Vahebheru 1 - Bhiblia Yo Sawuleka

Dipswi da Txizimu ngu Mwanana wa txona

¹ Txizimu, ngu sikhati so tala ni mamahelo o tala, txi wombawombile kale ka vatate vathu, ngu sisofu sa vaprofeti,

² Konkuwa, masikwanano, txi wombawombile kwathu, ngu Mwanana wa txona, awu txi nga mmaha txidya-thomba txa sotshe, awu kambe txi nga maha nzuma ni mafu ngu ngene.

³ Ene, ngako i ku liwoningo la wudhumo wa Txizimu, ni txikombiso txa wudhumo wa txona, awu a hiketako sotshe simaha ngu mtamo wa dipswi dakwe, msana ka kuva a di gwitile kukuwula sionho, a ti ya zumba txineneni ka wuhombe wa Nyatxitimwi nzumani

⁴ Mwanana mbwa hombe ngutu kupinda tingelozi, Txizimu txi mningile ditina da hombe, kupinda tona.

⁵ Nguko, ngu ka yihi ngelozi Txizimu txi nga womba txi txi kha txona: “Awe u Mwanana wangu, ni ku velekile nyamsi,” kani? Na kambe txi txi kha txona: “Ani ni na va ni di Tate wakwe, ene a na va Mwanana wangu,” kani?

⁶ Na kambe, ngako Txizimu txi rumela Mwanana wa txona ha mafuni txi ti kha txona: “Totshe tingelozi ta Txizimu ti na mkhozele.”

⁷ Se ngako Txizimu txi txi womba ngu tingelozi, txi ti kha txona: “Txizimu txi mahile tingelozi ta txona kota mimoya, ani sithumi sa txona, txi si mahile midhikila ya mndilo.”

⁸ Kambe ngako txi txi womba ngu Mwanana, Txizimu txi wombisa tiya: “Txiluvelo txako, awe Txizimu, txi tsani kala kupinduka, se ndonga yako ya wukoma i ndonga ya kululama.

⁹ U randile wululami, u txi venga wubihi; ngu toneto, Txizimu, Txizimu txako, txi ku totile mafura a litsako kupinda votshe vangana vako.”

¹⁰ Se txi txi kha txona: “Ngawe, Mkoma, u nga va nga mafu kukhatani; tinzuma nitona mthumo wa manza ako.

¹¹ Sotshe si na lova, kambe awe khu na magwito; sotshe si na sakala kufana ni syambalo.

¹² Sotshe u na si peta kufana ni didhamba, si na kutxuka kufana ni syambalo, kambe awe u ku eneyo wammweyo, wutomi wako kha wu na mbi guma.”

¹³ Mwendo ngu ka yihi ngelozi, Txizimu txi nga yi gela, hambi ditshiku da dimwedo, txi txi kha txona: “Khalahatsha txineneni kwangu, kala kuza ni maha ava i ku valala vako txikhigelo txa mikondo yako,” kani?

¹⁴ Ina tingelozi totshe hi nga mimoya yi yi thumako mithumo, ayi yi nga rumelwa kuthumela avale va fanelako kuamukela thomba ya kuhanyiswa, kani?