Valamuli 12 - Bhiblia Yo Sawuleka

Jefta ni lihunzu la ka Efrayime

¹ Sekoko vathu va ka Efrayime va to tshangana, ve txhatuka va txi ya wuphemba, se va txi kha vona ka Jefta: “Ngu kutxani u nga yalwa ni vanana va ka Amoni, kambe u si hi dhani hi tsula ni nawe kani? Hi na hisa nyumba yako ngu mndilo, kumweko ni nawe nyamne wa yona!”

² Se Jefta a to va gela ku khene: “Ani ni vathu vangu hive ni kulwisana ka hombe, ni vanana va ka Amoni; kambe ni mi dhani, aniko kha ma ni hulukisa manzani kwawe.

³ Se mbimo yile ni nga wona ti to kha ma ni hulukisa, kha na khatala ngu wutomi wangu, ni to tsula ni txi yalwa ni vanana va ka Amoni, se Mkoma to va ningela manzani kwangu; ngu kutxani koko nyamsi mi ni wukelako, mi txi lava kulwa ni nani kani?”

⁴ Se Jefta a to tshanganisa votshe vavamna va Gileyadhi, a txi lwa ni Efrayime, se vavamna va ka Gileyadhi, va to daya va ka Efrayime; nguko mbimo yile va ka Gileyadhi va nga ti hagari ka Efrayime ni Manasi, va to kha vona: “Anu mi to tutuma ka Efrayime.”

⁵ Sekoko va ka Gileyadhi va to honyola mabelo a Jordhani ka va ka Efrayime; se ku to maheka tito, mbimo yile vale va nga tutuma ka Efrayime va ti ti kha vona: “Ni kombela kutxhatuka”; sekoko vavamna va ka Gileyadhi, va ti ti mu wotisa ku kha vona: “Awe u wa ka Efrayime kani?” Se ngako a txi khene: “Ahim-him,”

⁶ sekoko vona va ti ti m'gela va txi kha vona: “Womba koko u txi khawe: Xibholeti”; aniko ene a ti ti womba a txi khene: “Sibholeti,” nguko a ti si ti koti kuwomba kha kwati: Sekoko va ti ti mñola veya m'dayela mabeloni ka Jordhani; Ka yona mbimo yile, kuwite 42.000 wa vavamna va ka Efrayime.

⁷ Se Jefta a to lamula va ka Israyeli, mtxhanu wa malembe ni dimwedo; se Jefta, Mugileyadhi, a to fa, se eya tshotshwa didhoropani ka Gileyadhi.

Ibhisani, Eloni, ni Abhidhoni

⁸ Se msana ka Jefta, Ibhisani, wa Bhetlehema, a to lamula va ka Israyeli.

⁹ Ene a ti ti ni magumi mararu a vanana va vafana; aniko e lowotisa magumi mararu a vanana vamahorana; kambe e lowota magumi mararu a vanana mahorana, ka vanana vakwe va vafana; se a to lamula Israyeli amu ka mtxhanu wa malembe ni mambidi.

¹⁰ Sekoko Ibhisani a to fa, se a txi ya tshotshwa Bhetlehema.

¹¹ Se msana ka Ibhisani, Eloni, Muzabhuloni, a to lamula Israyeli, Muzabhuloni; se a to lamula Israyeli amu ka digumi da malembe.

¹² Se Eloni, Muzabhuloni, a to fa, se a txi ya tshotshwa Ayijaloni, ditikoni ka Zebhuloni.

¹³ Se msana ka Eloni, Abhidhoni, mwana Hileli, Mpiratoni, a to lamula Israyeli.

¹⁴ Se ene a ti ti ni mune wa magumi a vanana va vafana, ni magumi mararu a vatukulu, va nga ti gadha mtxhanu wa magumi ni mambidi a timbongola; se a to lamula Israyeli, amu ka mtxhanu wa malembe ni mararu.

¹⁵ Sekoko Abhidhoni, mwana Hileli, Mpiratoni, a to fa, a txi ya tshotshwa Piratoni, ditikoni ka Efrayime, mmangoni ka Vaamaleki.