sweta, ngu ku kululamisela txihongwana.”

¹⁶ Aniko Ngelozi ya Mkoma yi to kha yona ka Manowa: “Hambi u txi ni sweta, kha ni na mbi dya sakudya sako; se ngako u txi lava kululamisa mningelo wo hiswa, wu ningele ka Mkoma.”

¹⁷ Se Manowa a to khene ka Ngelozi ya Mkoma: “Ngawe mani ditina dako kani? Kasiku, ngako di txi tatiseka dipswi dako, hi na kudhumisa.”

¹⁸ Se Ngelozi ya Mkoma yi to mxamula ku kha yona: “Ngu kutxani u wotisako ditina dangu, na kuve da yila ku di womba kani?”

¹⁹ Sekoko, Manowa a to teka phongo, ni mningelo wa sakudya, se a txi si ningela ka Mkoma, ha dirigwini; se Ngelozi yi to maha sixamaliso, na Manowa ni msikati wakwe, va txi si wona.

²⁰ Se ku to maheka taku, mbimo yile dituro da mndilo di nga kwela ngu ha txiluveloni di komba nzumani, Ngelozi ya Mkoma yi to kwela ngu kona hale ka dituro da ha txiluveloni; ngako Manowa ni msikati wakwe va di ti woni, va to wa hahatshi ngu tikhohe tawe.

²¹ Se Ngelozi ya Mkoma kha ya engeta yi txi woneka kambe ka Manowa, hambi ka msikati wakwe; sekoko Manowa a to tiziva ti to i ti ti Ngelozi ya Mkoma.

²² Se Manowa a to khene ka msikati wakwe: “Ngu ditshuri hi na fa, ngu ku hi nga wona Txizimu!”

²³ Aniko msikati wakwe a to xamula a txi khene: “Idiku Mkoma a ti lavile ku hi daya, nga a sa amukela ngu manzani kwathu mphaxo wo hiswa, ni mningelo wa sakudya, kambe nga a sa hi komba totshe tiya, hambi ku hi leka hi engisela totshe tiya, ka mbimo yiya.”

²⁴ Msana keto, awu wamsikati a to veleka mwanana wa mfana, a txi mraya ditina daku i Samusoni; aniko mfana a to kula, se Mkoma a txi mkatekisa.

²⁵ Se Moya wa Mkoma wu to khata ku muhumela a di digoveloni ka Dhani, hagari ka Zora ni Exitawoli.