Valamuli 1 - Bhiblia Yo Sawuleka

Ati ti nga maheka msana ka kufa ka Joxuwa

¹ Se ku to maheka taku msana ka kufa ka Joxuwa, vanana va ka Israyeli, va to wotisa ka Mkoma, va txi kha vona: I mani hagari kwathu a no khata ene e kwela, a txi ya ka Vakanana, ku yalwa navo kani?

² Se Mkoma a txi khene: “I Judha a no kwela; wonani taku ni niningete ditiko diya manzani kwakwe.”

³ Sekoko, Judha a to khene ka Simiyoni, mwanawe: Kwela kumweko ni nani, hi txi ya ka ditiko di i ku txyavelo txangu, ku yalwa ni Vakanana, se nani ni nata kwela ni nawe, hi txi ya ka ditiko di i ku txyavelo txako. Se Simiyoni a to tsula nayo.

⁴ Kambe Judha a to kwela, se Mkoma e ningela Vakanana ni Vaferezi manzani kwakwe, kudawa vathu vo dingana 10.000 wa vavamna, kona Bhezeki.

⁵ Se va to mana Adhoni-Bhezeki kona Bhezeki, va txi lwa nayo, ve daya Vakanana ni Vaferezi.

⁶ Hambi keto, Adhoni-Bhezeki a to thava, aniko va to mlondeta, veza va txi mñola, va txi m'wila titiho ta vanyagotwe, ta manzani ni ta mikondoni.

⁷ Sekoko, Adhoni-Bhezeki a to khene: Mtxhanu wa magumi ni mambidi a vafumeli, va nga ti wiletwe titiho ta vanyagotwe, ta manzani ni ta mikondoni, va ti ti rolela maruru hahatshi ka meza yangu; ngu kumaha keto, Txizimu txi ni tshumetete madingano ni ti ni nga va mahela. Se va to tsula nayo Jerusalema, eyo a nga ya fela kona.

Kukhoziswa ka Jerusalema ni Hebroni

⁸ Nguko vanana va ka Judha va to wukela Jerusalema, va txi di teka, ve dayela vaaki va dona ngu ditxhari, se ve hisa didhoropa ngu mndilo.

⁹ Se msana keto, vanana va ka Judha va to relela kasiku va txi yalwa ni Vakanana, vale va nga ti akile mimangoni, ni wulambwe ni libalani.

¹⁰ Se Judha a to yalwa ni Vakanana, vale va nga ti akile Hebroni (ditina da Hebroni kale ka kona i ti ti Kiriyati-Arabhe), se a to ya xula Xexayi, ni Ahimani ni Talimayi.

Kukhoziswa ka Dhebhiri

¹¹ Se kukhukhela koneyo, a to tsula a txi yalwa ni vaaki va Dhebhiri (ditiko da Dhebhiri kale ka kona i ti ti Kiriyati-Siferi.)

¹² Se Kalebhi a to khene: “Awule a no khozisa Kiriyati-Siferi, a txi di teka, ni na mninga mwanana wangu wa dihorana Akisa, a txi maha msikati wakwe.”

¹³ Se Otoniyeli, mwana Kenazi, mnanda wa Kalebhi, a to di teka; aniko Kalebhi to mninga Akisa mwanana wakwe wa dihorana, a txi maha msikati wakwe.

¹⁴ Se ku to maheka taku, mbimo yile Akisa a nga wona Otoniyeli, a to mkujetela ti to a txi kombela thembwe ka tate wakwe; se ene a to txhika ngu kundaka ngu ha ka mbongola; se Kalebhi a to khene: “Njitxani u ku natxo kani?”

¹⁵ Se Akisa a to m'gela ku khene: “Ni ninge txokari, ngako u nga ni ninga mafu a kuoma; ni ninge ni sona sisima sa mati.” Se Kalebhi a to mninga sisima sa hombe ni sa sidotho.

Kuxula ka tihunzu ta va ka Judha ni va ka Bhenjamini

¹⁶ Se ni vona vanana va ka Hobhabhe, Mkeni, wu i nga ti tate wa Mosi ngu ka msikati wakwe, va to khukha ngu didhoropani ka Mitxhese, kumweko ni vanana va ka Judha, veya txiwulani ka Judha, ku ku wulambwe ka Aradhi; va txi ya zumba ni vathu va kona.

¹⁷ Judha koko a to tsula ni Simiyoni, mwanawe, va txi yalwa ni Vakanana, vale va nga ti akile Zefati, kambe va to va lovisa votshe, se ve raya didhoropa diya, ditina daku i Horma.

