Vahebheru 5 - Bhiblia Yo Sawuleka

¹ Ngu toneto, wuhi ni wuhi i ku Mphaxeli wa Hombe, kota nga ti a nga sawulwa hagari ka vathu-kulowe, a ni fanelo ya kuthumela vona vathu ka timhaka ti ti tsimbilelanako ni mthumo wa Txizimu, kasiku a txi maha miningelo ni timhamba ta kudihela sionho.

² Ene wa sikota kupfela wusiwana ava va kusisalelwa ni vale va lundumako, nguko nene wa thuka a txi lunduma.

³ Ngu toneto, a fanela kuphaxa timhamba a txi alakanya sionho sakwe ni sa vathu votshe.

⁴ M'thu a nga thuke a txi ti tekela apune txikhunja txiya; hahanze ka wule a nga dhanwa ngu Txizimu kufana ni Aroni.

⁵ Ngu toneto, Kristu nene hi nga ene apune a nga ti pfalisa, a txi ti maha Mphaxeli wa Hombe, kambe a to guletwa ngu wule a nga m'gela a txi khene: “Awe u Mwanana wangu, ni ku velekile nyamsi.”

⁶ Kota nga ti a wombako kambe ka wumwani wukhalo a txi khene: “Awe u Mphaxeli kala kupinduka madingano ni mlayo wa Melkisedheki.”

⁷ Kristu ka masiku awa a nga ti hanya wutomi wa mmidi, a mahile mikombelo, ngu kupeka tihuwa ni kudila mirongo, a txi khozela ka wule a nga ti sikota ku m'hulukisa ka lifo, se a txi tumelelwa ngu mhaka ya kuengisa kwakwe.

⁸ Ene, hambiko i ku Mwanana wa Txizimu, ka sixaniso sakwe, a gondile nzila ya kuengisisa.

⁹ Msana ka kuva a di tatisile tifanelo takwe, a mahile txisima txa wutomi wo mbi guma ka votshelele vale va mu engisako.

¹⁰ Nguko, a mahilwe mphaxeli wa hombe ngu Txizimu, madingano ni mlayo wa Melkisedheki.

Ahi ti woneleni ku hi si leki wukholwa

¹¹ Ka mhaka yiya, hi ni to tala hi nga ti fanela kuwomba, kambe ta karata ku ti txhamusela, nguko mi hindukile mi txi maha mikara, mu kuengisani.

¹² Nguko, ti ti mi fanete ngu kale kuva mi di vagondisi, kambe ni konkuwa mi ngadi mi txi fanela kugondiswa makhato a timhaka ta Txizimu. Mi hindukile mi txi maha vathu va va fanelwako ngu masi, i si nga ngu sakudya so banga.

¹³ Nguko, wuhi ni wuhi a ku ngadi a txi mama masi, kha sikoti kuengisa timhaka to lulama, nguko i ngadi mwanana.

¹⁴ Kambe sakudya si so banga, nza vahombe, i ku va vo tolovela, ava va zivako kuhambanisa totshura ni to biha.