Vahebheru 10 - Bhiblia Yo Sawuleka

¹ Se, ngako mlayo i ku txifananiso dwe, txa simaha sa sinene si si tako, i ku si nga sona simahaso sa sinene sipune si ti wonekisako, wona mlayo, hambi kumahwa ka timhamba to wuyelelwa yotshe mbimo, ati ti ningelwako kugumani ka dilembe ni dilembe, kha wu sikoti ni ka kudotho kuyisa kuhetisekani avale va manako txihiwa ka tona timhambeto.

² I si nga toneto, ina va sa leka kuphaxa timhamba kani? Nguko, ava va ningelako timhamba ka Txizimu, idiku va basisilwe ko gwitisa, nga va si ti pfi kambe ti to va ngadi ni sionho.

³ Aniko, ngu konaha ka timhamba tiya, dilembe ni dilembe ka wusetwa txialakanyiso txa sionho.

⁴ Nguko, kha ti na kukoteka ti to mnoha wa tiphongo ni madhuna wu fuvisa sionho.

⁵ Ngu toneto, mbimo yi a nga wulela mu ditikoni, Kristu a ti khene: “Timhamba ni miningelo kha sa kutsakisa, aniko u ni lulamisete mmidi.

⁶ Timhamba to hiswa ni timhamba to mbi hiswa, ta kudihela sionho, kha ta kutsakisa.

⁷ Se ani ni ti khani: Wona, ni ho hawa, nguko eto ti bhaletwe ani amu ka dibhuku; ni tela ku ta maha kuranda kwako, awe Txizimu.”

⁸ Na a di wombile kambe kukhatani a txi khene: “Timhamba ni miningelo, timhamba ta kuhiswa ni timhamba ta ku ambi hiswa, ta kudihela sionho khwa si lava, aniko kha sa kutsakisa.” Kambe eto, ti ti mahwa madingano ni kuruma ka mlayo.

⁹ Konako, a wombile a txi khene: “Wona, ni ho hawa, ni tela ku ta maha kuranda kwako, awe Txizimu.” Ngu toneto, a fuvisa mhamba ya kukhata, a txi emisa ya wumbidi.

¹⁰ Se ngu kona kuranda kuwa, athu hi basisilwe ngu kuningelwa ka mmidi wa Jesu Kristu, awu wu nga ningelwa kumweko dwe, wu txi maha mhamba yo mbi na magwito.

¹¹ Kha ditshuri, mphaxeli wuhi ni wuhi wa Txitumelelano txa Kale, a humelela ngu mthumo wakwe wa kukhozela, otshe masiku, a txi wuyelela kuphaxa yoneyo mhamba ya yimweyo, sikhati sasingi, kambe yona kha yi sikoti kufuvisa txionho.

¹² Kasi ene Kristu, a phaxile mhamba ya kudivalela sionho kumweko dwe. Msana keto, a ti ya khalahatsha txineneni ka Txizimu kala kupinduka;

¹³ na a txi rinzela mbimo yi valala vakwe va no khoziswa va txi mahwa txikhigelo txa mikondo yakwe.

¹⁴ Kha ditshuri, ngu mhamba yimweyo dwe, ene a va ningile kusawuleka ko hetiseka, vona vathu vava a va sawulekisako.

¹⁵ Ngu toneto, kambe wu hi fakazelako Moya wo Sawuleka, msana ka kuwomba tito:

¹⁶ “Nditxe txitumelelano ni no txi maha navo, msana ka masiku oneyo.” Mkoma a wombile a txi khene: “Ni na veka milayo yangu timbiluni kwawe, ni na yi bhala kambe mapimoni kwawe.

¹⁷ Kha ni na mbi swa ni alakanya sionho sawe, hambi mithumo yawe yo biha.”

¹⁸ Se, ahawa ku nga divalelwa sionho kha kuswi kambe ku txi laveka mhamba ya kudivalela sionho.

Ahi tshuketeleni hafuhi ni Txizimu

¹⁹ Ti di mahile eto, vanathu, hi ni txithembo txo tsana, ku hi na wulela ka wukhalo wo sawuleka ngu mhaka ya mnoha wa Jesu.

