Vahebheru 13 - Bhiblia Yo Sawuleka

Mahanyelo amanene masoni ka Txizimu

¹ Yanani masoni ngu kurandana nga vanawe.

² Mi nga divaleni kuamukela vapfhumba, nguko, ngu kona kuamukela vapfhumba, vamwani na va si ti zivi, va amukete tingelozi.

³ Alakanyani ava va nga khotelwa, mi txi nga mo va ku khotelwani kumweko navo. Alakanyani avale va xaniswako, nguko na nanu mina ni mmidi.

⁴ Mtxhadho wu na dhundwe ngu votshe, se m'bhedhu wa mtekano wu nga nyenyeziswe, nguko Txizimu txi na abanisa ava va mahako wugelegele, ni va va mahako wugango wu wo hoxela mtxhadho.

⁵ Mi nga fumweni ngu male kuhanyani kwanu. Tsakani ngu si mi ku naso, nguko Mkoma apune a wombile a txi khene: “Kha ni na mbi thuka ni kuleka, kha ni na mbi nga va ni ku kutshotsha.”

⁶ Ngu toneto, ha sikota kuwomba ngu kutsana hi txi khathu: “Mkoma ngene txivhuno txangu, kha ni na mbi thava txilo; m'thu a nga ni maha txani kani?”

⁷ Alakanyani vathangeli vanu, ava va nga mi txhumayela dipswi da Txizimu. Wonisisani ati wutomi wawe wu nga gwitisa tona, mi txi londetela likholo lawe.

⁸ Jesu Kristu ngeneyo wammweyo, nyamnova, nyamsi ni yotshe mbimo.

⁹ Mi nga tumeleni kukanganyiswa ngu tigondo to mbi zivaneka. Nguko, ti ni lisima ngako mbilu yi txi tsaniswa ngu kateko kupinda sakudya, asi si si vhuniko txilo ka vale va namarelako ka sona.

¹⁰ Hi ni txiluvelo, atxiya va si faneliko kudyela ka txona ava va khozelako ditendani.

¹¹ Nguko, tinyama ta sihari, asiya mnoha wa sona wu tiswako ngu mphaxeli wa hombe ka wukhalo wo sawuleka ku ta kombelela divalelo ya sionho, ti hiselwa hahanze ka ditenda.

¹² Ngu toneto, Jesu, kufela kubasiswa vathu ngu mnoha wakwe wupune, a dawetwe hahanze ka txike txa didhoropa.

¹³ Ngu toneto, ahi humeni hi ya m'hingeta hahanze ka ditenda hi txi rwala kuruketelwa kwakwe.

¹⁴ Nguko hahatshi hawa, kha hi nga ni didhoropa do tsana, aniko hi lava didhoropa di di tako.

¹⁵ Ngu ngene ahi ningeleni yotshe mbimo mhamba yo dhumisa Txizimu, ti ti wombako m'hando wa txisofu txi txi fakazako ditina dakwe.

¹⁶ Mi nga divaleni kumaha ta tinene, mi txi abana ni vakwanu asi mi ku naso, nguko atiya ngu tona timhamba ti ti tsakisako Txizimu.

¹⁷ Engisani vathangeli vanu, mi txi ti veka hahatshi masoni kwawe; nguko ngu vona va karatekelako mimoya yanu. Ngu vona va no ya angula ati ti dinganako vona. Ngu toneto, va na sikota kuthuma mthumo wawe ngu kutsaka, va si wu thumi ngu kudila. Nguko eto, nga ti si mi vhuni txilo.

¹⁸ Hi kombeleleni, nguko ha themba ti to hi ni livhalo la linene, na hi txi navela ngu yotshe mbilu kutsimbila ngu nzila ya yinene yotshe mbimo.

¹⁹ Na mi kombela ngutu ti to mi txi mahisa toneto, kasiku, ni txi kuluveta ni txi wuyiswa kwanu.

²⁰ Txizimu txa kudikha txi nga kwelisa txitimwi awule txi nga mu wusa ngu ka vafi, ngu mnoha wa txitumelelano txo mbi na magwito, M'dyisi wa hombe wa tinvuta,

²¹ Mkoma wathu Jesu, txi na mi longisele sotshe si i ku sa sinene, kasi ku si mi vhuna kumaha kuranda ka txona; txona Txizimu txi na thume kwathu ati ti txi tsakisako, ngu Jesu Kristu, awu a fanelako kupfaliswa ngu malembe ni malembe.

²² Vanathu, na mi kurumeta kutimisela ka mapswi awa ni mi layako ngu ona. Nguko, ni mi rumete amadotho dwe.

²³ Zumbani mi txi tiziva ti to mwanathu Timoti a humisilwe mkorani. Ni txi kuluveta kukhukha, ni nata nayo ni ta mi wona.

²⁴ Dingulani votshe vathangeli vanu. Votshe vasawuleki va mi dingula, ava va kuta ngu Italiya.

²⁵ Makatekwa ma nave ni nanu motshe. Amen.