Vahebheru 2 - Bhiblia Yo Sawuleka

Kuhuluswa ka hombe

¹ Ngu toneto, hi fanete kuengisisa ta tinene timhaka ti hi nga tipfa, kasiku hi si timeli nzila.

² Nguko, ngako dipswi di di nga wombwa ngu tingelozi ka vatate vathu di di tsani, ngako kambe kotshe kundaka ka mlayo ni kotshe kueyisa kudimani txitsayiso txi txi dinganako,

³ se athu hi na hulukisa kutxani, ngako hi txi kanyisa kuhanyiswa kuwa kwathu ka hombe kani? Kuhanyiswa kuwa ku khatile kuhuwelelwa ngu Mkoma, ngu msana ku txi tsaniswa kwathu ngu va va nga tipfa,

⁴ ku txi fakazelwa kambe ngu Txizimu, ngu sikombiso ni sixamaliso, ngu sidiwukiso sa totshe tixaka ni siningo sa Moya wo Sawuleka, asi si phakelwako madingano ni kuranda ka txona.

Awu a hi yisako kuhuluswani

⁵ Nguko, hi nga ka tingelozi Txizimu txi nga ningela kufuma ditiko di di tako, adi hi wombawombako ngu dona.

⁶ Aniko, mmwani ka wumwani wukhalo a mahile wufakazi, a txi khene: “M'thu nji txani kasiku u txi mu alakanya kani, mwendo mwanana wa m'thu nji txani kasiku u txi mu endela kani?

⁷ U mmahile wu a ku hahatshi ka tingelozi mbimonyana ya yidotho; u mningile wudhumo ni kupfaliswa, si va m'bhoti wa ha msungo kwakwe.

⁸ Sotshe simaha u si vekile hahatshi ka mikondo yakwe.” Se nga ti Txizimu txi nga veka sotshe simaha hahatshi ka mikondo yakwe, kha ka sala txilo ni txa tximwetxo txi ku si nga hahatshi kwakwe. Kambe konkuwa, kha hi nzi ku ti wona ti to sotshe si hahatshi kwakwe.

⁹ Jesu wu a nga vekwa hahatshi ka tingelozi ngu txikhatinyana txa txidotho, ha mu wona na a di vekilwe m'bhoti wa kupfaliswa ni kudhumiswa, ngu mhaka ya sixaniso sa lifo. Kunene, ene ngu mtamo wa kateko ya Txizimu, a dukile lifo, kasiku a txi hanyisa votshe vathu.

¹⁰ Kha ditshuri, ti ni fanelo, ti to awule a lumbwako ngu sotshe, awu kambe i ku ene a nga si va nga, ngako a nga lava kuguleta vanana vavangi a txi va veka ka txikhunja txa wudhumo, e thanga ngu kusawulekisa Muhanyisi wa kona ngu wuhetiseki wa sixaniso.

¹¹ Nguko, hambi M'basisi, hambi va va basiswako, va huma ka Tate mmweyo. Ngu mhaka yeto Jesu, kha kanakani ku va dhana ti to i vanawe, nga mapswi awa,

¹² ma ku: “Ni na huwelela ditina dako ka vanathu, hagari ka msengelatano ni na embelela wudhumo wako.”

¹³ Se a txi khene kambe: “Ni na veka kwakwe kuthemba kwangu.” Se a txi engeta kambe a txi khene: “Ngani wuwa, ni vanana vava Txizimu txi nga ni ninga.”

¹⁴ Ngu toneto, ngako vanana i ku mnoha wumwewo, ni nyama yimweyo, nene mbwa mtumbuluko wumwewo navo, kasiku e lovisa ngu lifo lakwe awu a fumako lifo, i ku ene Sathani.

¹⁵ Jesu a thusile votshe vava i nga ti tikhumbi kuhanyani kwawe ngu mhaka ya kuthava lifo.

¹⁶ Nguko kha ditshuri ene kha tela ku ta khutalela tingelozi, aniko a tete ku ta khutalela vanana va Abrahamu.

¹⁷ Ngu toneto, ti ti fanete ku e fananiswa ka totshe ni vanawe, kasiku, masoni ka Txizimu e va mphaxeli wa hombe, wa kutala ngu wumbilu ni kuthembeka, ti to e sikota kudihela sionho sa vathu.

¹⁸ Nguko, aku a nga pfa kupandiseka ngu mhaka ya kudukwa, wa sikota kuvhuna ava va dukwako.