¹⁸ Judha a to teka Gaza ni mihingano yakwe, ni Axikaloni ni mihingano ya kona, ni Ekroni ni mihingano ya kona.

¹⁹ Se Mkoma a ti ti kumweko ni va ka Judha, kambe a to fuvisa vazumbi va mimangoni, aniko kha tutumisa vaaki va Libalani, nguko va ti ti ni sikotxikani sa tisimbi.

²⁰ Se Hebroni a to ningelwa ka Kalebhi, nga ti Mosi a nga va leletisa tona, kambe kukhukhela koneho a to tutumisa vanana vararu va Anaki.

²¹ Kambe vanana va ka Bhenjamini kha va tutumisa Vajebhusi vale va nga ti Jerusalema, kukhukhela ka kale Vajebhusi va akile Jerusalema kumweko ni vanana va ka Bhenjamini, kala ka ditshiku da nyamsi.

Tihunzu ta ka Josefa ti khozisa Bheteli

²² Se va nyumba ya ka Josefa ni vona, va to kwela va txi ya Bheteli, se Mkoma a ti ti kumweko navo.

²³ Se va nyumba ya ka Josefa va to rumela tixoli kuya xola Bheteli (se ditina da kale da didhoropa diya i Luza).

²⁴ Se tixoli ti to wona wamwamna wule a nga ti ti huma ngu didhoropani, se ti txi m'gela ku kha tona: “Hi kombe txike txo wulela ngu txona didhoropani, se athu hi nava ni wumbilu ni nawe.”

²⁵ Se mbimo yile a nga va komba txike txo wulela ngu txona didhoropani, va to dayela vathu va didhoropa ngu ditxhari; aniko va to leka wule wamwamna e tsula ni ngamu yakwe yotshe.

²⁶ Sekoko, wamwamna wule, a to rura a txi tsula ka ditiko da Vaheti, a txi ya aka didhoropa adi a ngadi raya ditina daku i Luza; adiya nditina da dona kala ka ditshiku da nyamsi.

Vathu vale va nga mbi tutumiswa

²⁷ Hambi Manasi kha tutumisa vaaki va Bheti-Sayami, ni va vamakhalo o fumwa ngu ngene; hambi va a Tahanaki, ni va makhalo o fumwa ngu ngene; hambi vazumbi va Dhori, ni makhalo o fumwa ngu ngene; hambi vazumbi va Ibleyamu, ni va makhalo o fumwa ngu ngene; hambi vazumbi va Megidhu, ni va makhalo o fumwa ngu ngene; se Vakanana va to simama ve zumba ka dona ditiko edo.

²⁸ Se ku to maheka taku, ngako va ka Israyeli va di mani mtamo, va to khozisa Vakanana, aniko kha va va tutumisa votshe.

²⁹ Efrayime kha nga za e tutumisa Vakanana vale va nga ti akile Gezeri; aniko Vakanana va to simama ve zumba hagari kwawe, kona Gezeri.

³⁰ Zebhuloni kha nga za e tutumisa vaaki va Kitroni, hambi vaaki va Nahaloli; aniko Vakanana va ti ti akile hagari ka va ka Zebhuloni, va txi khupiswa.

³¹ Aseri kha nga za e tutumisa vaaki va Ako, hambi vaaki va Sidhoni, ni va Alabhi, ni va Akizibhe, ni va Helibha, ni va Afeki, ni va Reyobhe;

³² aniko va ka Aseri va to aka hagari ka Vakanana vale va nga ti akile ditikoni mule; nguko kha va va tutumisa.

³³ Naftali kha nga za e tutumisa vaaki va Bheti-Semesi, hambi vaaki va Bheti-Anati; kambe a to aka hagari ka Vakanana vale va nga ti akile ditikoni mule, aniko vaaki va Bheti-Semesi ni va Bheti-Anati, va to khupiswa ngu va ka Naftali.

³⁴ Se Vaamori va to xanisa vanana va ka Dhani, kala kuya hoka mmangoni; nguko va ti si va leki va txi relela mkovani.

³⁵ Kambe Vaamori va to simama ve aka mimangoni ka Heresi, kona Ajaloni ni Sahalabhime; aniko dianza da nyumba ya ka Josefa di to simama ku va khupisa.

³⁶ Se m'hingano wa Vaamori, wu ti ti khukhela mmangoni ka Akrabhime, ni kukhukhela dirigwini kala txitimwi.