²⁰ Ngu kwakwe hi mani nzila ya yiphya ni ya kuhanya, ayi ene a nga hi tulela kasi ku hi txi pinda ngu hagari ka m'jiyo i ku mmidi wakwe.

²¹ Hi ni mphaxeli wa mtamo a nga fumiswa nyumbani ka Txizimu.

²² Ngu toneto, ahi tshuketeleni hi di ni mbilu yo lulama, na hi di tate ngu likholo, hi di ni mbilu yi yi nga basiswa ka wotshe wubihi wa livhalo, ni mmidi wo kuwulwa ngu mati o basa.

²³ Na hi si rereki, ahi yeni masoni ngu kutsana hi txi kombisa txithembo txathu, nguko awule a nga hi mahela txithembiso, mbwo thembeka.

²⁴ Ahi laveni tinzila to vhunana, hi txi tsaniselana amu ka lirando ni ka mithumo ya yinene.

²⁵ Hi nga lekeni misengeletano yathu, nga vamwani va tolovelako kumaha. Aniko ahi laveni tinzila to tsaniselana yotshe mbimo, ngutu-ngutu akuwa mi wonako ditshiku da Mkoma di txi tshuketela.

²⁶ Nguko, ngako hi txi onha khakwenye, na hi txi di ziva ditshuri ta tinene, kha ku nga ngadi ni mhamba yimwani yo thavisa sionho.

²⁷ Aniko hi rinzela kuya pamulwa ngu nzila yo thisa ni mdhikila wa mndilo wu wu no ya hetisa valala va Txizimu.

²⁸ Awu a ndakako Mlayo wa Mosi a abaniselwa lifo, ku si nga ni divalelo, ti txi khukhela ka wufakazi wa vathu vambidi mwendo vararu.

²⁹ Se, ngu toneto, mi alakanya txani ngu txitsayiso txa hombe, atxi a no txi mana wule a nga kanyisa Mwanana wa Txizimu, asi khatali txilo ngu mnoha wa txitumelelano, awu a nga sawulekiswa ngu wona, se a txi tshumela e ruketela Moya wa makatekwa, kani?

³⁰ Nguko athu ha m'ziva awule a nga khene: “Kupharela kulumba ani, ani ngani ni no tshumetela.” A txi khene: “Mkoma a na lamula vathu vakwe.”

³¹ Ta thisa ngutu kuwela manzani ka Txizimu txi txi hanyako.

³² Kambe alakanyani makhato anu. Ka masiku oneyo msana ka kuva mi di woningilwe ngu Txizimu mi rwate sixaniso sa kulwa ko nemela ni kupandisa.

³³ Ka timwani timbimo, i ti anu mi nga ti tseketselwa masoni ka vathu, mi txi ruketelwa ni kuxaniswa; kambe ka timwani timbimo, mi xanisekile kumweko ni vale va nga ti ka sixaniso so nga toneto.

³⁴ Nguko, anu mi pfite kuxaniseka ngu vale va nga ti mikorani, mi tumete ngu kutsaka ve mi tekela simaha sanu, ngukuva mi ti ti kholwa ngu kutsana ti to mi na mana thomba ya tshuko ni yo mbina magwito.

³⁵ Ngu toneto, mi nga karaleni, nguko kutimisela ku fanetwe ngu hakhelo ya hombe.

³⁶ Kha ditshuri, mi fanete kuva ni kutimisela kasi ku mi txi maha kuranda ka Txizimu, mi mana asi txi nga mi thembisa sona.

³⁷ Nguko, Mibhalo yi womba tiya: “Ku ngadi sate mbimo ya yidotho, ya yidotho ngutu. Se awule a tako, a na bwaka, kha na mbi swela.

³⁸ Mlulami a na hanya ngu likholo, aniko ngako a txi tshumelela msana, moya wangu kha wu na mbi mtsakela.”

³⁹ Athu kha hi nga vathu va va tshumelelako msana, veya kulovani. Hi vathu va likholo, kasi ku hi txi hanyisa mimoya yathu.